"ލާމަރުކަޒީ ނިޒާމު ހަރުދަނާ ކުރެވޭނީ ދައުލަތުގެ 3 ބާރާއި މީޑިއާ އަދި ރައްޔިތުންވެސް ނިޒާމަށް ފާރަވެރިވެގެން"

ލާމަރުކަޒީ ނިޒާމު ހަރުދަނާ ކުރެވޭނީ ދައުލަތުގެ ތިން ބާރާއި މީޑިއާ އަދި ރައްޔިތުންވެސް އެ ނިޒާމަށް ފާރަވެރިވެގެންކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ.

ވަޒީރު އާދަމް ޝަރީފް މިހެން ވިދާޅުވި ކައުންސިލްތަކުގެ ކުރިއެރުންތައް ފާހަގަކުރުމުގެ ގޮތުން ކޮންމެ އަހަރަކު ދެމުން އަންނަ "ކަންގަތި އެވޯޑް" ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފު އުމަރު ވިދާޅުވީ ރާއްޖޭގެ އިދާރީ ދާއިރާތައް މިއަދު ހިންގަމުންދަނީ ޤާނޫނު އަސާސީގައި ބަޔާންކުރާ ލާމަރުކަޒީ ނިޒާމް ކަށަވަރުވެގެން ކަމަށެވެ. ސަރުކާރުން އެދިވަޑައިގެން ޤައުމީ ޔުނިވަރސިޓީން ހިންގި ދިރާސާއިންވެސް ލާމަރުކަޒީ ނިޒާމު ދިވެހިން ބަލައިގެންފައިވާކަމަށާއި އެ ނިޒާމު އިތުރަށް ހަރުދަނާ ކުރަންޖެހޭކަން ހާމަވެފައިވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ލާމަރުކަޒީ ނިޒާމު ހަރުދަނާކުރެވޭނީ ސަރުކާރާއި، ރައްޔިތުންގެ މަޖިލީހާއިި ޝަރުޢީ ނިޒާމާއި މީޑިއާ އަދި ރައްޔިތުން އެ ނިޒާމަށް ފާރަވެރިވެ، އެ ނިޒާމު އިތުރަށް ކުރިއެރުވުމަށް މަސައްކަތް ކޮށްގެން ކަމަށެވެ. އަދި މުހިންމު ނިންމުންތައް ނިންމުމުގައި ރައްޔިތުންގެ ބައިވެރިވުމާއި ހިއްސާ އިތުރުކުރުމާއެކު ކައުންސިލްތަކަށް ރައްޔިތުން ކުރާ އިތުބާރު ބޮޑުކުރުމަށް މަސައްކަތް ކުރުން މުހިންމު ކަމަށްވެސް ވަޒީރު އާދަމް ޝަރީފު އުމަރު ވިދާޅުވިއެވެ.

"އެންމެ ބޮޑު ހަގީގަތަކީ ރައްޔިތުންނާ ގުޅުންހުރި ކަންކަމުގައި ފުރަތަމަ ޓަކި ޖަހަންޖެހޭ ދޮރަކީ ކައުންސިލްތަކުގެ އިދާރާކަން. ކައުންސިލްތަކަކީ ހަގީގީ މާނައިގައި ރައްޔިތުންގެ އޮފީސް، ރައްޔިތުންގެ ގެ. ރައްޔިތުންނާ ގުޅުންހުރި ކަންކަމުގައި އެންމެ ފުރަތަމަ ހަރަކާތްތެރިވަނީ ކައުންސިލްތަކުގެ އިދާރާތަކުން،" ވަޒީރު އާދަމް ޝަރީފު އުމަރު ވިދާޅުވިއެވެ.

ރަށްރަށުގެ ތަރައްގީގައި ކައުންސިލްތަކުގެ ޒިންމާ ބޮޑުކަން ފާހަގަކުރައްވައި ވަޒީރު އާދަމް ޝަރީފު ވިދާޅުވީ އެ ޒިންމާތަކާ އެއްވަރަށް ވަސީލަތްތައް ގާއިމުކޮށް މީހުން ބިނާ ކުރަންޖެހޭ ކަމަށެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ބޮޑު ސަމާލުކަމެއް ދެއްވާ އެއް ކަމަކީ ކައުންސިލްތަކުގެ އުމްރާނީ ތަރައްގީއަށް ކުރިއަށްގެންދަވާ މަޝްރޫއުތައް ކަމަށާއި 105 ކައުންސިލް އިމާރާތް ރަނގަޅު ފެންވަރަށް ތަރައްގީ ކުރުމުގެ މަސައްކަތް މިހާރު ކުރިއަށްދާ ކަމަށް ވަޒީރު ވިދާޅުވިއެވެ.

މީގެ އިތުރުން ކައުންސިލްތައް މާލީ ގޮތުން ބާރުވެރިކުރުވުމަށްވެސް ރައީސުލްޖުމްހޫރިއްޔާ މަސައްކަތް ކުރައްވާ ކަމަށާއި އެގޮތުން، ގްރީން ޓެކްސްގެ ވަކި އިންސައްތައެއް ކައުންސިލްތަކަށް ދިނުމަށް ނިންމަވައި ކައުންސިލްތަކަށް ފަޅުރަށްތައް ލިބޭނެ ގޮތް ހަމަޖައްސަވާފައިވާ ކަމަށްވެސް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފު އުމަރު ވިދާޅުވިއެވެ.