ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ ގައުމީ ބީޗް ވޮލީބޯލް ލީގު 2024 ގެ ފިރިހެން ޑިވިޝަނުގެ ޗެމްޕިއަންކަން ޖެހިޖެހިގެން ދެވަނަ ފަހަރަށް އިސްމާއިލް ސާޖިދް (ކުޑަ ކާއްޓޭ) އާއި އާދަމް ނަސީމް (އެޑަމް)ގެ ޕެއާ ހޯދައިފިއެވެ.
މިދިޔަ އަހަރު މި މުބާރާތް ކުޅުނީ މޯލްޑިވްސް ބީޗް ވޮލީބޯލް ޗެލެންޖް 2023 ގެ ނަމުގައެވެ. މިދިޔަ އަހަރެކޭ އެއްގޮތަށް މިއަހަރުގެ ފައިނަލުގައި ވެސް ސާޖިދު އާއި އެޑަމްގެ ޕެއާ ބައްދަލުކުރީ މުޙައްމަދު އަލީ (ޑެންޒޯ) އާއި އަޙްމަދު މުހައްމަދު (ކޯކޭ) ގެ ޕެއާއާއެވެ.
ފައިނަލް މެޗު އެ ޕެއާއިން ކާމިޔާބުކޮށްފައިވަނީ ސީދާ ދެ ސެޓުންނެވެ. އެއީ 21-11 އަދި 21-16 އިންނެވެ. މެޗުގައި ފެނިގެންދިޔައީ ސާޖިދު އާއި އެޑަމްގެ ހުށިޔާރުކަމެވެ. އަދި ޓީމެއްގެ ގޮތުގައި ދައްކާ ތަފާތުކަމެވެ.
މިފަހަރުގެ ބީޗުވޮލީ ލީގު ކުޅުނީ ޖުމްލަ ފަސް ޕެއާއާއެކު އެވެ. އެއީ އެންމެ ފަހުގެ ލީގު ޗެމްޕިއަން ޕެއާ އާއި ރަނަރަޕް ޕެއާގެ އިތުރުން ކޮލިފައިން ބުރުން ފައިނަލް ބުރަށް ހޮވުނު ތިން ޕެއާއެވެ. މި ތިން ޕެއާ ހޮވުނީ ކޮލިފައިން ބުރެއް ކުޅެގެންނެވެ. ދެ ގްރޫޕަކަށް ބަހާލައިގެން ކުޅުނު ކޮލިފައިން ބުރުގެ ގްރޫޕް އޭގައި ހަތަރު ޕެއާ އަދި ގްރޫޕް ބީގައި ތިން ޕެއާ ހިމެނުނެވެ.