އިނގިރޭސި ލީގު ކަޕުގައި ރޭ ގެބްރިއަލް ޖެސޫސް ހެދި ހެޓްރިކާއެކު 3-2 ގެ ނަތީޖާއަކުން ކްރިސްޓަލް ޕެލަސް ބަލިކޮށް، މުބާރާތުގެ ސެމީ ފައިނަލުގެ ޖާގައެއް އާސެނަލުން ހޯދައިފި އެވެ.
ލަންޑަނުގެ އެމިރޭޓްސް ސްޓޭޑިއަމްގައި ކުޅުނު މި މެޗުގެ ހަތަރުވަނަ މިނިޓުގައި ކްރިސްޓަލް ޕެލަސްގެ ޝޯން ފިލިޕް މަޓޭޓާ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
މި މެޗުގެ ފުރަތަމަ ހާފުގެ ކުޅުން ނިމުނުއިރު 1-0 ގެ ނަތީޖާއަކުން ކްރިސްޓަލް ޕެލަސް ކުރީގައި އޮތްއިރު ދެވަނަ ހާފަށް އާސެނަލް އިން ނިކުމެފައިވަނީ ދެ ބަދަލަކާ އެކުގަ އެވެ. އެގޮތުން ކޯޗު މިކޭލް އާޓޭޓާ ވަނީ ވިލިއަމް ސަލީބާ އާއި މާޓިން އޮޑެގާޑް ކުޅެން އަރުވާފަ އެވެ.
މި ބަދަލާއެކު ދެވަނަ ހާފުގައި އާސެނަލްގެ ކުޅުން ވަނީ އިތުރަށް ރަގަޅުވެފަ އެވެ. ނަތީޖާއެއްގެ ގޮތުން ދެވަނަ ހާފުގެ ކުޅުން ފެށުނުތާ 9 ވަނަ މިނިޓުގައި ގެބްރިއަލް ޖެސޫސް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.
އާސެނަލް އިން މި މެޗުގައި ފުރަތަމަ ފަހަރަށް ކުރި ހޯދާފައިވަނީ މެޗުގެ 73 ވަނަ މިނިޓުގައި ޖެސޫސް ކާމިޔާބުކޮށްދިން ލަނޑުންނެވެ. އަދި މެޗުގެ ފުރިހަމަ ވަގުތު ހަމަވާން ނުވަ މިނިޓަށް ވެފައިވަނިކޮށް އޭނާ ވަނީ އިތުރު ލަނޑެއް ޖަހާ މި މެޗުގައި ހެޓްރިކް ހަދާފަ އެވެ.
ކްރިސްޓަލް ޕެލަސްގެ އެންކޭޓިއާ ވަނީ މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް އިތުރު ލަނޑެއް ކާމިޔާބުކޮށް މެޗުގެ ނަތީޖާ 3-2 އަށް ބަދަލުކޮށްފަ އެވެ.
މި މުބާރާތުގެ ސެމީ ފައިނަލުގެ ފަހު ޖާގަ ކަށަވަރު ވެގެންދާނީ މިރޭ މެންޗެސްޓަރ ޔުނައިޓެޑާއި ޓޮޓްނަމް ހޮޓްސްޕަރ ބައްދަލުކުރާ މެޗަށް ފަހުގަ އެވެ.