އިޓަލީވިލާތުގެ ހޮހޮޅައެއްގެ ތެރޭގައި ތިން ދުވަސް ވަންދެން ތާށިވެފައި ހުރި އަންހެނަކު ސަލާމަތް ކޮށްފިއެވެ.
ޑިސެމްބަރު 14ވަަނަ ދުވަހު އިޓަލީވިލާތުގެ ރައްޔިތެއް ކަމަށްވާ އޮއްތާވިޔާ ޕިއާނާ ވަނީ އެ ޤައުއުމުގެ އަބިއްސޯ ބުއެނޯ ފޮންތޭނޯ ހޮހޮޅަ ވިއުގައަށް ޒިޔާރަތް ކުރުމުގެ ތެރޭގައި އަށް މީޓަރު އަޑިއަށް ވެއްޓިފައެވެ. އޭގެ ސަބަބުން އޭނާގެ ބުރަކައްޓާއި މޭކަށިގަނޑަށް ގިނަ އަނިތާތަކެއް ލިބި މޫނުގެ ކަށިގަނޑަށް ވެސް ވަނީ ގެއްލުން ލިބިފައެވެ.
އުމުރުން 32 އަހަރުގެ އޮއްތާވިޔާ ސަލާމަތް ކޮށްފައިވަނީ 75 ގަޑިއިރުގެ ބުރަ މަސައްކަތަކަށް ފަހު ޑިސެމްބަރު މަހުގެ 18ވަނަ ދުވަހު ދަންވަރު 2 ޖަހާކަންހާއިރެވެ. އޭނާ ސަލާމަތް ކޮށްފައި ވަނީ ހޮހޮޅައަށް ވަންނަ މައި ދޮރާ ގާތްގަނޑަކަށް 4 ކިލޯ މީޓަރު ދުރުންނެވެ.
އޮއްތާވިޔާ ސަލާމަތް ކުރުމުގެ މަސައްކަތުގައި ޙަރަކާތްތެރިވި މީހުން ބުނީ އޭނާ ސަލާމަތް ކުރި އިރު އޭނާގެ ހޭ ހުރި ނަމަވެސް ވަރަށް ބޮޑަށް ވަރުބަލި ވެފައިވާކަން ފާހަގަ ކުރެވުނު ކަމަށެވެ. އޭނާއަށް ލިބިފައިވާ އަނިޔާތަކުން އިންތިހާއަށް ވޭން ތަޙައްމަލް ކުރަމުން ދިޔަ ކަމަށް ވެސް އެ މީހުން ބުނެއެވެ. އޮއްތާވިޔާއަށް މިހާރު ދަނީ އިޓަލީވިލާތުގެ ބެރުގަމޯގައި ހުންނަ ހަސްފަތާލެއްގައި ފަރުވާ ދެމުންނެވެ.
ފަރުބަދަތަކުންނާއި ހޮހޮޅަތަކުން މީހުން ސަލާމަތްކުރާ ޖަމްޢިއްޔާއެއް ކަމަށްވާ ސީއެންއެސްއޭއެސްގެ މެންބަރު, ފެދެރިކޯ ކަތާނިޔާ ވިދާޅުވީ އޮއްތާވިޔާ ސަލާމަތްކޮށްފައި ވަނީ ހީކުރި ވަރަށް ވުރެ އަވަހަށް ކަމަށެވެ. އެ ގޮތަށް އެ ކަން ދިމާވީ ޚާއްޞަ ޓީމުތަކަކުން ހޮހޮޅައިގައިވާ ހުރަސްތައް ގޮވާތަކެތި ބޭނުންކޮށްގެން ނައްތާލަމުން ގޮސްފައިވާތީ ކަމަށް އޭނާ ވިދާޅުވިއެވެ.
"ހޮހޮޅަ ބަލަން ދިޔަ ސްޕީލިއޮލޮޖިސްޓު ވެސް ސަލާމަތް ވުމަށް ގިނަ މަސައްކަތްތަކެއް ކޮށްފައިވޭ. އޭނާގެ ހިތްވަރު އޭނާ ދައްކައިލި. އަހަރުމެން ފުރަތަމަ މަސައްކަތް ކުރަމުން ދިޔައީ އޭނާގެ ޞިއްޙީ ޙާލަތަށް ރިޢާޔަތްކޮށް އަރާމު ކުރަން ފުރުޞަތު ދިނުމަށް ދޭތެރެދޭތެރެއިން މަސައްކަތް މެދުކަނޑައިލަމުން. ނަމަވެސް އަހަރެމެން ފަހުން މަސައްކަތް ކުރިއަށް ގެންދިޔައީ މެދުކެނޑުމެއް ނެތި. އެއީ އޭނާގެ ވެސް ހިތްވަރުން،" ކަތާނިޔާ ވިދާޅުވިއެވެ.
މިއީ ހޮހޮޅަތަކަށް ވަދެ އެ ތަންތަން ބެލުމުގައި ކުޅަދާނަ އަދި ތަޖުރިބާކާރު އޮއްތާވިޔާއަށް މި ފަދަ ހާދިޘާއެއް ދިމާވި ފުރަތަމަ ފަހަރެއް ނޫނެވެ. 2023ވަނަ އަހަރުގެ ޖުލައި މަހުގެ ތެރޭގައި ވެސް މިފަދަ ޙާލަތަކާ އޭނާ ކުރިމަތިލާން ޖެހުނެވެ. ދިމާވި އެކްސިޑެންޓެއްގެ ސަބަބުން ހަމަ އެ ހޮހޮޅަ ވިއުގައިގައި އޭނާ ތާށިވުމުން އެ ފަހަރު އޭނާ ސަލާމަތްކޮށްފައި ވަނީ ގާތްގަނޑަކަށް 40 ގަޑިއިރު ފަހުންނެވެ.
ފާއިތުވި 18 މަސް ދުވަހުގެ ތެރޭގައި އޮއްތާވިޔާއަށް މި ފަދަ ދެ ހާދިޘާ ދިމާވެފައި ވުމުން ޢާންމުންގެ ފާޑުކިޔުން ވެސް ވަނީ އަމާޒުވެފައެވެ. ހާދިޘާ މެދުވެރިވީ އޮއްތާވިޔާގެ ފަރުވާކުޑަކަމުން ކަމަށް ގިނަ ބަޔަކު ބުނި ނަމަވެސް ކަތާނިޔާ ވިދާޅުވީ ހޮހޮޅަތައް ބަލަން ދިޔުމަށް ބޭނުންވާ ސާމާނާއި ހުނަރު އޮއްތާވިޔާގެ ކިބައިގައި ހުރި ކަމަށެވެ. އޭނާއަށް ހާދިޘާތައް ދިމާވީ ތަޖުރިބާ ނެތުމުގެ ސަބަބުން ނޫން ކަމަށް ވެސް އޭނާ ވިދާޅުވިއެވެ.