އިންޑިޔާގެ ކަނޑުގެ ސިފައިންގެ މަނަވަރަކާއި 100އަށްވުރެ ގިނަ ފަސިންޖަރުން އުފުލަމުން ދިޔަ ފެރީއެއް ޖެހި 13 މީހުން މަރުވެއްޖެއެވެ.
އިންޑިޔާގެ ކަނޑުގެ ސިފައިން ނެރުނު ބަޔާނެއްގައި ބުނީ އެ ޚިދުމަތުގެ މަނަވަރެއްގެ އިންޖީނު ހެދުމުގެ މަސައްކަތް މުމްބާއީ ހާބަރުގައި ކުރަމަން ދަނިކޮށް ބޯޓުގެ ކޮންޓްރޯލް ގެއްލުނު ކަމަށެވެ. އޭގެ ސަބަބުން އެ މަނަވަރު މީހުން އުފުލައި ފެރީގައި ޖެހި އެ ފެރީ އަޑިއަށް ގޮސްފައިވާ ކަމަށް ވެސް ބަޔާނުގައި ބުނެފައި ވެއެވެ. އެ ހާދިޘާގައި ހިމެނޭ މީހުންގެ ތެރެއިން 99 މީހުން ސަލާމަތް ކޮށްފައިވާ ކަމަށް ވެސް ބަޔާނުގައި ބުނެފައި ވެއެވެ.
ހާދިޘާ ހިނގި ވަގުތު ފެރީގައި ދަތުރުކުރަމުން ދިޔަ މީހަކު ބުނީ ކަނޑުގެ ސިފައިންގެ މަނަވަރު ފެރީގައި ޖެހުމުން ފެރީއަށް ފެން ވަންނަން ފަށައި ބަނޑުން ޖަހައިލި ކަމަށެވެ. ހާދިޘާ ދިމާވުމުން ބޯޓު ދުއްވަން ހުރި ކައްޕި ލައިފް ޖެކެޓު އެޅުމަށް އިރުޝާދު ދިން ކަމަށް އޭނާ ބުނެއެވެ. އޭނާ ސަލާމަތް ކޮށްފައިވަނީ މޫދުގައި ފަތަފަތައި އޮތްތާ ފަނަރަ މިނެޓު ފަހުން ކަމަށް އޭނާ ކިޔައިދިނެވެ.
އިންޑިޔާގެ ބޮޑުވަޒީރު ނަރެންދްރަ މޯދީ ވަނީ އެ ހާދިޘާގައި މަރުވި މީހުންގެ ޢާއިލާތަކަށް ތަޢުޒިޔާ ފޮނުއްވައިފައެވެ. އެކަސްގައި ކުރެއްވި ޕޯސްޓެއްގައި މޯދީ ވިދާޅުވީ މުމްބާއީގައި ހިނގި ހާދިޘާއަކީ ވަރަށް ހިތާމަވެރި ހާދިޘާއެއް ކަމަށެވެ.
މޯދީ ވަނީ މަރުވި މީހުންގެ ޢާއިލާތަކަށް 200,000 ރުޕީސް ނުވަތަ 2,356 ޑޮލަރު, އަދި އަނިޔާ ވީ މީހުންނަށް 50,000 ރުޕީސް ނުވަތަ 589 ޑޮލަރު ދެއްވާނެކަމަށް އިޢުލާނު ކުރައްވައިފައެވެ. އޭނާ ވިދާޅުވީ އެ ފައިސާ ހަމަޖައްސާނީ ބޮޑުވަޒީރުގެ ނޭޝަނަލް ރިލީފް ފަންޑުން ކަމަށެވެ.