ކެފޭއަކަށް ވަދެ މުވައްޒަފުންނަށް ބިރުދެއްކި މައްސަލައިގައި ހައްޔަރުކުރި 2 މީހުން ބަންދުކުރުމަށް އަމުރުކޮށްފި
-
އެތަނަށް ވަދެ މުވައްޒަފުންނަށް ބިރުދައްކާފައިވަނީ މިމަހުގެ 12 ވަނަ ދުވަހު
-
މި މައްސަލައިގައި ހައްޔަރުކުރި 2 މީހުން 5 ދުވަހަށް ބަންދުކުރުމަށް ވަނީ އަމުރުކޮށްފައި
މާލޭގައި ހުންނަ "ލެސްޓް ކޮފީ މޯލްޑިވްސް" އަށް ވަދެ ތޫނު ހަތިޔާރު ބޭނުންކޮށްގެން އެތަނުގެ މުވައްޒަފުންނަށް ބިރުދެއްކި މައްސަލައިގައި 2 މީހަކު ބަންދުގައި ބޭތިއްބުމަށް ކޯޓުން އަމުރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ބ. ތުޅާދޫ، މީޒާން އުމުރުން 44 އަހަރުގެ އަސަދުﷲ ޚާތިމްއާއި ގދ. ދެއްވަދޫ، ވައިލެޓްމާގޭ އުމުރުން 31 އަހަހަރުގެ އަޙްމަދު ތައުފީޤެވެ. ފުލުހުން ވިދާޅުވީ، މި 2 މީހުންގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން 5 ދުވަހަށް ބަންދުގައި ބޭތިއްބުމަށް ކޯޓުން އަމުރުކޮށްފައިވާކަމަށެވެ.
ކޯޓު އަމުރެއްގެ ދަށުން މި ދެ މީހުން ހައްޔަރުކޮށްފައިވަނީ މި މަހުގެ 16 ވަނަ ދުވަހުއެވެ. މާލޭގެ ހަވީރީ މަގުގައި ހުންނަ "ލެސްޓް ކޮފީ މޯލްޑިވްސް" އަށް ވަދެ ތޫނު ހަތިޔާރު ބޭނުންކޮށްގެން އެތަނުގެ މުވައްޒަފުންނަށް ބިރުދައްކާ، މުދަލަށް ގެއްލުންދިން މައްސަލަ ފުލުހުންނަށް ރިޕޯޓްކޮށްފައިވަނީ މިމަހުގެ 12 ވަނަ ދުވަހުއެވެ. ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.