އައްޑޫ ބޯޓުން ގެއްލުނު މީހާ ހޯދަން 104 ނޯޓިކަލް މޭލު ސަރަހައްދެއް ބަލައިފި

އައްޑޫ ސިޓީން މާލެއަށް ދަތުރުކުރަމުންދިޔަ ބޯޓަކުން ގެއްލިގެން ރިޕޯޓްކުރި ބިދޭސީ މީހާ ހޯދުމަށް 100 ނޯޓިކަލް މޭލަށް ވުރެ ބޮޑު ސަރަހައްދެއް ބަލާފައިވާކަމަށް ޤައުމީ ދިފާޢި ބާރުން ވިދާޅުވެއްޖެއެވެ.

ޤައުމީ ދިފަޢީ ބާރު، އެމްއެންޑީއެފްއިން ވިދާޅުވީ ގެއްލުނު ފަޅުވެރިޔާ ހޯދުމަށް އެމްއެންޑީއެފް ސަދަން އޭރިއާ ސްކޮޑްރަންއިން ސާޗް އޮޕަރޭޝަނެއް ހިންގާފައިވާ ކަމަށެވެ. އެގޮތުން 104 ނޯޓިކަލް މޭލުގެ ކަނޑުގެ ސަރަހައްދެއް ބަލާފައިވާކަމަށާއި ނަމަވެސް މިހާތަނަށް އައިއިރު ގެއްލުނު މީހާ ފެނިފައިނުވާކަމަށް އެމްއެންޑީއެފްއިން ވިދާޅުވެއެވެ.

ދިވެހި ފުލުހުންގެ ޚިދުމަތުން ވިދާޅުވީ "ސީމެކްސް" ނަމަކަށް ކިޔާ ބޯޓުން ގެއްލިގެން ހޯދަމުންދަނީ އެ ބޯޓުގައި ފަޅުވެރިއެއްގެ ގޮތުގައި މަސައްކަތް ކުރަމުން ދިޔަ ނޭޕާލުގެ ރައްޔިތެއް ކަމަށްވާ ރާޖް ކުމާރެވެ.

އޭނާ ގެއްލިފައިވާކަމުގެ ރިޕޯޓް ލިބިފައިވަނީ ރޭގެ ވަގުތެއްގައިކަމަށް ފުލުހުން ވިދާޅުވެއެވެ.

ފުލުހުން ވިދާޅުވީ ބޯޓު އައްޑޫ ސިޓީން ފުރީ ރޭ 11:30 ހާއިރު ކަމަށާއި ފުރިއިރު ރާޖް ކުމާރު ބޯޓުގައި ހުރި ކަމަށެވެ. އަދި ރޭ ދަންވަރު 1:15 ހާއިރު ބޯޓުގެ ކެޕްޓަންއާ އޭނާ ވާހަކަދެއްކިކަމަށް މިހާތަނަށް ލިބިފައިވާ މައުލޫމާތުން އެނގޭކަމަށްވެސް ފުލުހުން ވިދާޅުވިއެވެ.

ރާޖް ކުމާރު ބޯޓުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލަކާ 8 މޭލަށް ކައިރިވެފައިވަނިކޮށްކަމަށް މައުލޫމާތު ލިބިފައިވާކަމަށެވެ.

އޭނާ ހޯދުމުގެ މަސައްކަތް އެމްއެންޑީއެފްއިން ކުރަމުންދާއިރު ފުލުހުން ދަނީ އޭނާ ގެއްލުނު މައްސަލަ ވަކި މައްސަލައެއްގެ ގޮތުގައި ތަހުޤީޤު ކުރަމުންނެވެ.