ޏ އަލީ ޝަރީފް: ޝާޢިރެއް، އަދީބެއް، ޤާނޫނީ ތަޖުރިބާކާރެއް އަދި އެދުރެއް

މިއަދު ނިޔާވި އަލީ ޝަރީފް އިބްރާހިމް ނުވަތަ ޏ. އަލީ ޝަރީފަކީ ދައުލަތަށް ދިގު މުއްދަތަކަށް ޚިދުމަތް ކުރައްވާފައިވާ ބޭފުޅަކަށްވާއިރު، އޭނާ ވަނީ ޝަރުޢީ ދާއިރާއަށާއި އަދަބީއްޔާތުގެ ދާއިރާއަށް ގިނަ ޚިދުމަތްތަކެއް ކުރައްވާފައެވެ. ޢަލީ ޝަރީފަކީ ދައުލަތުގެ އެކި މަޤާމުތައް އަދާކުރައްވާފައިވާއިރު އޭގެ ތެރޭގައި ޝަރުޢީ ދާއިރާއަށާއި އަދަބީއްޔާތުގެ ދާއިރާ އަދި ތަޢުލީމީ ދާއިރާވެސް ހިމެނެއެވެ.

ޢަލީ ޝަރީފް ތަޢުލީމީ ދާއިރާގައި ކޮށްފައިވާ ޚިދުމަތްތަކަށް ބަލާއިރު، މަޖީދިއްޔާ ސްކޫލުގެ 3 ވަނަ ގްރޭޑުގައި ދިވެހި މުދައްރިއްސެއްގެ މަޤާމާއި އެޑިއުކޭޝަން މިނިސްޓްރީގެ ސުޕަވައިޒަރެއްގެ މަޤާމުވެސް ހިމެނެއެވެ.

ޢަލީ ޝަރީފް ވަނީ ގިނަ ދުވަސްތަކެއް ވަންދެން، ޝަރުޢީ ދާއިރާއަށްވެސް ޚިދުމަތް ކުރައްވާފައެވެ. އެގޮތުން ކުރީގެ ކޯޓު ނަންބަރު 1، ކޯޓު ނަންބަރު 3، ކޯޓު ނަންބަރު 4، ކޯޓު ނަންބަރު 5 އަދި ކޯޓު ނަންބަރު 7 އިތުރުން އަވަސްނިޔާ ކޯޓުގެ ޤާޟީކަން ކުރައްވާފައިވެއެވެ. މީގެ އިތުރުން ޕަބްލިކް ކޮމްޕްލެއިންޓްސް ބިއުރޯގެ ކޮމްޕްލެއިންޓްސް ކޮމިޝަނަރުގެ މަޤާމާއި އިންފޯމޭޝަން މިނިސްޓްރީގެ ޑިރެކްޓަރުގެ މަޤާމުވެސް އަލީ ޝަރީފު ވަނީ އަދާކުރައްވާފައެވެ.

ދައުލަތަށް ގިނަ ދުވަސްތަކެއް ވަންދެން ޚިދުމަތްކުރެއްވި ޢަލީ ޝަރީފަށް ސަރުކާރުން ވަނީ ޅެންވެރިކަމުގެ ރޮނގުން ހިއްވަރު ދިނުމުގެ ޤައުމީ 1981 ވަނަ އަހަރު ދެއްވާފައެވެ. އަލީ ޝަރީފުގެ ޅެންތައް ހިމެނޭ 2 ޅެންފޮތްކަމަށްވާ ބިއްސާވެލި 1 އަދި 2، ސަރުކާރުން ވަނީ ޗާޕުކޮށްގެންވެސް ނެރުއްވާފައެވެ.

ދައުލަތަށް ޚިދުމަތް ކުރުމުގައި 31 އަހަރު ޢަލީ ޝަރީފް ހޭދަކުރައްވާފައިވާއިރު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަލީ ޝަރީފް ސިފަކުރައްވާފައިވަނީ ދިވެހި ބަހުގެ އަދީބެއްގެ އިތުރުން ޝަރުޢީ އަދި ޤާނޫނީ ދާއިރާގައި ތަޖްރިބާކާރު ޚިދުމަތްތެެރިއެއްގެ ގޮތުގައެވެ.