އާންމު މިންގަނޑާ ޚިލާފަށް ކާބޯތަކެތި ތައްޔާރުކުރި ބިދޭސީއަކު ހުއްޓުވައި އިމިގްރޭޝަނުގެ ދަށަށް
-
އިމިގްރޭޝަން ވޮޗަށް ގިނަ އަދަދެއްގެ މައްސަލަ ދަނީ ހުށަހަޅަމުން
-
ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތައް ދަނީ ކުރަމުން
އާންމު މިންގަނޑާ ޚިލާފަށް ކާބޯތަކެތި ތައްޔާރުކުރި ބިދޭސީއަކު ހުއްޓުވައި، އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މައުލޫމާތު ދެއްވާ ގޮތުގައި އިމިގްރޭޝަނަށް ލިބުނު ރިޕޯޓަކާއި ގުޅިގެން ރޭ ޓާސްކުފޯހުން ވަނީ މާލޭގެ ހެންވޭރުގައި ހުންނަ ގެއެއް ބަލައި ފާސްކޮށްފައެވެ. އެ ތަނަކީ އާންމު މިންގަނޑުތަކާއި ޚިލާފަށް ދިވެހި އުފެއްދުންތައް ވިޔަފާރީގެ ބޭނުމަށް ތައްޔާރުކުރަމުންދާ ތަނެއްކަން ފާހަގަކުރެވުނު ކަމަށާއި އެތަނުން، ފިހާރަތަކުން އާންމުކޮށް ލިބެންހުންނަ ގިނަ ބާވަތްތަކުގެ ކާބޯތަކެތި ފެނިފައިވާ ކަމަށް އިމިގްރޭޝަނުން ވުދާޅުވިއެވެ.
މި މައްސަލައިގައި އެތަނުގައި ގަވާއިދާ ޚިލާފަށް މަސައްކަތް ކުރަމުންދިޔަ ބިދޭސީ މީހާ މިހާރު އިމިގްރޭޝަނުގެ ބެލުމުގެ ދަށަށް ގެންގޮސްފައިވާކަމަށްވެސް ވިދާޅުވިއެވެ.
އިމިގްރޭޝަނަށް ލިބުނު ރިޕޯޓަކާއި ގުޅިގެން ރޭ ޓާސްކުފޯހުން ވަނީ މާލޭގެ ހެންވޭރުގައި ހުންނަ ގެއެއް ބަލައި ފާސްކޮށްފައި. މި ތަނަކީ އާންމު މިންގަނޑުތަކާއި ހިލާފަށް ދިވެހި އުފެއްދުންތައް ވިޔަފާރީގެ ބޭނުމަށް ތައްޔާރުކުރަމުންދާ ތަނެއް. އަދި މިތަނުން ވަނީ ފިހާރަތަކުން އާންމުކޮށް… pic.twitter.com/7C4N9yA29C
— Maldives Immigration (@ImmigrationMV) December 17, 2024
"އިމިގްރޭޝަން ވޮޗް"ގެ ނަމުގައި އޮންލައިން ޕްލެޓްފޯމެއް ތަޢާރަފުކުރީ މިއަހަރުގެ ޖުލައިމަހުގެ 17ވަނަ ދުވަހުއެވެ. މިއީ މިހާތަނަށް ބިދޭސީންނާ ގުޅުންހުރި މައްސަލަތައް ރިޕޯޓްކުރުމަށް ޤާއިމުކުރި އެންމެ ހަރުދަނާ އެއްނިޒާމުގެ ގޮތުގައި ސަރުކާރުން ފާހަގަކުރައްވައެވެ.
މޯލްޑިވްސް އިމިގްރޭޝަނުން ވިދާޅުވެފައިވާ ގޮރުތުގައި އިމިގްރޭޝަން ވޮޗަށް ގިނަ އަދަދެއްގެ މައްސަލަތައް ދަނީ ލިބެމުންނެވެ. އެގޮތުން، ނޮވެމްބަރު މަހުގެ ނިޔަލަށް އިމިގްރޭޝަން ވޮޗަށް 1017 މައްސަލަ ހުށައަޅާފައިވާއިރު މީގެތެރޭގައި އެންމެ ގިނައިން ހުށައަޅާފައިވަނީ ބިދޭސީ މަސައްކަތްތެރިން ޤާނޫނާއި ގަވައިދާއި ޚިލާފަށް ވިޔަފާރިކުރާ މައްސަލަތަކެވެ.
އިމިގްރޭޝަން ވޮޗަށް ހުށައަޅާފައިވާ ބައެއް މައްސަލަތައް:
- • މީހުން ގެއްލިގެން ރިޕޯޓްކުރުން
- • ޓޫރިސްޓް ވިސާއާއި ގުޅޭ މައްސަލަތައް
- • ނުކިޔަމަންތެރިވުމުގެ މައްސަލަތައް
- • ކުށްކުރުމުގެ މައްސަލަތައް
- • ވިސާއާއި ގުޅޭ މައްސަލަތައް
- • ޓްރެފިކިންގ މައްސަލަތައް
ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެކެވެ. އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތްވެސް ދަނީ ކުރަމުންނެވެ. އަދި އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަށް ކާބޯތަކެތި ތައްޔާރުކުރާ ތަންތަން ބަލައި ފާސްކުރުމަށް ޚާއްސަ އޮޕަރޭޝަނެއްވެސް ވަނީ ފަށްޓަވާފައެވެ.
ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތުގެ ދަށުން މިހާތަނަށް ގަވާއިދާ ޚިލާފަށް އުޅުނު ފަސް ހާހަށްވުރެ ގިނަ ބިދޭސީން ޑީޕޯޓްކޮށްލާފައިކަމަށް މޯލްޑިވްސް އިމިގްރޭޝަނުން ވަނީ ވިދާޅުވެފައެވެ.
ޤަވާއިދާ ޚިލާފަށް އުޅޭ ބިދޭސީން ހޯދުމަށް ހިންގާ އޮޕަރޭޝަން ރާއްޖޭގެ ހުރިހާ ރަށަކަށް ސަރުކާރުން ވަނީ ފުޅާކޮށްފައެވެ. އަދި ރާއްޖޭގަތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް ބިދޭސީންގެ މައްސަލަތައް 3 އަހަރުގެތެރޭ ޖުމްލަ ޙައްލެއް ގެނައުމަކީވެސް ސަރުކާރުގެ އަމާޒެކެވެ.