އަންނަ ޖެނުއަރީ މަހުގެ 20 ވަނަ ދުވަހު މަޤާމުގެ ހުވައި ކުރެއްވުމުގެ ކުރިން، ޣައްޒާގައި ވެރިކަން ކުރާ ޙަމާސުން ރަހީނުކޮށްފައިވާ ޔަހޫދީން މިނިވަން ނުކޮށްފިނަމަ އެ ޖަމާޢަތަށް މުސީބާތްތައް ކުރިމަތިކުރުވާނެކަމުގެ އިންޒާރު، އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް އަނެއްކާވެސް ދެއްވައިފިއެވެ.
"އެނގިވަޑައިގަންނަވާނެ ފަދައިން، އަޅުގަނޑު ކުރިން ވެސް އިންޒާރު ދިނިން، އެ ތާރީޙްގެ ނިޔަލަށް ރަހީނުކޮށްފައިވާ މީހުން އެނބުރި ގެއަށް ދިޔުމުގެ ފުރުޞަތު ނުދީފިނަމަ ބޮޑެތި މުސީބަތްތައް ކުރިމަތިކުރުވާނެކަމަށް،" ފްލޮރިޑާގެ ޕާމް ބީޗުގައި ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ވިދާޅުވިއެވެ.
އޭގެ ފަހުން ޓްރަމްޕް ވިދާޅުވީ، ވެރިކަމާ ޙަވާލުވެވަޑައިގަތުމުގެ ކުރިން، ޣައްޒާގެ ޙަމަލާތައް ހުއްޓައިލުމަށް އެއްބަސްނުވެއްޖެނަމަ، ނަތީޖާ ހިތި ވާނެ ކަމަށެވެ.
ޔަހޫދީ ދައުލަތުން ބުނާ ގޮތުގައި، ޙަމާސުން ރަހީނުކުރި މީހުންގެ ތެރެއިން 100 އެއްހާ މީހުން އަދިވެސް އެ ޖަމާޢަތުގެ ބެލުމުގެ ދަށުގައި އެބަތިއްބެވެ.
އެމެރިކާގެ މިހާރުގެ ރައީސް ޖޯ ބައިޑެން ވެސް ވަނީ، ޙާއްޞަ ވަފުދެއް ފޮނުއްވައި، ޙަމަލާތައް ހުއްޓައިލުމުގެ އެއްބަސްވުމެއް ޤާއިމުކުރުމުގެ މަސައްކަތް ކުރައްވައިފައެވެ.
މިދިޔަ އަހަރުގެ އޮކްޓޫބަރު މަހުން ފެށިގެން ޔަހޫދީ ދައުލަތުން ޣައްޒާއަށް ދެމުންދާ ޢުދުވާނީ ޙަމަލާތަކުގައި 45،000އަށްވުރެ ގިނަ މީހުން ވަނީ ޝަހީދުކޮށްލާފައެވެ. މުޅި ޣައްޒާހެން ފުނޑުފުނޑު ކޮށްލާފައިވާ އިރު، އެ ސަހަރުގެ ރައްޔިތުން ވަނީ ގެދޮރު ގެއްލި ދާނެ އިތުރު ތަނެއް ނެތި ތާށިވެފައެވެ.