އައްޑޫން މާލެއަށް ދަތުރުކުރަމުންދިޔަ ބޯޓަކުން ބިދޭސީއަކު ގެއްލިގެން ހޯދަނީ

އައްޑޫ ސިޓީން މާލެއަށް ދަތުރުކުރަމުންދިޔަ ބޯޓަކުން ބިދޭސީއަކު ގެއްލިގެން ހޯދަން ފަށައިފިއެވެ.

ދިވެހި ފުލުހުންގެ ޚިދުމަތުން ވިދާޅުވީ "ސީމެކްސް" ނަމަކަށް ކިޔާ ބޯޓުން ގެއްލިގެން ހޯދަމުންދަނީ އެ ބޯޓުގައި ފަޅުވެރިއެއްގެ ގޮތުގައި މަސައްކަތް ކުރަމުން އަންނަ ބިދޭސީއެއް ކަމަށެވެ. އެގޮތުން، ގެއްލިގެން ހޯދަމުންދަނީ ނޭޕާލުގެ ރައްޔިތެއް ކަމަށްވާ ރާޖް ކުމާރެވެ.

އޭނާ ގެއްލިފައިވާކަމުގެ ރިޕޯޓް ފުލުހުންނަށް ލިބިފައިވަނީ ރޭގެ ވަގުތެއްގައިކަމަށް ފުލުހުން ވިދާޅުވެއެވެ.

ފުލުހުން ވިދާޅުވީ ބޯޓު އައްޑޫ ސިޓީން ފުރީ ރޭ 11:30 ހާއިރު ކަމަށާއި ފުރިއިރު ރާޖް ކުމާރު ބޯޓުގައި ހުރި ކަމަށެވެ. އަދި ރޭ ދަންވަރު 1:15 ހާއިރު ބޯޓުގެ ކެޕްޓަންއާ އޭނާ ވާހަކަދެއްކި ކަމަށް މިހާތަނަށް ލިބިފައިވާ މައުލޫމާތުން އެނގޭކަމަށްވެސް ފުލުހުން ވިދާޅުވިއެވެ.

ރާޖް ކުމާރު ބޯޓުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލަކާ 8 މޭލަށް ކައިރިވެފައިވަނިކޮށްކަމަށް މައުލޫމާތު ލިބިފައިވާ ކަމަށެވެ. އޭނާ ހޯދުމުގެ މަސައްކަތް މިހާރު އެމްއެންޑީއެފުން ކުރަމުން އަންނަކަމަށް ފުލުހުން ވިދާޅުވިއެވެ.

މިކަން ފުލުހުންވެސް ގެންދަނީ ތަހުގީގު ކުރަމުންނެވެ.