އިލެކްޝަންސް ކޮމިޝަނުގެ މެންބަރުކަމަށް ޢަބްދުލްހަސީބު އައްޔަންކުރައްވައިފި

އިލެކްޝަންސް ކޮމިޝަންގެ މެންބަރުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޢަބްދުލްހަޞީބު އިސްމާޢީލް އައްޔަންކުރައްވައިފިއެވެ.

އިލެކްޝަންސް ކޮމިޝަނުގެ މެންބަރުގެ މަގާމަށް މިހާރު އެ ކޮމިޝަނުގެ އެސިސްޓެންޓް ޑިރެކްޓަރުގެ މަގާމުގައި ހުންނެވި ޢަބްދުލްޙަސީބް އިސްމާޢީލް އައްޔަން ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވީ އޮކްޓޯބަރު މަހުގެ 14 ވަނަ ދުވަހުއެވެ. އޭނާ އެ މަގާމަށް އައްޔަން ކުރައްވަން މަޖިލީހުން ރުހުން ދެއްވީ މިދިޔަ މަހުގެ 5ވަނަ ދުވަހުއެވެ.

ޢަބްދުލްހަސީބު މެންބަރު ކަމުގެ ހުވާ ކުރެއްވީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްސަ ރަސްމިއްޔާތެއްގައެވެ. ހުވާލައި ދެއްވީ ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރުއެވެ. މި ރަސްމިއްޔާތުގައި މަގާމުގެ ލިޔުން ރައީސުލްޖުމްހޫރިއްޔާ ވަނީ ޢަބްދުލްހަސީބާ ހަވާލުކުރައްވާފައެވެ.

އިލެކްޝަންސް ކޮމިޝަނުގެ މެންބަރުކަމަށް ޢަބްދުލްހަސީބު އައްޔަންކުރެއްވީ އެކޮމިޝަނުގެ ރައީސް ފުވާދު ތައުފީގުގެ މެންބަރުކަމުގެ ދައުރު ހަމާވުމާ ގުޅިގެންނެވެ. ފުވާދުގެ ދައުރު ހަމަވީ މިދިޔަމަހުގެ 23 ވަނަ ދުވަހުއެވެ.

އިލެކްޝަންސް ކޮމިޝަނުގެ އެސިސްޓެންޓް ޑިރެކްޓަރުގެ މަގާމު އަދާކުރެއްވި ޢަބްދުލްޙަސީބު ވަނީ މީގެ ކުރިން މާލީ ވުޒާރާ އާއި އިސްލާމީ ކަންތައްތަކާބެހޭ ވުޒާރާގެ އިސް މަގާމުތަކެއްވެސް ފުރުއްވާފައެވެ. އޭނާ އިލެކްޝަންސް ކޮމިޝަނާ ގުޅިވަޑައިގެންނެވީ 2 ޖެނުއަރީ 2022ގައެވެ.