ރާއްޖޭގެ ވަޒީފާގެ ބާޒާރާ ގުޅޭ ސަރވޭއެއް މާލެ ސަރަޙައްދުގައި ފަށައިފި
-
ސަރވޭ ކުރިއަށްގެންދާނީ މިމަހުގެ 21 ގެ ނިޔަލަށް
-
މާލެ، ވިލިމާލެ އަދި ހުޅުމާލޭގައި ކުރިއަށްގެންދާނެ
ރާއްޖޭގެ ވަޒީފާގެ ބާޒާރާއި ގުޅޭ ސަރވޭއެއް މިއަދުން ފެށިގެން މާލެ ސަރަހައްދުގައި ކުރިއަށްދާނެކަމަށް މޯލްޑިވްސް ސްޓެޓިސްޓިކް ބިއުރޯއިން ވިދާޅުވެއްޖެއެވެ. މި ސަރވޭ ކުރިއަށްދާނީ ޑިސެމްބަރ 15 އިން 21 އަށެވެ.
މި ސަރވޭ ކުރިއަށްގެންދާނީ މާލެ، ވިލިމާލެ އަދި ހުޅުމާލޭގައި ރޭންޑަމްކޮށް ހޮވާލެވޭ ގޭބީސީތަކަށެވެ. މި ސަރވޭއަކީ ރާއްޖޭގެ ވަޒީފާގެ ބާޒާރާއި ގުޅޭ މުހިންމު ތަފާސްހިސާބު އެއްކުރުމަށްޓަކައި ކުރެވޭ މުހިންމު ސަރވޭއެކެވެ. މި ސަރވޭއިން އެއްކުރެވޭ މައުލޫމާތުން މަސައްކަތް ލިބިފައިވާ އާބާދީގެ ނިސްބަތް، މަސައްކަތް ލިބިފައި ނުވާ އާބާދީގެ ނިސްބަތް ފަދަ ވަޒީފާގެ ބާޒާރާއި ގުޅޭ މުހިންމު މައުލޫމާތުތައް ދެނެގަނެވޭނެއެވެ.
ސަރވޭގައި މައުލޫމާތު ނަގާނެ މައިގަނޑު ބައިތައް:
* މީހުންގެ އާންމު މައުލޫމާތު
* ހިޖުރަކުރުން
* ވަޒީފާއާއި އާމްދަނީ ހޯދުމުގެ މަސައްކަތްކުރާ އާބާދީގެ ތަފްސީލް
* އާމްދަނީ ލިބޭ މަސައްކަތް ހޯދާ އަދި ލިބިފައި ނުވާ އާބާދީގެ ތަފްސީލް
* އާމްދަނީ ލިބޭ އަދި ނުލިބޭގޮތުން ކުރާ މަސައްކަތާއި، ގޭތެރޭގެ މަސައްކަތުގައި ވަގުތުހޭދަކުރާ މިންވަރު
* ހިލޭސާބަހަށް ކުރާ މަސައްކަތުގެ ތަފްސީލް
ރާއްޖޭގެ ވަޒީފާގެ ބާޒާރާއި ގުޅޭ ސަރވޭ ނުވަތަ ލޭބަރ ފޯސް ސަރވޭއަކީ ދިވެހިރާއްޖޭގެ ތަފާސްހިސާބު ޤާނޫނުގެ ދަށުން ހުއްދަ ލިބިގެން ކުރާ ސަރވޭއެއްކަމަށް ސްޓެޓިކްސްޓިކް ބިއުރޯއިން ވަނީ ވިދާޅުވެފައެވެ. މި ސަރވޭއިން އެއްކުރެވޭ ވަކިފަރުދެއް ނުވަތަ ގޭބީސީއެއްގެ މައުލޫމާތަކީ ސިއްރެއްގެ ގޮތުގައި ހިފެހެއްޓޭނެ އެއްޗެކެވެ. މި ޤާނޫނުގައި ކަނޑައަޅާފައިވާ ގޮތުން ހުއްދަ ލިބިގެން ސަރުކާރުގެ ބޭނުމަކަށް މައުލޫމާތު އެއްކުރުމުގެ މަސައްކަތުގައިއުޅޭ މީހަކު އެދިއްޖެ ހިނދެއްގައި، ކަނޑައެޅިފައިވާ މުއްދަތެއްގެ ތެރޭގައި ތެދު މައުލޫމާތު ދިނުމަކީ އާންމުންގެ މަސްއޫލިއްޔަތެކެވެ.
މިއީ ގޭބީސީގެ މެންބަރުންގެ އަގުހުރި ވަގުތާއި އެއްބާރުލުން ނިހާޔަތައް ބޭނުންވާ ސަރވޭއެއްކަމުން މި މުހިންމު ޤައުމީ މަސައްކަތުގައި ފުރިހަމައަށް އެއްބާރުލުން ދިނުމަށް ހޭދަކުރާ ވަގުތަކީ ރާއްޖޭގެ ތަފާސްހިސާބު ނިޒާމް ހަރުދަނާކުރުމަށް ވެވޭ ނުހަނު އަގުހުރި ޤައުމީ ޚިދުމަތެއްކަމަށް ސްޓެސްޓިކް ބިއުރޯއިން ވަނީ ވިދާޅުވެފައެވެ.