ޑަބްލިއުޑީސީ މެންބަރުންނަށް މުސާރަދީ، އަންނަ ރޯދަމަހުން ފެށިގެން ރޯދަ އެލަވެންސް ލިބެން ފަށާނެ: ރައީސް

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ގެންނަ އިޞްލާހުތަކާއެކު އަންނަ ރަމަޟާންމަހުން ފެށިގެން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް މުސާރަ ލިބޭގޮތަށް ހަމަޖައްސައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. އެމަނިކުފާނު މި ޔަޤީންކަން ދެއްވީ އދ. ދަނގެތީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުކަމަކީ ދާއިމީ މަޤާމަކަށް ނުވުމުން އެ މެންބަރުންނަށް މިހާރު ލިބެނީ އެލަވެންސެކެވެ. ވުމާއެކު ލޯން ނެގުމަށާއި، އެނޫންވެސް ސަރުކާރުގެ ފެސިލިޓީތަކުން އެފަރާތްތަކަށް ޖާގައެއް ނުލިބެއެވެ. މިއީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ ކަންބޮޑުވުމެކެވެ. އަދި ރަމަޟާންމަހުގެ އެލަވެންސެއްވެސް ނުލިބެއެވެ.

ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅަކީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް އެ މައްސަލަތަކަށް ޙައްލު ގެނެސްދެއްވުމެވެ.

އދ. ދަނގެތީގައި ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ޤާނޫނުގައި މިހާރު އޮތްގޮތުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ ވަރަށް ބޭއިންސާފުން ނިކަމެތިގޮތެއް ހަދާފައިވާ ބައެއްކަމަށެވެ. ނަމަވެސް އެއީ ރަށުގެ ތަރައްޤީގައި ވަރަށް މުހިންމު ދައުރެއް އަދާކުރާ ބައެއްކަމަށާއި، އެހެންކަމުން އެ ކޮމިޓީގެ މެންބަރުންގެ ހުރި މައްސަލަތައް ހައްލުކޮށްދެއްވާނެކަމަށް ވިދާޅުވާ ވާހަކަފުޅު ތަކުރާރުކުރެއްވިއެވެ.

ރައީސް ޑރ. މުޢިއްޒު ވިދާޅުވީ ރައްޔިތުންގެ މަޖިލީހުގެ ކުރިއަށްއޮތް ދައުރުގެ ތެރޭގައި ސަރުކާރުގެ ފަރާތުން އެކަމަށް ބޭނުންވާ އިސްލާޙުތައް ހުށައަޅުއްވާނެކަމަށެވެ. ރައީސް ވިދާޅުވީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރުންނަކީ ފުލްޓައިމް މަސައްކަތްކުރައްވާ، ޒިންމާ ބޮޑު މުހިއްމު މަސައްކަތްތަކެއް ކުރައްވާ ބައެއްކަމަށެވެ. އެހެންކަމުން ޤާނޫނީ އިމުގެ ތެރެއިން އެބޭފުޅުންނަށް ލިބިލައްވާ އެލަވަންސަކީ، މުސާރައެއްގެ ގޮތުގައި ހައްދަވާދެއްވާނެކަމަށް ރައީސް ވިދާޅުވިއެވެ.

މިބަލާއެކު އަންހެނުންގެ ތަރައްޤީއަށް މަސައްކަތްކުރައްވާ ބޭފުޅުންނަށް ރޯދަމަހުގެ އެލަވަންސާއި، ވިހެއުމުން ލިބޭ ޗުއްޓީ ލިބިވަޑައިގަންނަވާނެކަން ފާހަގަކުރައްވާ، އެބޭފުޅުންގެ މުސާރައަކީ ބޭންކުތަކުން ޤަބޫލުކުރާ އެއްޗެއްކަމަށް ވެގެންދާނެކަމަށް ރައީސް ވިދާޅުވިއެވެ.

"ތިބޭފުޅުންނަށް ލޯންތަކަށް ލެއްވުން، އެކި ތަންތަނުން ދޫކުރާ ފެސިލިޓީތަކަށް ފުރުޞަތު ލިބިގެންދިއުން. މިކަންކަން މިހާރު ނުވޭ. އެހެންވީމަ ލާމަރުކަޒީ ޤާނޫނަށް ގެންނަންޖެހޭ އިޞްލާހެއް އެބައޮތް. އަދި ވަޒީފާއާ ބެހޭ ޤާނޫނަށްވެސް އިޞްލާހެއް ގެންނަން އެބައޮތް. އެކަމަށް ދިރާސާކުރަން ވަގުތުކޮޅެއް ނެގީ. ދެން މަޖިލިސް ހުޅުވޭއިރު އިރާދަކުރެއްވިއްޔާ މި އިޞްލާހުތައް ހުށައަޅާދޭނަން ފެބުރުއަރީ މަހު ކުރީކޮޅު. އަދި އެ އިޞްލާހުތައް ގެނެސް މިއަންނަ ރަމަޟާންމަހުން ފެށިގެން ކޮންމެ ރަމަޟާންމަހަކު ޑަބްލިއުޑީސީގެ މެންބަރުންނަށް ރޯދަމހުގެ އެލަވެންސް ދޭނެކަމުގެ ޔަޤީންކަން އަޅުގަނޑު ދެން." ރައީސް ޑރ. މުޢިއްޒު ވިދާޅުވިއެވެ.

ރައީސް ވިދާޅުވީ ރައްޔިތުންނަށް ލިބޭ އެއްޗެއް އަތުނުލައި ރައްޔިތުންނަށް މުއްސަނދިކަން ގެނެސްދިނުމަށް މަސައްކަތްކުރާކަމަށެވެ. އަދި ރާއްޖެ ބަނގުރޫޓުވިޔަ ނުދީ މިކަން ކުރަނީ ފައިސާ ޗާޕުނުކޮށްކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.