"ހުރާ އެކުވެރި ހިޔާ" ހުޅުވުމާއެކު ރަށުގެ އިސްރަށްވެހިން އުފަލުން ފޮޅިފައި

މާލެ އަތޮޅު ހުރާ އިސް ރަށްވެހިންނަށް ޚާއްސަކޮށްގެން ތަރައްޤީކުރި "ހުރާ އެކުވެރި ހިޔާ" ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ހުޅުއްވައިދެއްވައިފިއެވެ. މިއީ ހުރާ ދާއިރާގެ މެންބަރު ޑރ. އަނާރާ ނައީމް ކެމްޕެއިން ދުވަސްވަރުވީ ވައުދާ އެއް ގޮތަށް އެރަށު ދެކުނު ފަރާތުގައި ތަރައްޤީކޮށްފައިވާ ހިޔާއެކެވެ.

"ހުރާ އެކުވެރި ހިޔާ" ހުޅުއްވައިދެއްވުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ހުރާއަށް ވަޑައިގަތުމުން އެރަށުން ވަނީ އެކަމަނާއަށް ހޫނު މަރުހަބާއެއް ކިޔާފައެވެ.

މި ހިޔާއަކީ ހުރާގެ އިސް ރަށްވެހިންނާއި އެކި އުމުރުފުރާ ތަކުގެ މީހުން އެއްތަނަކަށް އެއްވެލައި ވަގުތު ހޭދަކޮށްލުމާއި ކަންކަމުގައި ޝުއޫރު ފާޅުކުރުމުގެ ފުރުޞަތު ދިނުމަށް ހަދާފައިވާ މައިޒާނެކެވެ.

އެކުވެރި ހިޔާ ހުޅުވައިދެއްވުމަށްފަހު ވާހަކަފުޅުދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވަނީ ޑިޖިޓަލް ވަސީލަތްތައް އެކި އުމުރުފުރާތަކުގެ މީހުން ބޭނުންކުރާ މިންވަރާއި އެކަމުގައި ހޭދަކުރާ ވަގުތު މިހާރު އިތުރުވެފައިވާކަމަށެވެ. އޭގެ ބަދަލުގައި އެއްބަޔަކު އަނެއް ބަޔަކާ ދިމާވެ ވާހަކަދައްކައި ކަންކަމުގައި ޚިޔާލު ބަދަލުކުރުން ގިނަ ކުރުމަކީ މުހިއްމު ކަމެއްކަމަށް އެކަމަނާ ވިދާޅުވިއެވެ. އަދި ހުރާގައި މި ހުޅުވުނު އެކުވެރި ހިޔާއަކީ އެކަންކުރުމަށް މުހިއްމު ތަނެއްގެ ގޮތުގައި ރައީސްގެ އަނބިކަނބަލުން ފާހަގަކުރެއްވިއެވެ.

"އަޅުގަނޑުމެންގެ ޖީލު މިއަދު މިވަނީ ވަރަށް ބޮޑަށް ޑިޖިޓަލް ވަސީލަތްތަކާއެކު ވަގުތު ހޭދަކުރަން އާދަވެފައި، މިފަދަ ދުވަސްވަރެއްގައި އެކަކު އަނެކަކާ ބައްދަލުވެ ވާހަކަދައްކައި ޚިޔާލު ބަދަލުކޮށް ހެދުމަކީ ނުހަނު މުހިއްމުކަމެއް" މެޑަމް ސާޖިދާ މުޙައްމަދު ވިދާޅުވިއެވެ.

އެކުވެރި ހިޔާ ހުޅުވުމާއި ގުޅިގެން ދާއިރާގެ މެންބަރު ޑރ. އަނާރާ ނައީމް ވިދާޅުވީ އެރަށަށް ވަޑައިގަންނަވާ ކޮންމެ ފަހަރަކުވެސް އެކި އުމުރުފުރާތަކުގެ މީހުންނާއި އިސްރަށްވެހިން ރަށުގެ އެކި ސަރަޙައްދުތަކުގައި ވަގުތު ހޭދަކުރާތަން ފެންނަ ކަމަށާއި، މިފަދަ ހިޔާ އެއް އަޅަން ގަސްތުކުރެއްވީ އިސްރަށްވެހިންނާއި އެކި އުމުރު ފުރާތަކުގެ މީހުން އެއްތަނަކަށް އެއްވެލައި ވަގުތު ހޭދަކުރުމުގެ ފުރުޞަތު ފަހިކޮށްދިނުމަށް ކަމަށެވެ.

"އަޅުގަނޑު ވާނެ މިތަނަށް ވަރަށް ގިނަ ފޮތްތައް ވެސް ހަދިޔާކޮށްފައި. އުންމީދުކުރަނީ އެކި އުމުރުގެ މީހުންވެސް މިތަނަށް އައިސް ފޮތްތައް ކިޔާލައި، މަޝްވަރާކޮށް އުފާވެރި ވަގުތުތަކެއް ހޭދަކުރާނެކަމަށް" ހުރާ ދާއިރާގެ މެންބަރު އަނާރާ ވިދާޅުވިއެވެ.

މި ހިޔާ ހުޅުވުމާއި ގުޅިގެން ހުރާގެ ބައެއް އިސް ރަށްވެހިން ބުނީ މިއީ އެމީހުންނަށް ލިބިގެންދިޔަ ވަރަށްބޮޑު އުފަލެއްކަމަށާއި ގޭގައި އަބަދު ތިބުމުގެ ބަދަލުގައި އެތަނަށް ގޮސް ވަގުތު ހޭދަކުރަން ފުރުޞަތު ލިބުނީތީ އުފާކުރާކަމަށެވެ.

ޖުމްލަ 23 ދުވަސްތެރޭގައި ހަދާ ނިންމާފައިވާ "ހުރާ އެކުވެރި ހިޔާ"ގައި އެކި އުމުރުފުރާތަކުގެ މީހުންނަށް ކިޔާލެވޭގޮތާށް ފޮތްތަށް ބަހައްޓާފައިވެއެވެ.