ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބޭއްވި "ޓީ10 ވިމެންސް ސްމޭޝް" ގެ ޗެމްޕިއަންކަން ސީބީއެމް އޭ ޓީމުން ހޯދައިފިއެވެ.
މި މުބާރާތުގައި ބައިވެރިވެފައިވަނީ ކްރިކެޓް ބޯޑުގެ ޑިވެލޮޕްމަންޓް ތިން ޓީމެކެވެ. އެއާއެކު މުބާރާތް ކުރިއަށްދިޔައީ ކޮންމެ ޓީމެއް ހަތަރު މެޗު ކުޅުމަށްފަހު, އެންމެ މޮޅު ދެ ޓީމު ފައިނަލް ކުޅޭ ގޮތަށެވެ.
ކުޅިވަރު އެކުވެނީގެ ކްރިކެޓް ދަނޑުގައި މިއަދު ހަވީރު ކުޅުނު ފައިނަލް މެޗުގައި ޓީމު އޭ އާއި ޓީމު ބީ ވާދަކުރިއިރު، މި މެޗު ޓީމު އޭ އިން ކާމިޔާބުކޮށްފައިވަނީ ހަ ލަނޑުންނެވެ. ފައިނަލް މެޗުގެ ގުރުދިމާވުމުން އޭ ޓީމު އެންމެ ފުރަތަމަ ކުޅެން އަރައި 10 އޯވަރު ހަމަވިއިރު ދެ ކުޅުންތެރިން ނުބައިވެގެން ވަނީ 87 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅެފައިވަނީ ނުބައިނުވެ 34 ބޯޅައިން 34 ލަނޑު ހެދި ފާތިމަތު މާހާ އާއި، ނުބައިނުވެ 15 ބޯޅައިން 20 ލަނޑު އެއްކުރި ސުމައްޔާ ހަމީސްއެވެ.
ޖަވާބުގައި ޓީމު ބީ ކުޅެން އަރައި 10 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 82 ލަނޑެވެ. އެ ޓީމުން އެންމެ ރަނގަޅަށް ކުޅެފައިވަނީ 17 ބޯޅައިން 19 ލަނޑު ހެދި މަރިޔަމް ލީން އާއި 25 ބޯޅައިން 18 ލަނޑު އެއްކުރި ޗަތުރަންގި ޖަޔަސޫރިޔާއެވެ. މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ އޭ ޓީމުގެ މާހާއެވެ. އަދި މި މުބާރާތުގެ އެންމެ މޮޅު ކުޅުންތެރިޔާގެ މަގާމު އޭ ޓީމުގެ ފާތިމަތު ޝަޖާ ހޯދިއިރު، އެންމެ މޮޅު އުކުންތެރިޔަކީ އެ ޓީމުގެ މާހާއެވެ.
ސީބީއެމް އިން އިންތިޒާމުކޮށްގެން ބޭއްވި ޓީ10 ވިމެންސް ސްމޭޝް ކާމިޔާބުކަމާއެކު ނިންމާލިއިރު، އެ ބޯޑުން މި ފަހުން ވަނީ މޯލްޑިވްސް ޓީ10 ސްމޭޝްގެ ކުޅުންވެސް ކުރިއަށް ގެންގޮސްފައެވެ. އެ މުބާރާތުގެ ޗެމްޕިއަންކަން ހޯދާފައިވަނީ ސީބީއެލް ސްޕޯޓްސްއިންނެވެ. ކްރިކެޓް ބޯޑުން ދެން ބޭއްވުމަށް ހަމަޖެހިފައިވާ މުބާރާތަކީ މާސްޓާސް ކަޕް 2024 އެވެ. އެ މުބާރާތް ފެށުމަށް ތާވަލުކޮށްފައިވަނީ މި މަހުގެ 20 ވަނަ ދުވަހެވެ.