އޮލިމްޕިކް ކައުންސިލް އޮފް އޭޝިއާ އާއި ޖު-ޖިޓްސޫ އޭޝިއަން ޔޫނިއަން ގުޅިގެން އަބޫ ދާބީގައި ކުރިއަށްގެންދާ ކޯޗަސް އެންޑް ރެފްރީސް ޓްރެއިނިންގ ޕްރޮގްރާމްގައި ރާއްޖޭގެ ޖު ޖިޓްސޫ އެސޯސިއޭޝަންގެ ހަތަރު މެންބަރުން ދަނީ ފުރިހަމަކުރަމުންނެވެ.
މި ޓްރޭނިންގައި ބައިވެރިވުމަށް އަބޫ ދާބީއަށް ދިޔައީ އަޙްމަދު ސިނާން، ޝަހާ ހަސަން، އައިމިނަތު އިބްރާހީމް ޖަލީލް އަދި މުޙައްމަދު އިސާންއެވެ. މި ބައިވެރިން ފުރުމުގެ ކުރިންސްޕޯޓް ކޮމިޝަނަރ މުހައްމަދު ޠަލާލް އާއި މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރާއި، ނައިބު ރައީސް އަހުމަދު އިސްމާއިލް އަދި އަހުމަދު މުންތަގިމް ވަނީ މި ހަތަރު ބައިވެރިންނާއި ބައްދަލުކުރައްވާފައެވެ.
އޮލިމްޕިކް ކައުންސިލް އޮފް އޭޝިއާ (އޯސީއޭ) ގެ އަމާޒަކީ އޭޝިއާ ބައްރުގެ އޮލިމްޕިކް ކޮމިޓީތައް ބާރުވެރިކޮށް ކުޅިވަރު ކުރިއެރުވުމެވެ. އަދި ކޯޗުންގެ ފެންވަރު މަތިކޮށް އެތުލީޓުންގެ ޕާފޯމެންސް ލެވެލް މަތިކުރުމެވެ. އަދި ކުޅިވަރުގެ ނަތީޖާ ރަނގަޅުކުރުމާއި، ސެޓިފައިޑް ފަންނުވެރި ރެފްރީންނާއި ކޯޗުން އުފެއްދުމެވެ.
މިތަމްރީނު ޕްރޮގްރާމްގެ އަނެއް ބޭނުމަކީ މުޅި އޭޝިއާގެ ކޯޗުންނާއި ރެފްރީންގެ ހުނަރުތައް އިތުރުކޮށް ސްޑޭންޑަރޑައިސް ކުރުމާއި، ޕްރޮފެޝަނަލްކަން ކަށަވަރު ކުރުމަށްޓަކައި ސެޓްފިކެޓް ފޯރުކޮށްދިނުމެވެ.
ކޯޗުންނާއި ރެފްރީން ތަމްރީނުކުރުމުގެ މި ޕްރޮގްރާމް ކުރިއަށްދަނީ 11 ޑިސެންބަރުން 15 ޑިސެންބަރުގެ ނިޔަލަށެވެ. މި ތަމްރީނު ޕްރޮގްރާމްގައި ކިޔަވައިދެއްވަނީ ޖުޖިޓްސޫ ބްލެކް ބެލްޓް ހާސިލްކޮށްފައިވާ، މި ކުޅިވަރުގެ 25 އަހަރުގެ ތަޖުރިބާކާރު އަދި 13 އަހަރު ރެފްރީކަން ކޮށްފައިވާ އެލެކްސެންޑްރާ ނަސިމެންޓޯ އެވެ.