ސީ-ޓު-އެއަރ ކާގޯ: 3 ޤައުމަކުން ގެންނަ މުދާ މިހާރު ރާއްޖެއިން އެކްސްޕޯޓްކުރޭ

ސީ-ޓު-އެއަރ ކާގޯގެ ގޮތުގައި ދުނިޔޭގެ 3 ޤައުމަކުން ގެންނަ މުދާ މިހާރު ރާއްޖެއިން އެހެން ޤައުމުތަކަށް އެކްސްޕޯޓްކުރަމުންދާކަމަށް މޯލްޑިވްސް ސްޓޭޓް ޝިޕިން ކުންފުނީގެ މެނޭޖިންގ ޑިރެކްޓަރ އަދި ސީއީއޯ އަޙްމަދު ޝަރީފް ވިދާޅުވެއްޖެއެވެ.

ސީ-ޓު-އެއަރ ކަރގޯ ޚިދުމަތަކީ ރާއްޖެއަށް ކަނޑުމަގުން ގެންނަ މުދާ ރައްކާތެރިކަމާއެކު ބޭނުންވާ މަންޒިލަށް ވައިގެ މަގުން އަވަހަށް ފޯރުކޮށްދިނުމަށް، އެމް.ޕީ.އެލް، އެމްއޭސީއެލް، ކަސްޓަމްސް އަދި އެމްއެސްއެސް ގުޅިގެން ފަށާފައިވާ ޚިދުމަތެކެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެމްއެސްއެސްގެ މެނޭޖިންގ ޑިރެކްޓަރ އަދި ސީއީއޯ އަޙްމަދު ޝަރީފް ވިދާޅުވީ، ސީ-ޓު-އެއަރ ކާގޯގެ ޚިދުމަތަކީ ރާއްޖޭގެ އިޤްތިޞާދު ފުޅާކުރުމުގައި ވަރަށް މުހިންމު ޚިދުމަތެއްކަމަށެވެ. މިއީ އެހެން ޤައުމުތަކުގައިވެސް އިޤްތިޞާދު ފުޅާކުރުމަށްޓަކައި ބޭނުންކުރާ ވަސީލަތެއްކަމަށް އޭނާ ވިދާޅުވިއެވެ.

މި ސަރުކާރުން ރާއްޖޭގައި މުޅިން އައު ޚިދުމަތެއްގެ ގޮތުގައި ސީ-ޓު-އެއަރ ކާގޯގެ ޚިދުމަތް ފެށިއިރު މީގެނަތީޖާ މިހާތަނަށް ވަރަށް ރަނގަޅުކަމަށް އެމްއެސްއެސްގެ މެނޭޖިންގ ޑިރެކްޓަރ ފާހަގަކުރެއްވިއެވެ.

"ފުޅާކުރެވިއްޖިއްޔާ ވަރަށް މުހިންމު ކަމަކަށް ވާނެ ރާއްޖެއަށް އިތުރު ބޭރުފައިސާ ވެއްދުމަށްޓަކައި. މިހާތަނަށްވެސް ނަތީޖާއަށް ބަލާއިރު ވަރަށް ރަނގަޅު އިނގޭތޯ. އަޅުގަނޑުމެން ފުރަތަމަ ފެށީ ޓާކިޝް އެއަރލައިންއާއި އެކީގައި. ހަމައެކަނި ބަނގްލަދޭޝްއިން އެއިރު ގެންނާނީވެސް. ފެށީމަ މިހާރު ރާއްޖެ އަންނަ 11 އެއަރލައިންއަކުން މިކަން ކުރޭ. މިހާރު ބަންގްލަދޭޝްއިން އެކަންޏެއްނޫން އަންނަނީކީ އިންޑިއާއިން ލަންކާއިންވެސް އެބައާދޭ". ޝަރީފް ވިދާޅުވިއެވެ.

ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މެއިމަހު ފެށި މިޚިދުމަތުގެ ތެރެއިން މިހާތަނަށް 3 މިލިޔަނަށްވުރެ ގިނަ އެމެރިކާ ޑޮލަރު ރާއްޖޭގެ އިގުތިސާދުގެ ތެރެއަށް ވަދެފައިވާކަން މީގެ ކުރިން ހާމަކުރައްވާފައެވެ.