ހުވަދުއަތޮޅު ދެކުނުބުރީ ތިނަދޫ ބިންހިއްކެވުމުގެ 3 ވަނަ މަޝްރޫޢުގެ މަސަކަތް ނިމިއްޖެއެވެ.
މިމަހުގެ 1 ވަނަ ދުވަހު، ފަން އޫދް މެރިން އެންޑް ޑްރެޖިންގ ކުންފުންޏާ ޙަވާލުކުރައްވައިގެން ހިންގެވި މި މަޝްރޫގެ ދަށުން، 55 ހެކްޓަރުގެ ބިން ހިއްކާފައި މިވަނީ ކަނޑައަޅާފައިވާ 21 ވަރަކަށް ދުވަހުގެ ތެރޭގައެވެ.
ޕީ.އެސް.އެމް ނިއުސްއާ ވާހަކަދައްކަވަމުން ހައުސިންގ މިނިސްޓަރ ޑރ. މުޙައްމަދު މުޢިޒް ވިދާޅުވީ، މިމަޝްރޫޢުގެ ދަށުން، ތިނަދޫ އުތުރު ފަރާތުން 52 ހެކްޓަރުގެ ބިން، އަދި ދެކުނު ފަރާތު ގިރާ ސަރަޙައްދުން 3 ހެކްޓަރުގެ ބިން ހިއްކަވައި، މިހާރު ނިމިފައިވާ ކަމަށެވެ. މުޢިޒް ވިދާޅުވީ، މާލަސްތަކެއް ނުވެ، ހިއްކި ސަރަޙައްދުގައި ރިވެޓްމެންޓް ޖެހުމުގެ މަސަކަތް ފަން އޫދް މެރިން އެންޑް ޑްރެޖިންގ ކުންފުނިން ފަށާނެ ކަމަށެވެ.
ތިނަދޫގައި އަލަށް ހިއްކަވާ ސަރަޙައްދު ތަރައްޤީކުރައްވާނީ އެރަށަށް ހިޖުރަކުރަން ބޭނުންވާ ފަރާތްތަކަށް ޚާއްޞަކުރައްވައިގެން ކަމަށާއި، ތިނަދުއަށް ހިޖުރަކުރަން ބޭނުންވާ ހުރިހާ ފަރާތްތަކަށް އެފުރުޞަތު އެބަ އޮތްކަމަށް ސަރުކާރުން ވަނީ ހާމަކުރައްވާފައެވެ. ތިނަދޫގައި ދިރިއުޅޭ އެހެން ރަށްރަށުގެ މީހުންނާއެކު، އެރަށުގައި މިހާރު 10،000 އަށްވުރެ ގިނަ މީހުން ދިރިއުޅެއެވެ. ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ތިނަދޫގައި އަޅައި ނިމެމުންދާ 120 ފްލެޓްގެ ތެރެއިން ބައެއް ފްލެޓްތައްވެސް ރަށުން ބޭރު މީހުންނަށްނަށް ވަނީ ޚާއްޞަކޮށްފައެވެ.