ދިވެހި މަސްދޯނިފަހަރުގައި އިންޖީނު އެޅިތާ 50 އަހަރުފުރުން ފާހަގަކުރުމަށް ޚާއްޞަ ފޯރަމެއް

ދިވެހި މަސްދޯނިފަހަރުގައި އިންޖީނު އެޅިތާ 50 އަހަރު ފުރުމުގެ މުނާސަބާއާ ގުޅިގެން، ޚައްޞަ ފޯރަމެއް ބާއްވައިފިއެވެ. އެމްޓީސީސީން އިންތިޒާމުކޮށްގެން ބޭއްވި މި ފޯރަމްގައި ވަނީ ޔަންމާ އިންޖީނާއި، އޮޑިދޯނިފަހަރުގައި ބޭނުންކުރެވޭނެ ފަހުގެ ޓެކްނޮލޮޖީއާބެހޭ މަޢުލޫމާތު ދީފައެވެ. އެ މަޢުލޫމާތު ދީފައިވަނީ ޔަންމާ އޭޝިއާ ސަރަހައްދުގެ މެނޭޖިން ޑައިރެކްޓަރ ޖެކްސަން ޓާންއެވެ.

އޮޑިވެރިން ފޯރަމަކީ ޖަޕާނުގެ ބްރޭންޑެއްކަމަށްވާ ޔަންމާ އިންޖީނު ދިވެހި މަސްދޯންޏެއްގައި އެޅުވިތާ 50 އަހަރު ފުރުމުގެ މުނާސަބާއާ ގުޅުވައިގެން ބޭއްވި ފޯރަމަކެވެ. މި ފޯރަމްގައި ބައިވެރިވެފައިވަނީ އެމްޓީސީސީން ވިއްކާ އިންޖީނު އެޅި އޮޑިފަހަރުގެ އޮޑިވެރިންނެވެ.

ފޯރަމް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ޔަންމާ އޭޝިއާ ސަރަހައްދުގެ މެނޭޖިން ޑައިރެކްޓަރ ޖެކްސަން ޓާން ވިދާޅުވީ ޔަންމާ އިންޖީނެއް ދިވެހި މަސް ދޯންޏެއްގައި އެޅުންވީ، ދިވެހި މަސްވެރިކަމުގެ ސިނާޢަތަށް ބޮޑު ކުރިއެރުމެއް ގެނެސްދިންކަމަކަށް ކަމަށެވެ.

ޓާން ވިދާޅުވީ މި ވޭތުވެދިޔަ 50 އަހަރު ދުވަހުގެ ތެރޭގައި ޔަންމާ ކުންފުނިން ކޮލިޓީ އެތައް އިންޖީނެއް އުފައްދައިފިކަމަށާއި އޭގެ ސަބަބުން ދިވެހި މަސްވެރިކަމަށް އެތައް ކުރިއެރުމެއް ލިބިގެންގޮސްފައިވާކަމަށެވެ.

"އަޅުގަނޑު އުންމީދުކުރަނީ މި ފޯރަމްގެ ސަބަބުން އޮޑިފަހަރުގެ ވެރިންނަށް މާކެޓުގައި މިވަގުތު ހުރި އިންޖީނުތަކާބެހޭ މުހިންމު މަޢުލޫމާތުތަކެއް ލިބޭނެ ކަމަށް." ޓާން ވިދާޅުވިއެވެ.

އެމްޓީސީސީން ވިދާޅުވީ ފޯރަމްގެ ތެރެއިން ބާޒާރުގައި މިހާރު ހުރި އިންޖީނުތަކާއި އެއަށް ދިމާވާ އެކި މައްސަލަތަކާއި އޭގެ ހައްލާ ބެހޭގޮތުން މަޢުލޫމާތު ދީފައިވާ ކަމަށެވެ. އަދި މިފަހުން ޤާއިމްކުރަން ފެށި ލޮނުފެނުން މަސް ފިނުކުރާ ނިޒާމު ހަރުކުރުމާ ބެހޭގޮތުންވެސް މުހިންމު މަޢުލޫމާތުތަކެއް ދީފައިވާކަމަށް އެމްޓީސީސީން ވިދާޅުވިއެވެ.

އެމްޓީސީސީން ވިދާޅުވީ އެ ކުންފުނި މެދުވެރިކޮށް ޔަންމާ އިންޖީނު ދިވެހި އޮޑިފަހަރުގައި އަޅުވަން ފެށިތާ 50 އަހަރު ފުރިފާވާއިރު ކަސްޓަމަރުންނަށް ފަސޭހަކޮށްދިނުމުގެ ގޮތުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ޔަންމާ ބްރޭންޑުގެ ލޮނުފެނުން މަސް ފިނިިކުރާ ނިޒާމް ހަރުކުރެވޭނެ މަގު އޮޑިވެރިންނަށް ފަހިކޮށްދިނުމަށް މަސައްކަތްކުރަމުންދާކަމަށް އެ ކުންފުނިން މަޢުލޫމާތު ދެއްވިއެވެ. އަދި އިންޖީނު މަރާމާތުކުރުމުގައިވެސް ލުއި ފަސޭހަ ގޮތްތައް ހޯދައިދިނުމަށް މަސައްކަތްކުރަމުންއަންނަ ކަމަށްވެސް އެކުންފުނިން މަޢުލޫމާތު ދެއްވައެވެ.


ރާއްޖޭގެ މަސްކަނޑުތަކުގައި އެންމެ ފުރަތަމަ ޔަންމާ އިންޖީނު އެޅި ދޯންޏެއް ބޭލީ 1974 ވަނަ އަހަރުއެވެ. "އުއްމީދު" ނަމަކަށް ކިޔާ ދޯނީގައި އިންޖީނު އެޅުންވެގެންދިޔައީ ދިވެހި މަސްވެރިކަމަށް އުއްމީދު ގެނެސްދިން ދަތުރަކަށެވެ. މި ދަތުރު ވެގެން ދިޔައީ ދިވެހިރާއްޖެ އާއި ޔަންމާ ގުޅުވާލަދިން ދަތުރަކަށެވެ.

1970 ގެ އަހަރުތަކަކީ ދިވެހިން އިންޖީނުލީ އޮޑިފަހާރާއި އެހާ ފަރިތަ ދުވަސްކޮޅަކަށް ނުވުމާއެކު، ޔަންމާ އިންޖީނަށް ދިވެހި މަސްވެރިންގެ ފަރާތުން އެންމެ އެދެވޭ ތަރުޙީބެއް އެންމެ ފުރަތަމަ ކޮޅު ލިބިގެނެއް ނުދިޔައެވެ. ނަމަވެސް ޔަންމާ އިންޖީނުގެ އަވަސްކަމާއި ކުޅަދާނަކަމާއި އެ އިންޖީނުން ލިބިދޭ ގިނަގުނަ ލުއިފަސޭހަތައް ވިސްނުނު ހިސާބުން، ޔަންމާ އިންޖީނުގެ ތަރުހީބު މަސްވެރީންނާއި އޮޑިވެރިން ތެރޭގައި ބޮޑުވާން ފެށިއެވެ. މިއާއެކު ޔަންމާ އިންޖީނުގެ އިތުބާރު މަސްވެރިންނަށް ލިބި، ދިވެހި މަސްވެރިންގެ މެދުގައި މަޤްބޫލު ބްރޭންޑަކަށް ޔަންމާ ވިއެވެ.