ރައްޔިތުންގެ އިތުބާރު ލިބިފައިވާ މީހަކަށް ކޮންމެ ފުލުހެއްވެސް ވާންޖެހޭ: ތަޢުލީމީ ވަޒީރު
-
ވަޒީރު ވަނީ ފުލުހުންކުރާ މަސައްކަތްތަކަށް ތަޢުރީފްކޮށްފައި
-
ފުލުހުންގެ ޚިދުމަތަކީ ވަކި މަރުކަޒެއްގެ ތެރޭގައި ހިފެހެއްޓިފައި އޮންނަ އެއްޗަކަށް ވެެގެން ނުވާނެ
ދިވެހި ފުލުހުންގެ ޚިދުމަތުގައި ޝާމިލްވާ ކޮންމެ ފުލަހަކީވެސް ރައްޔިތުންގެ އިތުބާރު ލިބިފައިވާ މީހަކަށް ވާންޖެހޭކަމަށް ތަޢުލީމީ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ 37 ވަނަ ޕޮލިސް އިނީޝިއަލް ޓްރެއިނިން ކޯހުގެ ދަސްވެނިވެ ހިނގާލުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.
ތަޢުލީމީ ވަޒީރު ޑރ. އިސްމާޢިލް ޝަފީއު ވަނީ ރާއްޖޭގެ 140 އަށްވުރެ ގިނަ ރަށުގައި ރައްޔިތުންނަށް ޚިދުމަތް ކުރުމުގައި ފުލުހުން ތިބިކަން ފާހަގަކުރައްވާފައެވެ. އަދި މުޖުތަމަޢުގައި އެހީތެރިކަމެއް ބޭނުންވެއްޖެ ކޮންމެ ހިނދެއްގައި ދިވެހި ފުލުހުން އެންމެ ކުރީ ސަފުގައި ތިބޭކަން ފާހަގަކުރައްވާ ވަޒީރު ވަނީ ފުލުހުން ކުރާ ކަންކަމަށް ސާބަސްދީ އެގޮތުގައި ތިބުމަށް އެދިވަޑައިގެންފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭނުންފުޅުވަނީ ދިވެހި ޤައުމަކީ ކުރިއަރާފައިވާ، އަމާން އެކުވެރި ރައްޔިތުންތަކެއް އުޅޭ މުޖުތަމަޢުއަކަށް ހަދަންކަން ފާހަގަކުރައްވާ ވަޒިރު ވަނީ އެކަމުގައި އެންމެ އިސްދައުރެއް އަދާކުރެވޭނެ އެއްބަޔަކީ ދިވެހި ފުލުހުންކަމަށް ވިދާޅުވެފައެވެ.
" ކުށް މަދުކުރުން. ރައްޔިތުންނަށް ދިމާވާ އެކިއެކި ކަންކަމުގައި އެހީތެރިކަން ފޯރުކޮށްދިނުން. ޚާއްސަކޮށް އެކިއެކި ކުށްތަކުން ޒުވާނުން، މުޅި މުޖުތަމަޢު ސަލާމަތްކުރުމަށްޓަކައި ކުރެވޭ މަސައްކަތުން މި ދެންނެވި ކަންކަން އިރާދަކުރެއްވިއްޔާ ހާސިލްވެގެންދާނެ. އެހެންކަމުން އަޅުގަނޑު އިލްތިމާސް ކުރާނީ ފުލުހުންގެ ތަމްރީނުން ލިބުނު ހުނަރު ހެޔޮގޮތުގައި ބޭނުންކުރުމަށް." ތަޢުލީމީ ކަންތައްތަކާ ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވިއެވެ.
ވަޒީރު ވިދާޅުވީ ދިވެހި ފުލުހުންގެ ޚިދުމަތަކީ ވަކި މަރުކަޒެއްގެ ތެރޭގައި ހިފެހެއްޓިފައި އޮންނަ އެއްޗަކަށް ވެެގެން ނުވާނެކަމަށެވެ. އޭގެ ބަދަލުގައި ޚިދުމަތުގައި ޝާމިލްވާ ކޮންމެ ފުލުހަކީ މަރުކަޒުން ބޭރުގައާއި އެތެރޭގައިވެސް ކުރާ މަސައްކަތަށް ރައްޔިތުންގެ އިތުބާރު ހޯދައިދިނުމަށް މަސައްކަތް ކުރަންޖެހޭ ބަޔަކަށް ވާންޖެހޭކަމަށެވެ. ޚާއްސަކޮށް ރައްޔިތުންނާ ގުޅުން ހުރި ކަންކަމުގައި މަސައްކަތް ކުރާއިރު އަދުލުވެރިވުމަށާއި ފުލުހުންގެ ޚިދުމަތުގެ އިތުބާރު ގެއްލޭނެ އެއްވެސް ކަމެއް ނުކުރުމަކީ ޢަޒުމަކަށް ވާންޖެހޭކަމަށްވެސް ވަޒީރު ވިދާޅުވިއެވެ. އަދި އެންމެ މީހެއް ކުރާ ކަމަކުން ރައްޔިތުންގެ މެދުގައި ފުލުހުންނަށް އޮންނަ އިތުބާރު ގެއްލިގެން ހިނގައިދާނެކަމަށާއި އެފަދަ ކަމެއް ނުކުރުމަށް ދަސްވެނިންގެ ކިބައިން ތަޢުލީމީ ވަޒީރު ޑރ. އިސްމާޢިލް ޝަފީއު އެދިވަޑައިގަތެވެ.