ރޯދައާ ދިމާކޮށް ތަކެތީގެ އަގު ކޮންޓްރޯލް ކުރުމަށް އެސްޓީއޯއިން މަސައްކަތް ފަށައިފި

ރޯދައާއި ދިމާކޮށް ތަކެތީގެ އަގު އުފުލިގެން ނުދާނެހެން އަގުތައް ކޮންޓްރޯލްކުރުމުގެ މަސައްކަތް އެސްޓީއޯއިން ފަށައިއިފއެވެ.

އެސްޓީއޯއިން އަބަދުވެސް ރޯދައަށް ދުރާލާ ތައްޔާރުވާން ފަށައެވެ. މިގޮތުން އަންނަ އަހަރުގެ ރޯދަމަހަށް ތައްޔާރުވުމުގެ މަސައްކަތް އެކުންފުނިން މިހާރު ފަށާފައިވާއިރު، މިކަމާއި ގުޅޭގޮތުން މަޝްވަރާކުރުމަށް އިޤްތިޞާދީ ވަޒީރު މުހައްމަދު ސަޢީދު ވަނީ އެސްޓީއޯގެ އިސްވެރިންނާއި ބައްދަލު ކުރައްވާފައެވެ.

މި ބައްދަލުވުމާއި ގުޅޭގޮތުން އިޤްތިޞާދީ ވުޒާރާއިން ވިދާޅުވީ، އެސްޓީއޯއާއެކު މަޝްވަރާ ކުރެވުނީ ތަކެތީ އަގު ހިފެހެއްޓުމަށާއި، މެދުނުކެނޑި ރައްޔިތުންނަށް ބޭނުންވާ ޒަރޫރީ ތަކެތި ފޯރުކޮށްދިނުމުގެ އިންތިޒާމުތައް ހަމަޖެއްސުމަށެވެ. އަދި ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅާއި އެއްގޮތަށް މިކަންކަން އިންތިޒާމު ކުރެވިގެންދާނެ ކަމަށް އިޤްތިޞާދީ ވުޒާރާއިން ވިދާޅުވެއެވެ.

ކޮންމެ އަހަރެއްގެ ރޯދަމަހަށް އެސްޓީއޯއިން ތައްޔާރުވެއެވެ. އެގޮތުން ކާޑުގެ ބާވައްތަކުގެ އިތުރުން، ފިޔާ ބިސް އަލުވި ފަދަ ތަކެތީ އަގު އުފުލިގެން ނުގޮސް ހިފެހެއްޓުމަށް، މަސައްކަތްތަކެއް ކުރެއެވެ. މީގެ އިތުރުންވެސް ބާޒާރުގައި އަގު އުފުލޭ އެހެން ބާވަތްތަކުގެ އަގު ކޮންޓްރޯލްކޮށް ވިއްކުމުގެ މަސައްކަތް އެކުންުފުނިން ކުރެއެވެ.

ރޯދަމަހާއި ދިމާކޮށް ކާބޯތަކެތީގެ އަގުހެޔޮކުރައްވާނެ ކަމަށް މީގެކުރިން ރައީސުލްޖުމްހޫރިއްޔާ ވަނީ އިއުލާންކުރައްވާފައެވެ. މިމަސައްކަތު އިތުރުން މިދިޔަ ރޯދަމަހު ސަރުކާރުން ވަނީ ކޮންމެ ގޭބީސީއަކަށް ހިލޭ ކާޑު ބަހާފައެވެ. ނަމަވެސް އަންނަ އަހަރު ރޯދަމަހަށް ކާޑުގެ ބަދަލުގައި މަސްދަޅު ކޭހެއް ކޮންމެ ގޭބީސީއަކަށް ދިނުމަށް ނިންމަވާފައިވާކަން ރައީސުލްޖުމްހޫރިއްޔާ ވަނީ އިއުލާން ކުރައްވާފައެވެ.