ތައިލެންޑުގެ ސަފީރުކަމަށް ފުވާދު އައްޔަންކުރަން މަޖިލީހުން ފާސްކޮށްފި

ދިވެހިރާއްޖޭން ތައިލެންޑަށް ކަނޑައަޅުއްވާ ސަފީރުގެ މަގާމަށް އިލެކްޝަންސް ކޮމިޝަންގެ ކުރީގެ ރައީސް ފުވާދު ތައުފީގު އައްޔަންކުރެއްވުމަށް ރައްޔިތުންގެ މަޖިލީހުން ފާސްކޮށްފިއެވެ.

ދިވެހިރާއްޖޭން ތައިލެންޑަށް ކަނޑައަޅުއްވާ ސަފީރުގެ މަގާމަށް ފުވާދު ތައުފީގު އައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ފޮނުއްވެވީ މިދިޔަ މަހުގެ 25ވަނަ ދުވަހުއެވެ. އެ މަގާމަށް ފުވާދު އައްޔަން ކުރެއްވުމަށް ހުށަހަޅުއްވާފައިވަނީ އިލެކްޝަންސް ކޮމިޝަނުގެ މެންބަރުކަމުގެ މުއްދަތު ހަމަވުމުންނެވެ.

ތައިލެންޑަށް ކަނޑައަޅުއްވާ ސަފީރުގެ މަޤާމަށް ފުވާދު އައްޔަންކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 58 މެންބަރުންގެ ވޯޓާއެކުއެވެ.

ފުވާދު ތައުފީޤު އެންމެ ފުރަތަމަ އިލެކްޝަންސް ކޮމިޝަނާ ގުޅިވަޑައިގަތީ 2008 ވަނަ އަހަރު، ކޮމިޝަންގެ މެންބަރެއްގެ ގޮތުގައެވެ. އެއް އަހަރު ދުވަހު ކޮމިޝަންގެ މެންބަރުކަމުގެ މަޤާމު ފުރުއްވުމަށްފަހު، 2009 ވަނަ އަހަރު ކޮމިޝަންގެ ރައީސްކަމަށް ފުވާދު އައްޔަންކުރެވުނެވެ.

2009 ވަނަ އަހަރުން ފެށިގެން 2014 ވަނަ އަހަރުގެ މާރިޗު މަހާ ހަމައަށް އިލެކްޝަންސް ކޮމިޝަންގެ ރައީސްކަމުގެ މަޤާމު ފުވާދު ފުރުއްވުމަށްފަހު އެކޮމިޝަނުން ވަކިވެވަޑައިގެންނެވިއެވެ. އަދި ދެވަނަ ފަހަރަށް އެ ކޮމިޝަނާ ގުޅިވަޑައިގެންނެވީ 2019ވަނަ އަހަރުއެވެ.

ފުވާދު ވަނީ އިލެކްޝަންސް ކޮމިޝަނުގެ ރައީސްގެ މަގާމުގައި ހުންނަވައިގެން ކާމިޔާބު މަސައްކަތްތަކެއް ކުރައްވާފައެވެ.

ފޮރިން ސަރވިސް ޤާނޫނުގެ ދަށުން ރާއްޖޭން ބޭރު ޤައުމުތަކަށް ސަފީރުން އައްޔަން ކުރައްވަނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ.