މާދަމާއިން ފެށިގެން 4 ރަށަކުން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ: ރައީސް

މާދަމާއިން ފެށިގެން ރާއްޖޭގެ 4 ރަށަކުން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ކޮންމެ އަތޮޅަކުން އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސުމަށް، "ފިއުލް ސްޓޯރޭޖްތައް" ގާއިމްކުރުމުގެ މަޝްރޫޢު އިފްތިތާޙްކޮށްފައިވަނީ މިދިޔަމަހުގެ 7ވަނަ ދުވަހުއެވެ.

ކ.ގާފަރުގައި ބޭއްވި ޖަލްސާގައި ވާހަކަފުޅުދައްކަވަމުން ރައީސުލްޖުމްހުރިއްޔާ ޑރ.މުޙައްމަދު މުޢިއްޒު ވިދާޅުވީ ކުރިން ތާވަލުކޮށްފައިވަނީ އަންނަ އަހަރުތެރޭ ކޮންމެ މަހެއްގައިވެސް ކޮންމެވެސް އަތޮޅެއްގައި ފިއުލް ސްޓޯރޭޖްތައް ގާއިމްކޮށް އަސާސީ ރޭޓުގައި ތެޔޮ ފޯރުކޮށްދިނުން ކަމަށެވެ. އެހެންނަމަވެސް އިތުރު މަސައްކަތްތަކެއް ކުރެވި، ތާވަލަށްވުރެ އަވަހަށް 4 ރަށަކުން އެސްޓީއޯ ރޭޓުގައި މާދަމާއިން ފެށިގެން މަސްވެރިންނަށް ތެޔޮ ލިބޭނެ ކަމަށް އެމަނިކުފާނު ވިދާޅުވިއެވެ.

"ހިންމަފުށި، ކޫއްޑޫ، ފެލިވަރު، އައްޑޫ ސިޓީ ހުޅުމީދޫގެ އެފްއެސްއެމްގެ ސައިޓުތަކުން މާދަމާއިން ފެށިގެން މަސްވެރިންނަށް އެސްޓީއޯ ރޭޓުގައި ތެޔޮ ލިބޭނެ އަދި މީގެއިތުރުން ކޫއްޑޫ އަދި ފެލިވަރުގައި ހުރި މިފްކޯގެ ވެސަލްތަކުންވެސް އެސްޓީއޯ ރޭޓުގައި ތެޔޮ ލިބޭނެ އިންތިޒާމްތައް ހަމަޖެއްސުމުގެ މަސައްކަތްތައް ދަނީ ކުރަމުން،" ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ ފިއުލް ސްޓޯރޭޖްތައް ގާއިމްކުރުމުގެ މަސައްކަތައް އަވަސްކުރުމަށް ޚާއްސަ އިސްކަމެއް ދެއްވާ ކަމަށެވެ. އަދި މަސްވެރިންނަށް އެންމެ ބޭނުންވާ ހިސާބުތަކުގައި ތެޔޮ ލިބޭނެ އިންތިޒާމުތައް އަވަހަށް ހަމަޖައްސާދިނުމަށްވެސް އިސްކަންދެއްވާނެ ކަމަށް ވިދާޅުވިއެވެ.

ތެލަކީ އަސާސީ ޚިދުމަތެއްގެ ގޮތުގައި ކަނޑައަޅައި، ރާއޖޭގެ ކޮންމެ އަތޮޅެއްގައި މަދުވެގެން އެއް ރަށުގައި އެސްޓީއޯ ރޭޓުގައި ރައްޔިތުންނަށް ޕެޓްރޯލާއި ޑީސަލް ލިބޭނެ ފަސޭހަ އިންތިޒާމެއް ހަމަޖެއްސެވުމަކީ ރައީސުލްޖުމްހުރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.

މިމަޝްރޫޢާއެކު މަސްވެރިންނަށާއި އާއްމު ރައްޔިތުންނަށް ހެޔޮ އަގެއްގައި ތެޔޮ ލިބޭނެ އިންތިޒާމު ހަމަޖެހޭނެއެވެ. އެގޮތުން މި މަޝްރޫޢުގެ ދަށުން 19 ރަށެއްގައި މި އިންތިޒާމުތައް ހަމަޖައްސައި 2026ގެ ފެބްރުއަރީގެ ކުރިން މި މަޝްރޫޢުގެ މަސައްކަތް ނިންމުމަށް އެސްޓީއޯއިން ވަނީ ނިންމަވާފައެވެ.