ސޫރިޔާގެ ރައީސް ބައްޝާރް އަލް-އަސަދު މި ވަގުތު ހުންނެވީ ރަޝިޔާގެ ވެރިރަށް މޮސްކޯގައި، ރަޝިޔާ ސަރުކާރުން ޙިމާޔަތް ހޯއްދަވައިގެން ކަން ހާމަވެއްޖެއެވެ. އަސަދާއި އޭނާގެ ޢާއިލާ، ސޫރިޔާ ދޫކޮށް ފިއްލަވައިގެން ވަޑައިގަންނަވާފައި ވަނީ، ހަޔިއަތު ތަޙްރީރް އަލް-ޝާމް (އެޗްޓީއެސް) އަދި އެ ޤައުމުގައި ހަރަކާތްތެރިވާ ހަތިޔާރު އެޅި އެހެން ޖަމާޢަތްތަކުން ނުރައްކާތެރި ޢުދުވާނެއް ފަށައި، ވެރިރަށް ދިމިޝްޤަށް ވެރިވެގަތުމާ އެކުގައެވެ.
ސޫރިޔާ ދޫކޮށް އަސަދު މޮސްކޯއަށް ވަޑައިގަންނަވާފައިވާ ކަން ހާމަކޮށްފައި ވަނީ ރަޝިޔާގެ ޚާރިޖީ ވުޒާރާއިންނެވެ. އަދި، ސުލްޙަވެރިކަމާ އެކު ސޫރިޔާގެ ވެރިކަން ފުރޮޅުމުގެ ފުރުޞަތު ދެއްވަން އޭނާ ނިންމަވާފައިވާ ކަން ވެސް އެ ވުޒާރާއިން އިޢުލާނު ކުރިއެވެ. ހަ ދަހަރަށް ފަހު އަސަދުގެ ވެރިކަން ނިމުމަކަށް އައިސްފައިވާއިރު، އެޗްޓީއެސްގެ ހަނގުރާމަވެރިން ދިމިޝްޤަށް އަރާފައި ވަނީ އެއްވެސް ހުރަހަކާ ނުލައެވެ. ދިމިޝްޤު ދިފާޢު ކުރަން ސޫރިޔާގެ އަސްކަރިއްޔާއިން ހަރުދަނާ ފިޔަވަޅުތަކެއް އަޅާފައި ނުވާ ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ.
އަސަދާއި އޭނާގެ ޢާއިލާގެ މި ވަގުތު ތިއްބެވީ ރަޝިޔާގައި ކަން ފުރަތަމަ ހާމަ ކޮށްފައި ވަނީ ރަޝިޔާގެ މަޞްދަރުތަކުންނެވެ. "ސޫރިޔާގެ ރައީސް އަސަދާއި އޭނާގެ ޢާއިލާ ވަނީ މޮސްކޯއަށް ދަތުރު ކޮށްފައި. އިންސާނިއްޔަތު ކަން އިސްކޮށް ރަޝިޔާއިން ވަނީ އެ ބޭފުޅުންނަށް ޙިމާޔަތް ދީފައި،" ރަޝިޔާގެ އިންޓަރފެކްސް ނޫސް އޭޖެންސީއަށް މަޢުލޫމާތު ދެމުން ރަޝިޔާ ރިޔާސީ ގަނޑުވަރު، ކްރެމްލިންގެ މަޞްދަރުތަކުން ބުންޏެވެ.
ސުލްޙަވެރިކަމާ އެކު ސޫރިޔާގެ ސަރުކާރު ބަދަލުވުމުގެ ފުރުޞަތު ދެއްވަން އަސަދު ނިންމަވާފައިވާ ކަމުގައި ވެސް އެ މަޞްދަރުތަކުން ބުންޏެވެ. އަދި، ސަރުކާރާއި ހަނގުރާމަވެރި ޖަމާޢަތްތަކާ ދެމެދު ބާއްވާ މަޝްވަރާތައް ވިލަރެސް ކުރަން ޖެހޭނީ އދ މެދުވެރިކޮށް ކަމަށް އަސަދު ޤަބޫލު ކުރައްވާ ކަމުގައި ވެސް އިންޓަރފެކްސަށް މަޢުލޫމާތު ދިން މަޞްދަރުތަކުން ބުންޏެވެ.
އަސަދާއި އޭނާގެ ޢާއިލާ މޮސްކޯގައި ތިއްބެވި ކަން، އޮސްޓްރިޔާގައި ހުންނަ ބައިނަލްއަޤުވާމީ ޖަމުޢިއްޔާތަކަށް ރަޝިޔާއިން ކަނޑައަޅާފައި ހުންނަވާ ސަފީރު މިޚައިލް އުލްޔާނޮފް ވެސް ކަށަވަރު ކޮށްދެއްވިއެވެ. "ބައްޝާރް އަލް-އަސަދާއި ޢާއިލާ ތިއްބެވީ މޮސްކޯގައި. އޭގެން ދޭހަކޮށްދެނީ، ދަތި ހާލަތްތަކުގައި ވެސް ރަޝިޔާއިން އެ ޤައުމުގެ އެކުވެރިން ދޫކޮށް ނުލާނެ ކަން،" އޭނާ ވިދާޅުވިއެވެ.
2011ވަަނަ އަހަރު އަސަދުގެ ސަރުކާރާ ދެކޮޅު ޖަމާޢަތްތަކުން ހަތިޔާރު އުފުލުމާ ގުޅިގެން ފެށިގެން ދިޔަ ދާޚިލީ ހަނގުރާމައިގައި އަސަދުގެ ސަރުކާރާއި އަސްކަރިއްޔާއަށް އެންމެ ބޮޑަށް ވާގިވެރިވެދީފައި ވަނީ ރަޝިޔާއާއި އީރާނުންނެވެ. ސޫރިޔާގެ އެކި ކަންކޮޅުތަކުގައި ރަޝިޔާގެ އަސްކަރިއްޔާއިން މިހާރު ވެސް ދަނީ ހަރަކާތްތެރިވަމުންނެވެ. އެ ޤައުމުގައި ރަޝިޔާގެ އަސްކަރީ މަރުކަޒުތައް ވެސް ހުރެއެވެ.
ސޫރިޔާގައި ހުރި ރަޝިޔާގެ އަސްކަރީ މަރުކަޒުތަކާއި ސިފައިންގެ އިތުރުން ޚާރިޖީ އޮފީސްތަކުގެ ސަލާމަތާއި ރައްކާތެރިކަން ކަށަވަރު ކޮށްދިނުމަށް އެޗްޓީއެސްގެ ވެރިން ވަޢުދުވެފައިވާ ކަމުގައި މަޞްދަރުތަކުން ބުންޏެވެ. ނަމަވެސް، ރަޝިޔާގެ އަސްކަރިއްޔާއާ ގުޅުން އޮތް ބްލޮގަރުން ބުނީ، ސޫރިޔާގައި މި ވަގުތު އޮތީ ވަރަށް ހައްސާސް ހާލަތެއް ކަމުގައެވެ. އަދި، ރަޝިޔާގެ އަސްކަރީ މަރުކަޒުތަކުގެ ސަލާމަތާއި ރައްކާތެރިކަން ކަށަވަރު ކުރުމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމުގައެވެ.
ސޫރިޔާގެ ލަތާކިޔާގައި ހުންނަ ޙަމީމީމް ވައިގެ ބަނދަރާއި، ޠަރްޠޫސްގައި ހުންނަ ކަނޑުގެ ސިފައިންގެ މަރުކަޒު ޙިމާޔަތް ކުރަން ރަޝިޔާއިން މިހާރު ދަނީ މަސައްކަތް ކުރަމުންނެވެ. އަދި، އެ ކަމާ ގުޅޭ ގޮތުން ސޫރިޔާގެ ހަނގުރާމަވެރިން ޖަމާޢަތްތަކާ މަޝްވަރާ ކުރަމުންނެވެ. މަސްރަޙު ދިރާސާ ކުރާ ފަރާތްތަކުން ބުނީ، އަސަދުގެ ސަރުކާރު ވެއްޓުމާ އެކު، މެދުއިރުމަތީގައި ހަރަކާތްތެރިވަމުންދާ ރަޝިޔާގެ ސިފައިންނާއި، ޤާއިމު ކޮށްފައިވާ އަސްކަރީ މަރުކަޒުގެ ކުރިމަގާ މެދު ސުވާލު އުފެދިފައިވާ ކަމުގައެވެ.
ރަޝިޔާގެ ދިފާޢީ ވުޒާރާއާ ގުޅުން އޮތް ބްލޮގަރެއް ކަމުގައިވާ ރަޔިބާރް ބުނީ، ޙަމީމީމާއި ޠަރްޠޫސްގައި ހުރި ރަޝިޔާގެ އަސްކަރީ މަރުކަޒުތަކަށް ނުރައްކާތެރި ހާލަތެއް މެދުވެރިވެފައިވާ ކަމުގައެވެ. އަދި، މޮސްކޯއިން އަމުރު ލިބިފައި ނެތުމުން، އަސްކަރީ މަރުކަޒުތައް ދިފާޢު ކުރަން އެ ތަނުގައި ތިބި ސިފައިން ފިޔަވަޅުތަކެއް އަޅާފައި ނުވާ ކަމުގައެވެ. "މެދުއިރުމަތީގައި ރަޝިޔާގެ އަސްކަރިއްޔާއިން ހަރަކާތްތެރިވުމާ މެދު މި ވަނީ ސުވާލު އުފެދިފައި،" ރަޔިބާރް ބުންޏެވެ.
މަސްރަޙު ހޫނުވެ، ސަލާމަތަށް ނުރައްކާވުމާ ގުޅިގެން ޠަރްޠޫސްގައި ބަނދަރު ކޮށްފައިވާ ރަޝިޔާގެ އަސްކަރީ މަނަވަރުތައް، އެ ރަށުގެ އައްސޭރިފަށުގެ ސަރަޙައްދަށް ދަތުރު ކޮށްފައިވާ ކަމުގައި ވެސް މަޞްދަރުތަކުން ބުންޏެވެ. ސޫރިޔާގައި ހަރަކާތްތެރިވާ ކުރުދީ ހަނގުރާމަވެރިން ވަނީ ޙަމީމީމް ވައިގެ ބަނދަރު ކައިރީގައި އޮތް ރަށްތަކަށް އަތްގަދަ ކޮށްފައެވެ. އަދި، ޙުމްޞްގެ ތެޔޮ ވަޅުތަކާއި ތެޔޮ ސާފު ކުރާ ކާރުޚާނާތައް ކައިރީގައި ހަރަކާތްތެރިވަމުން ދިޔަ ރަޝިޔާގެ ސިފައިން ވަށައިލާފައިވާ ކަމުގައި ވެސް މަޞްދަރުތަކުން ބުންޏެވެ. ނަމަވެސް، ރަސްމީ އެއްވެސް އިދާރާއަކުން އެ ކަން ކަށަވަރު ކޮށްދީފައެއް ނެތެވެ.
ނަމަވެސް، ރަޝިޔާގެ ޚާރިޖީ ވުޒާރާއިން ބުނީ ސޫރިޔާގައި ތިބި ރަޝިޔާގެ ސިފައިންނަށް އެއްވެސް ނުރައްކަލެއް އޮތް ކަމަށް ޤަބޫލު ނުކުރާ ކަމުގައެވެ. "ސަލާމަތަށް އެއްވެސް ނުރައްކަލެއް ނެތް. އަސަދާއި ހަތިޔާރު އެޅި ޖަމާޢަތްތައް ތަމްސީލު ކުރާ މީހުންނާ ދެމެދު ދެކެވުނު މަޝްވަރާތަކަށް ފަހު، އަސަދު ވަނީ އިސްތިޢުފާ ދެއްވައި ޤައުމު ދޫކޮށް ވަޑައިގަންނަވާފައި. އަދި، ސުލްޙަވެރިކަމާ އެކު ސަރުކާރު ބަދަލު ކުރުމުގެ ފުރުޞަތު ދިނުމަށް އިރުޝާދު ދެއްވާފައި،" އެ ވުޒާރާއިން ހާމަކުރިއެވެ. ސޫރިޔާގެ ހާލަތު ބަދަލުވި ގޮތާ މެދު ރަޝިޔާއިން ވަނީ ކަންބޮޑުވުން ފާޅުކޮށްފައެވެ.