ރައީސުލްޖުމްހޫރިއްޔާއަށް ގާފަރުން ހޫނު މަރުހަބާއެއް

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކ.ގާފަރަށް ވަޑައިގަތުން އެރަށުން އެމަނިކުފާނަށް ހޫނު މަރުހަބާއެއް ދަންނަވައިފިއެވެ.

ރައީސުލްޖުމްހޫރިއްޔާ ގާފަރަށް ވަޑައިގެންނެވީ އަރިއަތޮޅު އުތުރުބުރީގެ ރަށްތަކަށާއި މާލެ އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިންނެވެ.

ރައީސުލްޖުމްހޫރިއްޔާ ގާފަރަށް ވަޑައިގެންނެވުމުން އެރަށުންވަނީ އެމަނިކުފާނަށް ހޫނު މަރުޙަބާއެއް ދަންނަވާފައެވެ. އެގޮތުން ގާފަރު ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި އެރަށުގެ ގިނަ ޢަދަދެއްގެ ރައްޔިތުންވަނީ ރައީސަށް މަރުޙަބާ ދެންނެވުމަށް ބަނދަރު ސަރަޙައްދަށް އެއްވެފައެވެ.

ރައީސުލްޖުމްހޫރިއްޔާގެ މިދަތުރުފުޅުގެ ތެރެއިން ގާފަރު ކައުންސިލާއި، އަންހެނުންގެ ތަރައްޤީއަށް މަސައްކަތްކުރަ ކޮމިޓީއާއި، ގާފަރުގެ ރައްޔިތުންނާ އަދި އެއަތޮޅު ކާށިދޫ ކައުންސިލާއި، ކާށިދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބޭފުޅުންނާ ބައްދަލުކުރެއްވުމަށްވަނީ ހަމަޖެހިފައެވެ.

ދެދުވަހުގެ މުއްދަތަކަށް އެމަނިކުފާނު ކުރައްވަމުން މިގެންދަވާ ދަތުރުފުޅުގެ ތެރެއިން މިއަދު އިތުރު 2 ރަށަކަށް ވަޑައިގަތުމަށްވަނީ ހަމަޖެހިފައެވެ. އެގޮތުން ގާފަރަށްފަހު އެމަނިކުފާނު ވަޑައިގަތުމަށް ހަމަޖެހިފައިވަނީ ހުރާއަށެވެ. އެއަށްފަހު މިއަދު ހަވީރު ހިންމަފުއްޓަށް ވަޑައިގަތުމަށްވަނީ ހަމަޖެހިފައެވެ. މިދަތުރުފުޅުގެ ތެރެއިން އިއްޔެ އެމަނިކުފާނުވަނީ އަރިއަތޮޅު އުތުރުބުރީ ތޮއްޑޫއަށާއި، ރަސްދޫގެ އިތުރުން މަތިވެރިއަށްވެސް ވަޑައިގަންނަވާފައެވެ.

ރައްޔިތުންނާ ގާތުން ރައްޔިތުންގެ ހާލު ބެއްލެވުމަށް ވަޑައިގަންނަވާނެކަމަށް، ވެވަޑައިގެންފައިވާ ވަޢުދުފުޅުގެ ދަށުން އެމަނިކުފާނު ގެންދަވަނީ ރާއްޖޭގެ އެކި ރަށްރަށަށް ވަޑައިގަންނަވަމުންނެވެ. ދެއަތޮޅަށް ކުރައްވާ މިދަތުރުފުޅު ނިންމަވާލެއްވުމަށްފަހު އެމަނިކުފާނު މާލެ ވަޑައިގަންނަވާނީ މިރޭގެ ވަގުތެއްގައެވެ.