އަންނަ ރަމަޟާން މަހުވެސް ބިލުތަކުން ޑިސްކައުންޓު ދޭނަން: ރައީސް

އަންނަ ރަމަޟާން މަހުވެސް ފެން ބިލާއި ކަރަންޓު ބިލުން ރައްޔިތުންނަށް ޑިސްކައުންޓު ދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މަތިވެރިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރޯދަ މަހު ބޭނުން ކުރާ ފެނާއި ކަރަންޓަށް އާންމު މަސްތަކަށްވުރެ ބިލް ބޮޑުނުވާނެހެން ބިލަށް ޑިސްކައުންޓު ދިނުމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު މިދިޔަ ރޯދަމަހު ނިންމެވިއެވެ. މިއީ ރަމަޟާން މަހެއްގައި މިގޮތަށް ހުރިހާ ރައްޔިތުންނަށް ބިލުތަކުން ޑިސްކައުންޓު ދިން ފުރަތަމަ ފަހަރެވެ.

ރައީސުލްޖުމްހޫރިއްޔާ ވިދާޅުވީ މިދިޔަ ރަމަޟާން މަހާއެއްގޮތަށް އަންނަ ރަމަޟާން މަހުވެސް ފެނާއި ކަރަންޓުން ރައްޔިތުންނަށް ޑިސްކައުންޓު ދެއްވާނެ ކަމަށެވެ. ފެނާއި ކަރަންޓު ބިލުން ޑިސްކައުންޓު ދެއްވުމުގެ އިތުރުންވެސް ރައްޔިތުންނަށް އިތުރު އެހީތެރިކަން ފޯރުކޮށްދެއްވާނެ ކަމަށް ރައީސް ވިދާޅުވިއެވެ.

"ރަމަޟާން މަސް އަންނަ މާގިނަ ދުވަހެއް ނެތް. މިދިޔަ ފަހަރު ދިންހެން. ރާއްޖޭގައި އަލަށް ބިލުތަކުން އަޅުގަނޑުމެން ޑިސްކައުންޓް ދިންހެން އަނެއްކާވެސް އެ ޑިސްކައުންޓް ދޭނަން އިރާދަކުރެއްވިއްޔާ. އަދި އޭގެ އިތުރަށްވެސް އަޅުގަނޑުމެން ވީހާވެސް ގިނަ އެހީތެރިކަން، ވީވަރަކުން ކަންކަމުގައި ޚަރަދުތައް ލުއިކޮށްދީގެން، އާމްދަނީ އިތުރުކުރެވޭނެ ގޮތް އަޅުގަނޑުމެން ހަދާނީ،" ރައީސް ވިދާޅުވިއެވެ.

މިދިޔަ ރަމަޟާން މަހު ސަރުކާރުން ވަނީ ފެން ބިލާއި ކަރަންޓް ބިލުތަކަށް 142 މިލިއަން ރުފިޔާގެ ޑިސްކައުންޓެއް ދެއްވާފައެވެ.

ފެނާއި ކަރަންޓު ބިލުން އަންނަ ރަމަޟާން މަހު ޑިސްކައުންޓު ދިނުމަށް ރައީސުލްޖުމްހޫރިއްޔާ ނިންމަވާފައިވާއިރު ކޮންމެ ގޭބިސީއަކަށް ސަރުކާރުން މަސްދަޅު ކޭހެއް ހަދިޔާކުރެއްވުމަށްވެސް ރައީސް ވަނީ ނިންމަވާފައެވެ. އެގޮތުން މި މަސްދަޅު ކޭސް ދިނުމަށް ވާންޖެހޭ ތައްޔާރީތައް އެސްޓީއޯއިން ވަމުންދާކަން މީގެ ކުރިން ރައީސް ހާމަކުރައްވާފައެވެ.

ސަރުކާރުން ވަނީ މިދިޔަ ރޯދަމަހު ރޯދަ ހަދިޔާގެ ގޮތުގައި ކޮންމެ ގޭބިސީއަކަށް ހަނޑޫ އަދި ފުށް ބަސްތާއެއްވެސް ދީފައެވެ. އެގޮތުން 82،000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދީފައިވެއެވެ.