ސޫރިޔާގެ ރައީސް ބައްޝާރް އަލް-އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދާ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން، ޙުމްޞްގެ ބައެއް ސަރަޙައްދުތަކަށް އަތްގަދަ ކޮށްފިއެވެ. އަސަދުގެ ސަރުކާރާއި އަސްކަރިއްޔާގެ ބާރުގެ ދަށުގައި އޮތް ސަރަޙައްދުތަކަށް އެޗްޓީއެސްގެ ހަނގުރާމަވެރިން ޙަމަލާ ދޭން ފަށާފައި ވަނީ ނޮވެންބަރު 27ވަނަ ދުވަހުއެވެ.
އެޗްޓީއެސްގެ ހަނގުރާމަވެރިންގެ ޙަމަލާތައް ފުރަތަމަ އަމާޒު ކޮށްފައި ވަނީ ހުޅަނގުއުތުރުގައި އޮތް ޙަލަބް ޕުރޮވިންސަށެވެ. އެ ރަށުގެ ދިފާޢުގައި ހަރަކާތްތެރިވަމުން ދިޔަ ސިފައިންނާއި ހަތިޔާރު އެޅި ޖަމާޢަތްތައް ފަހަތަށް ޖެއްސުމަށް ފަހު، އެޗްޓީއެސްގެ ހަނގުރާމަވެރިން ވަނީ އެ ޕުރޮވިންސުގެ ބޮޑު ސަރަޙައްދަކަށް އަތްގަދަ ކޮށްފައެވެ. އޭގެ ތެރޭގައި އެ ޕުރޮވިންސުގެ ވެރިރަށް ޙަލަބް ސިޓީއާއި މައި ވައިގެ ބަނދަރު ވެސް ހިމެނެއެވެ. އެއަށް ފަހު، ހަނގުރާމަވެރިން ވަނީ ޙަމާއަށް ވެސް ވެރިވެގަނެފައެވެ.
އެޗްޓީއެސުން ބުނީ، ޙަމާއަށް ފަހު އެ މީހުންގެ އަމާޒު ހިފާފައި ވަނީ ޙުމްޞް ހިފުމަށް ކަމުގައެވެ. އަދި، އެ ރަށް ދިފާޢު ކުރަން މަސައްކަތް ކުރަމުން ދިޔަ ސޫރިޔާގެ އަސްކަރިއްޔާގެ ސިފައިން ފަހަތަށް ޖެއްސުމަށް ފަހު، އެ ރަށުގެ ރަށްބޭރުގައިވާ ސަރަޙައްދުތަކަށް ވެރިވެގަނެފައިވާނެ ކަމުގައި އެ ގުރޫޕުން ބުންޏެވެ. އެޗްޓީއެސަކީ ނިރުބަވެރި ޖަމާޢަތް، އަލް-ޤަޢިދާއާ ގުޅުން އޮތް ޖަމާޢަތެކެވެ.
ޙުމްޞްގެ އިތުރުން، އުރުދުންގެ ސަރަޙައްދީ ރޮނގު ކައިރީގައި އޮތް ދަރްޢާއަށް ވެސް އަތްގަދަ ކޮށްފައިވާނެ ކަމުގައި އެޗްޓީއެސުން ބުންޏެވެ. އުރުދުނާއި ސޫރިޔާ ގުޅޭ މައި ސަރަޙައްދީ ހުރަހުގެ ކޮންޓުރޯލު ވެސް މި ވަގުތު އޮތީ އެޗްޓީއެސްގެ ދަށުގައެވެ. އެ ރަށް ދިފާޢު ކުރަން ތިބި ސޫރިޔާގެ އަސްކަރިއްޔާގެ ސިފައިންނަށް، ރައްކާތެރިކަމާ އެކު އެ ރަށުން ފައިބައި، ވެރިރަށް ދިމިޝްޤަށް ދަތުރު ކުރުމުގެ ފުރުޞަތު ދީފައިވާނެ ކަމުގައި ވެސް އެ ޖަމާޢަތުން ބުންޏެވެ. ނަމަވެސް، މިނިވަން މަޞްދަރުތަކުން މި ކަން ކަށަވަރު ކޮށްދީފައެއް ނެތެވެ.
މަސްރަޙު ދިރާސާ ކުރާ ފަރާތްތަކުން ބުނީ، އެޗްޓީއެސްގެ ހަނގުރާމަވެރިން ޙުމްޞަށް އަތްގަދަ ކުރުމާ އެކު، އަސަދުގެ ސަރުކާރާއި އަސްކަރިއްޔާއަށް ބޮޑެތި ގެއްލުންތަކެއް ލިބިގެންދާނެ ކަމުގައެވެ. ޙުމްޞަށް ވެރިވެގަތުމާ އެކު، ސޫރިޔާގެ ވެރިރަށް ދިމިޝްޤާއި އެ ޤައުމުގެ އައްސޭރިފަށުގައިވާ ސަރަޙައްދުތަކާ ދެމެދު ދަތުރު ކުރެވެން އޮތް މައި މަގުތައް އެޗްޓީއެސްގެ ބާރުގެ ދަށަށް މި ވަނީ ގޮސްފައެވެ. އަސަދުގެ ސަރުކާރާއި އަސްކަރިއްޔާއަށް ވާގިވެރިވަމުންދާ ރަޝިޔާގެ އަސްކަރިއްޔާގެ ވައިގެ ބަނދަރާއި ކަނޑުގެ ސިފައިންގެ މަރުކަޒު އޮންނަނީ އައްސޭރިފަށުގެ ސަރަޙައްދުގައެވެ.
ސޫރިޔާގެ އަސްކަރިއްޔާއިން ބުނީ، ޙުމްޞްގެ އުތުރުގެ ސަރަަޙައްދުތަކުގައި ދިފާޢީ ފިޔަވަޅުތައް ހަރުދަނާ ކުރަން މަސައްކަތް ކުރަމުންދާ ކަމުގައެވެ. މި ގޮތުން، އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން އެ ސަރަޙައްދުތަކުގައި ހަރަކާތްތެރިވަމުންދާ ކަމަށާއި، ޙުމްޞް ދިފާޢު ކުރުމުގައި އަސްކަރިއްޔާގެ ސިފައިންނަށް އެހީތެރިކަން ފޯރުކޮށްދެމުންދާ ކަމުގައެވެ. ރަޝިޔާގެ އިތުރުން އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން ވެސް ދަނީ އަސަދުގެ ސަރުކާރުގެ ދިފާޢުގައި ކުރަމުންދާ ހަނގުރާމައިގައި ބައިވެރިވެ، އެހީތެރިކަން ފޯރުކޮށްދެމުުންނެވެ. އޭގެ ތެރޭގައި ލުބްނާންގެ މުޖާހިދުންގެ ޖަމާޢަތް، ޙިޒްބުالله ވެސް ހިމެނެއެވެ.
ސޫރިޔާގެ ރައްޔިތުންގެ އިންސާނީ ޙައްޤުތަކުގެ ދިފާޢުގައި ވަކާލާތު ކުރާ ސީރިޔަން އޮބްޒަރވޭޓަރީ ފޯ ހިޔުމަން ރައިޓްސުން ބުނީ، އެޗްޓީއެސްގެ ހަނގުރާމަވެރިން ޙުމްޞަށް ދެމުންދާ ޙަމަލާތަކާ އެކު، އެ ރަށުގައި ދިރިއުޅޭ ޢާންމު ރައްޔިތުންނަށް ނުރައްކާތެރި ހާލަތެއް ކުރިމަތިވެފައިވާ ކަމުގައެވެ. އަދި، ފުރާނައަށް ނުރައްކާވެފައިވާ އެތަކެއް ހާސް ބަޔަކު، އެ ރަށް ދޫކޮށް ރައްކާތެރި ކަމަށް ބެލެވޭ ހިސާބުތަކަށް ދަތުރު ކުރަން ފަށާފައިވާ ކަމުގައެވެ. އޭގެ ތެރެއިން ގިނަ މީހުން ދަތުރު ކުރަމުން ދަނީ މެޑިޓެރޭނިޔަން ކަނޑުގެ އައްސޭރިފަަށުގައި އޮތް އަލް-ލާޒިޤިއްޔާއާއި ޠަރްޠޫސާ ދިމާލަށެވެ. އެއީ، އަސަދުގެ ސިފައިންގެ ބާރުގެ ދަށުގައި އޮތް ސަރަޙައްދުތަކެކެވެ.
ސޫރިޔާގެ އަސްކަރިއްޔާއިން ބުނީ، އެޗްޓީއެސްގެ ހަނގުރާމަވެރިންގެ ޢުދުވާން ހުއްޓުވުމަށް ރަޝިޔާގެ އަސްކަރިއްޔާގެ އެހީތެރިކަމާ އެކު މަސައްކަތް ކުރަމުންދާ ކަމުގައެވެ. އަދި، އެޗްޓީއެސްގެ ހަނގުރާމަވެރިން އަރައިގަނެފައިވާ ސަރަޙައްދުތަކަށް އާޓިލަރީ ބަޑިއާއި، މިސައިލާއި، އަސްކަރީ މަތިންދާބޯޓުތައް ބޭނުން ކޮށްގެން ޙަމަލާ ދެމުންދާ ކަމުގައެވެ.
ސޫރިޔާގެ އިރުމަތީގައި އޮތް ދަޔިރް އަލް-ޛޫރަށް ވެސް ހަނގުރާމަވެރިން ވަނީ އަތްގަދަ ކޮށްފައެވެ. ނަމަވެސް، އެ ރަަށަށް އަރައިގަނެފައި ވަނީ އެމެރިކާއިން ވާގިވެރިވާ ސޫރިޔާއާއި ކުރުދީ ހަނގުރާމަވެރިންގެ ޖަމާޢަތްތަކުންނެވެ. މިއީ ވެސް، އަސަދުގެ ސަރުކާރަށް ލިބުނު ވަރަށް ބޮޑު ނާކާމިޔާބީއެެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަކުރިއެވެ. އެ ސަރަޙައްދުގައި އައިއެސް ޖަމާޢަތާ ގުޅުން އޮތް ނިރުބަވެރިން ހަރަކާތްތެރިވަމުންދާ ކަމުގައި ވެސް މަޞްދަރުތަކުން ބުންޏެވެ. އަސަދާއި ސޫރިޔާގެ އަސްކަރިއްޔާއަށް ޙަލަބާއި ޙަމާގެ ބާރު ގެއްލިފައި މި ވަނީ އެންމެ ހަފުތާއެއްހާ ދުވަހުގެ ތެރޭގައެވެ.
ސޫރިޔާގައި ދާޚިލީ ހަނގުރާމަ ފަށާފައި ވަނީ 2011ވަނަ އަހަރު، އަސަދުގެ ސަރުކާރާ ދެކޮޅަށް އެ ޤައުމުގެ ޢާންމު ރައްޔިތުން ހަތިޔާރު އުފުލުމާ ގުޅިގެންނެވެ. ސީރިޔަން އޮބްޒަރވޭޓަރީ ފޯ ހިޔުމަން ރައިޓްސުން ބުނީ، އެ ހަނގުރާމައިގައި މަރުވެފައިވާ ކަން ކަށަވަރު ކުރެވޭ މީހުންގެ އަދަދު 507,000އަށްވުރެ މައްޗަށް އުފުލިފައިވާ ކަމުގައެވެ. އޭގެ ތެރެއިން 164,000އަކީ ޢާންމު ރައްޔިތުން ކަމުގައި ވެސް އެ ޖަމުޢިއްޔާއިން ބުންޏެވެ. ސޫރިޔާގެ ދާޚިލީ ހަނގުރާމައާ ގުޅިގެން އެތަކެއް މިލިޔަން މީހުންގެ ގެދޮރު ނެތިފައިވާއިރު، ގިނަ އަދަދެއްގެ ބަޔަކު ވަނީ އަމިއްލަ ވަޒަން ދޫކޮށް އެހެން ޤައުމުތަކަށް ހިޖުރަ ކޮށްފައެވެ.