ކެފޭތަކުގެ ހުއްދަ ނޫންތަންތަނުގައި ދުންފަތުގެ އިސްތިއުމާލުކުރާނަމަ ހުއްދަ ބާތިލުކުރެވޭނެ: ސިއްޙަތާ ބެހޭ ވުޒާރާ

ކެފޭ، ރެސްޓޯރެންޓުތަކުގައި ދުންފަތުގެ އިސްތިއުމާލުކުރުމުގެ ހުއްދަ ނޯންނަ ސަރަހައްދުތަކުގައި ދުންފަތުގެ އިސްތިއުމާލުކުރުން ނުހުއްޓުވާނަމަ އެތަނެއްގެ ވިޔަފާރިކުރުމުގެ ހުއްދަ ބާތިލުކުރެވޭނެ ކަމަށް ސިއްޙަތާ ބެހޭ ވުޒާރާއިން ވިދާޅުވެއްޖެއެވެ.

ސިއްޙަތާ ބެހޭ ވުޒާރާއިން މިކަން ހާމަކުރެއްވީ ދުންފަތް ކޮންޓްރޯލްކުރުމަށް ކުރަމުން އަންނަ މަސައްކަތްތަކާ ގުޅޭގޮތުން ނޫސްވެރިންނަށް މައުލޫމާތު ދެއްވުމަށް ބޭއްވި ބައްދަލުވުމެއްގައެވެ.

ރާއްޖޭގައި 2010ވަނަ އަހަރުގެ އޮގަސްޓް މަހުން ފެށިގެން ޢަމަލުކުރަމުން އަންނަ ދުންފަތް ކޮންޓްރޯލް ކުރުމާ ބެހޭ ޤާނޫނުގެ ދަށުން ދުންފަތުގެ އިސްތިއުމާލުނުކުރެވޭނެ ތަންތަން ވަނީ ކަނޑައަޅާފައެވެ. އެފަދަ ތަނެއްގައި ދުންފަތުގެ އިސްތިއުމާލުނުކުރެވޭނެކަން އަންގައި އިންޒާރު ހަރުކޮށްފައި ހުންނަންޖެހޭއިރު އެ އަމަލު ހިންގާ މީހަކު 500 ރުފިޔާއިން ޖޫރިމަނާ ކުރެވޭނެކަމަށް ޤާނޫނުގައި ބުނެއެވެ. ނަމަވެސް ޤާނޫނުގެ މި މާއްދާތައް ތަންފީޒުނުކުރެވޭތީ އެކަމުގެ ކަންބޮޑުވުން ގިނަ ބަޔަކު ފާޅުކުރެއެވެ.

މިކަމާ ގުޅޭގޮތުން ސިއްޙަތާ ބެހޭ ވަޒީރު ޢަބްދުﷲ ނާޒިމް ވިދާޅުވީ ގާނޫނުތައް ތަންފީޒު ކުރުމުގައި ގޮންޖެހުންތަކެއް ހުރި ކަމަށެވެ. މިއީ ހުރިހާ މުއައްސަސާއެއް ގުޅިގެން ހައްލުކުރަންޖެހޭ ކަމެއް ކަމަށާއި މިހާރު ކުރެވެމުންދާ މަސައްކަތްތަކުން އެކަންކަމަށް ހައްލު ލިބޭނެކަމަށް ވަޒީރު ވިދާޅުވިއެވެ.

"މިފަދަ ކޮންމެ ކަމެއް އެންމެ ސެކްޓާއެއް ގުޅިގެން އަޅުގަނޑުމެންނަށް ހާސިލު ނުވާނެކަން އެއީ އެނގޭ ކަމެއް. ކަށަވަރުވާ ކަމެއް. މީގައި ތަންފީޒީ އިދާރާތަކާއި އާންމު މުޖުތަމައުގެ އެއްބާރުލެއްވުމާއި ކޮންމެ ފަރުދަކީމެ މިފަދަ ކަމެއްގައި އެހީތެރިކަން ހުރި ފަރުދެއްކަމުގެ ވިސްނުން މުޅި މުޖުތަމަޢަށް އަޅުގަނޑުމެން ގެންނަން އެބަޖެހޭ." ވަޒީރު ވިދާޅުވިއެވެ.

ހެލްތު ޕްރޮޓެކްޝަން އެޖެންސީގެ ޑެޕިއުޓީ ޑިރެކްޓަރު ހަސަން މުހައްމަދުވެސް ވިދާޅުވީ، ތަންފީޒީ ކަންކަމަކީ އެންމެ ރަނގަޅަށް ނުވާ ކަންކަން ކަމަށް ގަބޫލު ކުރައްވާ ކަމަށާއި އެކަމުގައި އެންމެންގެ އެއްބާރުލުން ބޭނުންވާ ކަމަށެވެ. އަދި ކެފޭ، ރެސްޓޯރެންޓުތަކުގައި ހުއްދަ ނެތް ތަންތަނުގައި ދުންފަތުގެ އިސްތިއުމާލުކުރާނަމަ އެކަމުގައި ތަނުގެ ވެރިފަރާތުގެ ޒިންމާއެއްވާ ކަމަށާއި އެ ބަދަލު ޤާނޫނަށް މިހާރު ގެނެސްފައިވާ ކަމަށެވެ.

އެ ޒިންމާ އަދާނުކުރާ ވިޔަފާރިތަކަށް ފިޔަވަޅު އެޅުމުގެ ގޮތުން ހުއްދަ ބާތިލުކުރެވޭނެ ކަމަށްވެސް ހަސަން ވިދާޅުވިއެވެ.

"މިސާލަކަށް ހެލްތުން އެ ތަނަށް ދޫކޮށްފައި ހުންނަ ހުއްދަ ބާތިލް ކުރުމުގެ ފުރުސަތު އެބައޮތް މިހާރު ގާނޫނުން އަދި އޭގެ އިތުރުން އެވަރުން ވެސް އެތަން އިސްލާހު ނުވެއްޖެނަމަ އެ ތަނަށް ދޫކޮށްފައި އޮތް ވިޔަފާރީގެ ހުއްދަ ވަގުތީ ގޮތުން ހުއްޓުވައި ވަކި ހިސާބަކުން ބާތިލް ވެސް ކުރުމުގެ ފުރުސަތު އެބައޮތް،" އެޗްޕީއޭގެ ޑެޕިއުޓީ ޑިރެކްޓަރު ހަސަން ވިދާޅުވިއެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނެސްފައިވާ އިސްލާހުތަކުގެ ދަށުން މިހާރު ރާއްޖެއަށް ވޭޕުގެ ބާވަތްތައް އެތެރެކުރުން ވަނީ މަނާކޮށްފައެވެ. އަދި މި މަހުގެ 15ވަނަ ދުވަހުން ފެށިގެން އެފަދަ ތަކެތި ބޭނުންކުރުންވެސް މަނާވާނެއެވެ.

އަދި މި އިސްލާހުގެ ދަށުން ދުންފަތް އެކުލެވޭތަކެތި ގަނެ، ވިއްކޭނެ އުމުރު 21 އަހަރަށް ވަނީ ބަދަލުކޮށްފައެވެ.