އެއްވެސް ބޭހަކަށް ދެމުންދިޔަ އާސަންދަ ހުއްޓާނުލަން: އާސަންދަ
-
އާސަންދައިގެ ދަށުން ވިއްކަމުންދާ ބޭހުގެ ލިސްޓު އާސަންދަ ވެބްސައިޓުން ފެންނާނެ
އާސަންދައިގެ ދަށުން އެއްވެސް ބޭހެއް ކަވަރުކުރުން ހުއްޓާނުލާކަމަށް އާސަންދަ ކުންފުނިން ވިދާޅުވެއްޖެއެވެ. އެކުންފުނިން މިހެން ވިދާޅުވެފައިވަނީ ކުރިން އާސަންދައިގެ ދަށުން ލިބެމުންދިޔަ ބައެއް ބޭސްތައް މިހާރު ނުލިބޭކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކުރަމުންދިޔުމާ ގުޅިގެންނެވެ.
އާސަންދަ ކުންފުނިން ވިދާޅުވީ، އާސަންދަ ސްކީމުގެ ދަށުން ދެމުންދިޔަ އެއްވެސް ބޭހެއް ހުއްޓާނުލާކަމަށެވެ. އަދި ކުރިއެކޭ އެއްގޮތަށް މިހާރުވެސް ބޭހަށް ކަވަރޭޖް ލިބޭނެކަމަށް އެކުންފުނިން ވިދާޅުވެއެވެ. އަދި އާސަންދަ ސްކީމްގެ ދަށުން ކަވަރކުރާ ބޭސްތަކުގެ މަޢުލޫމާތު އާސަންދަ ވެބްސައިޓުން ބަލާލެވޭނެކަމަށްވެސް އެކުންފުނިން ވިދާޅުވިއެވެ.
ވެބްސައިޓް ޑައުންލޯޑްސް ލިންކް: https://t.co/fN0SEFktYF pic.twitter.com/4APgEUZk6C
— Aasandha Company Ltd (@AasandhaLtd) December 5, 2024
އާސަންދައިން ވިދާޅުވީ ބަލްކް ޕްރޮކިއުމަންޓް އުސޫލުން ބޭސް ރާއްޖެއަށް ގެނެސް، އާސަންދަ ލިސްޓުގައި ހިމަނައިގެން، މިއަހަރުގެ ތެރޭގައި ދައުރުކުރާ ބޭސްތަކުން އިތުރު އަގެއް ނުނަގާނެކަމަށެވެ. އަދި އާސަންދަ ސްކީމުގެ ދަށުން ކަވަރނުކުރާ ޚިދުމަތަކާއި ގުޅިގެން ދޭ ބޭހެއްނަމަ ކަވަރ ނުކުރާނެކަން އެނގޭނެހެން ބޭސް ސިޓީގައި "ނޮޓް ކަވަރޑް" ލިޔެފައި އޮންނާނެކަމަށްވެސް އެކުންފުނިން ވިދާޅުވިއެވެ. އަދި އާސަންދައިގެ ދަށުން ލިބޭ ބޭހެއް، ސްކީމުގެ ދަށުން ޚިދުމަތްދޭ ބޭސް ފިހާރައަކުން ގަންނަން ޖެހިއްޖެނަމަ އެކަން "ޝިކާވަތި" ޗެޓްލައިން މެދުވެރިކޮށް ރިޕޯޓުކުރުމަށް އާސަންދައިންވަނީ އިލްތިމާސްކުރައްވާފައެވެ.
އާސަންދައިން ދެމުންދާ ޚިދުމަތްތައް ހަރުދަނާކޮށް، ޚިދުމަތުގެ އަގު ދެކޮޅުޖެހޭނެ ނިޒާމަކަށް ހެދުމަށް ބޮޑެތި ބަދަލުތަކެއް އާސަންދަ ނިޒާމަށް ގެނައުމަށްވަނީ ނިންމާފައެވެ. މިގޮތުން މިދިޔަ މަހުގެ ތެރޭގައި އާސަންދަ މެދުވެރިކޮށް ވިއްކަމުންދާ އެންމެ އަގު ބޮޑު 250 ބޭހުގެ އަގުތަކަށްވަނީ ބަދަލުތަކެއް ގެނެސްފައެވެ. އަދި ނިޒާމުގައި ހުރި އިސްރާފުތައް ކުޑަކުރުމަށްވެސް ފިޔަވަޅުތަކެއް އެޅުމަށް ސަރުކާރުންދަނީ މަސައްކަތްކުރަމުންނެވެ.
އާސަންދައިން އަހަރަކު 3 ބިލިއަނާ ގާތްކުރާ ޢަދަދަކަށް ޚަރަދުކުރަމުންދާއިރު، މިޚަރަދުގެ ބޮޑުބައެއް ހޭދަކުރަނީ ބޭސްގަތުމަށްކަމަށް އާސަންދައިން ވިދާޅުވެއެވެ. އެހެންކަމުން ބޭސް އަގުހެޔޮކޮށް ވިއްކުމަށް ބަލްކް ޕްރޮކިއުމަންޓް އުސޫލުން ބޭސް ރާއްޖެ އެތެރެކުރުމުގެ މަސައްކަތް މިހާރުވަނީ ފަށްޓާވާފައެވެ.