ތުޅާދޫ ސްކޫލުގައި "ފޮތްތެރިންގެ ދާލަ" ހުޅުވައިފި

ބ.ތުޅާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން އެރަށު ސްކޫލްގައި ފޮތް ކިޔުމަށް ޚާއްސަ ސަރަޙައްދެއް ޤާއިމުކޮށްފިއެވެ.

ތުޅާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ބުނީ "ފޮތްތެރިންގެ ދާލަ" ނަމުގައި ހުޅުވި މި ރީޑިން ޕާކު ނިންމާ މިހާރުވަނީ ސްކޫލާއި ޙަވާލުކޮށްފައިކަމަށެވެ. މިރީޑިން ޕާކަކީ ދަރިވަރުންނަށް ހަމަޖެހިލައިގެން ފޮތްކިޔާލަން ތިބެވޭނެ މާޙައުލެއް ޤާއިމުކުރުމަށް ތަރައްޤީކުރި ޕާކެއްކަމަށް އެކޮމިޓީން ފާހަގަކުރެއެވެ.

މިތަން ތަރައްޤީކޮށްފައިވަނީ ކުދިންނަށް ފޮތް ކިޔުމާއި، ގްރޫޕް ސްޓަޑީ ހެދުމަށް ތިބެވޭގޮތަށެވެ. އެގޮތުން 3 ބެންޗާއި، އިނގިރޭސި އަދި ދިވެހި ބަހަށް ޚާއްސަ ފޮތްތައް ބަހައްޓާނެ 2 ފޮތް ގެއާއި، ފޮތް ކިޔާލަން ތިބެވޭނެ ފޮތް ހިޔަލައެއް ލަކުޑިން ވަނީ ތައްޔާރުކޮށްފައެވެ.

ތުޅާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީންވަނީ މިރީޑިން ޕާކު އިތުރަށް ތަރައްޤީކުރުމަށް ކޮންމެ އަހަރަކުވެސް މަސައްކަތެއް ކުރުމަށް ނިންމާފައެވެ.