ވޯޓަރ ތީމު ޕާކްގެ މަސައްކަތް އަލުން ފަށަނީ، މިހާރު ކުރިއަށްދަނީ އީއައިއޭ

ހުޅުމާލޭގައި ހަދަން ފަށައި ހުއްޓިފައިވާ ވޯޓާ ތީމް ޕާކު އަލުން ތަރައްޤީކުރަން ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ނިންމަވައިފިއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަ ދައްކަވަމުން އެޗްޑީސީގެ މެނޭޖިން ޑިރެކްޓަރ އިބްރާހީމް ފަޟުލް ރަޝީދު ވަނީ ހުޅުމާލޭގައި ތަރައްޤީކުރާ ވޯޓާ ތީމް ޕާކާއެކު ކުޑަކުދިން ކުޅޭ ސަރަހައްދެއްވެސް ތަރައްޤީކުރުމަށް ނިންމާފައިވާކަން ފާހަގަކުރައްވާފައެވެ. އެގޮތުން ވޯޓަރ ތީމް ޕާކާއި، އެ ޕާކް ހިމެނޭ ސަރަޙައްދު ތަރައްޤީކުރުމުގެ ޕްލޭން ޑިޒައިންކުރުމުގެ މަސައްކަތް ސްރީލަންކާގެ ބަޔަކާއެކު ކުރިއަށްދާ ކަމަށެވެ. މިވަގުތު އެކަމުގެ އީއައިއޭވެސް ކުރިއަށްދާކަން ފާހަގަކުރައްވަމުން ފަޟުލް ވިދާޅުވީ އެ މަސައްކަތް ނިމުމުން ހުޅުމާލެއިން ނަގާ ވެލިން އިތުރަށް ހިއްކައި ތަރައްޤީކުރުމަށް ނިންމާފައިވާކަމަށެވެ. ފަޟުލް ވިދާޅުވީ ކުރިއަށް އޮތް އަހަރެއްހާ ދުވަހުގެތެރޭގައި އެ މަސައްކަތް ފަށައި، އެތަނުގައި އެޑްވެންޗާ ޕާކެއް ވީހާވެސް އަވަހަކަށް ތަރައްގީކުރާނެކަމަށެވެ.

"ވޯޓާ ތީމް ޕާކުގެ މައްސަލައަކީ ދުވަސްވީ އަދި ޒަމާންވީ މައްސަލައެއް، ހުޅުމާލޭގެ ބޮޑު ސަރަހައްދެއް އޭގެ ޒާތުގަ، ނުކުރެވި އޮތް ކަމެއް. އަޅުގަނޑުމެން އެބަ މަސައްކަތް ކުރަން އެތަނުގައި ވޯޓާ ތީމް ޕާކަކާއި ކުޑަ ކުދިން ކުޅޭ ވޯކާޓް ފެސިލިޓީ އަދި އެހެނިހެން ވަސީލަތްތައް ގާއިމުކުރުމަށް." އެޗްޑީސީގެ މެނޭޖިން ޑިރެކްޓަރ އިބްރާހީމް ފަޟުލް ރަޝީދު ވިދާޅުވިއެވެ.

ވޯޓަރ ތީމް ޕާކަކީ 2017 ވަނަ އަހަރު، ގާތްގަނޑަކަށް 35 މިލިއަން ޑޮލަރު (385.5 މިލިއަން ރުފިޔާ) ޚަރަދުކޮށްގެން ކުރިއަށްގެންދަން ނިންމި މަޝްރޫޢުއެކެވެ. މިމަޝްރޫގައި ޕާކުގެ ބައެއް އިމާރާތްތަކުގެ ސްޓްރަކްޗަރަލް މަސައްކަތް ފިޔަވާ މާ ބޮޑު މަސައްކަތެއް ކުރިއަށް ގޮސްފައެއް ނުވެއެވެ. އެ މަސައްކަތް އޭރު ޙަވާލުކޮށްފައިވަނީ ވޯޓަރ ފްރޮންޓް ހޮޓެލް އެންޑް ލޭޝަރ ކުންފުންޏާއެވެ. ނަމަވެސް މަސައްކަތް ކުރިއަށް ނުގޮސް ގިނަ ދުވަސްތަކެއް ވުމުން، އެޗްޑީސީއާއި އެކުންފުންޏާއި ދެމެދު ވެފައިވާ އެއްބަސްވުން އުވާލުމަށް އެޗްޑީސީން ވަނީ ނިންމާފައެވެ.

މި މަޝްރޫޢު ފެށި އިރު އެޗްޑީސީން ވިދާޅުވެފައިވަނީ ވޯޓަރ ތީމް ޕާކު ހަދަމުންދަނީ 50 ކޮޓަރީގެ ހޮޓަލަކާވެސް އެކުގަކަމަށެވެ. އެގޮތުން އެތަނުގައި ސްޕައިރަލް ސްލައިޑްސް، ސްޕީޑް ސްލައިޑްސް އަދި ފެމެލީ ސްލައިޑްސްތަކުގެ އިތުރުން ކުޑަކުދިންގެ ޕޫލަކާއި، ބަމްޕަރ ބޯޓްސް އަދި ވޯޓަރ ހައުސްތަކެއް ޤާއިމުކުރުން ހިމެނެއެވެ. މީގެތުރުން ވޯޓަރ ރޯލާރސް، ވޯޓަރ ގައިރޯ، އަކުއަރ ލޫޕްސް، ފައުންޓެއިން ސްކޮޔަރ އަދި ކޯރެއްވެސް ތަރައްޤީކުރާނެކަމަށް އެޗްޑީސީން ވިދާޅުވެފައިވެއެވެ.