ދެ ޤައުމުގެ ގުޅުން ބަދަހިކުރުމަށް ޗައިނާ ސަފީރު ކުރެއްވި މަސައްކަތްޕުޅަށް ރައީސްގެ ޝުކުރު
-
ދެ ޤައުމުގެ ގުޅުން އިތުރަށް ބަދަހިކުރެއްވުމާ ގުޅޭގޮތުން މަޝްވަރާކުރެއްވި
-
ސަރުކާރުގެ އެއް އަހަރުގެ ކާމިޔާބީއަށް ތައުރީފުކުރެއްވި
ރާއްޖެއާއި ޗައިނާގެ ގުޅުން ބަދަހިކުރެއްވުމަށް ކުރެއްވި މަސައްކަތްޕުޅަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާންގ ލިޒިންއަށް ޝުކުރުއަދާކުރައްވާ ތަޢުރީފު ކުރައްވައިފިއެވެ. ރައީސުލްޖުމްހޫރިއްޔާ ޗައިނާ ސަފީރަށް ޝުކުރު އަދާކުރެއްވީ އެކަމަނާ ރައީސުލްޖުމްހޫރިއްޔާގެ އަރިހަށް، ކުރެއްވި ވަދާޢީ ޒިޔާރަތުގައެވެ.
މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި މިބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވި ވާހަކަފުޅުގައި، ދެޤައުމުގެ ގުޅުން އިތުރަށް ބަދަހިކުރެއްވުމަށް ސަފީރު ކުރައްވަމުން ގެންދަވާ މަސައްކަތްޕުޅުތަކަށް ތަޢުރީފުކުރައްވައި، ސަފީރުގެ ހައިސިއްޔަތުން އެކަމަނާގެ އިސްނެންގެވުމާއެކު ކޮށްދެއްވާފައިވާ އަގުހުރި ޚިދުމަތްތަކަށް ޝުކުރު އަދާކުރެއްވިއެވެ. އަދި ޗައިނާ ސަރުކާރުން ރާއްޖެއަށް ދެއްވަމުން ގެންދަވާ އެއްބާރުލެއްވުމާއި އެހީތެރިކަމަށްވެސް އެމަނިކުފާނު ޝުކުރު އަދާކުރެއްވިއެވެ.
ޗައިނާ ސަފީރު ވަންގ ލިޒިން ދެއްކެވި ވާހަކަފުޅުގައި ރައީސުލްޖުމްހޫރިއްޔާއާއި، އަދުގެ ސަރުކާރުން ދެއްވަމުން ގެންދަވާ އެއްބާރުލެއްވުމާއި އިރުޝާދު، ފާހަގަކުރައްވައި ޝުކުރު އަދާކުރެއްވިއެވެ. އަދި މިސަރުކާރުގެ ވޭތުވެދިޔަ އެއް އަހަރުދުވަހުގެ ތެރޭގައި ހޯއްދަވާފައިވާ ވިލުންތެރި ކާމިޔާބީތަކާއި، ކުރިއެރުންތައް ފާހަގަކުރައްވައި، އެކަންކަމަށް އެކަމަނާ ތަޢުރީފް ކުރެއްވިއެވެ.
މީގެއިތުރުން ދެ ޤައުމުގެ ގުޅުމަކީ އެއްބަޔަކު އަނެއްބަޔަކަށް އިޙްތިރާމްކޮށް، ދެމެހެއްޓެނިވި ރޫޙެއްގައި އެއްބާރުލުން ދީގެން ކުރިއަށްދާ ގުޅުމެއްކަންވެސް ޗައިނާގެ ސަފީރު ފާހަގަކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ އާއި ސަފީރު ދެއްކެވި ވާހަކަފުޅުގައި ޗައިނާގެ އެހީގައި މިހާރު ކުރިއަށްދާ މަޝްރޫއުތަކަށް އަލިއަޅުއްވާލެއްވިއެވެ. އަދި ދެ ޤައުމު ގުޅިގެން މަސައްކަތްކުރެވޭނެ އިތުރު ދާއިރާތަކާގުޅޭގޮތުންވެސް ދެ ބޭފުޅުން މަޝްވަރާ ކުރެއްވިއެވެ.
ޗައިނާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގ ލިޒިން، ރައީސުލްޖުމްހޫރިއްޔާގެ އަރިހަށް ކުރެއްވި މި ވަދާޢީ ޒިޔާރަތް ނިންމަވާލައްވަމުން، ކުރިއަށް އޮތް ދުވަސްތަކުގައި ދިވެހިރާއްޖެއާއި ޗައިނާގެ ގުޅުން އަދިވެސް އިތުރަށް ބަދަހިވެގެންދާނެކަމަށް ޔަޤީންކުރައްވާކަމުގައި ދެ ބޭފުޅުން ވަނީ ވިދާޅުވެފައެވެ.