ރައްޔިތުންގެ ފުރިހަމަ އިތުބާރު ލިބޭނީ މައްސަލަތައް ތަހުޤީޤުކުރުމުގައި ތަފާތުކުރުމެއް ނެތްކަން ސާބިތުކޮށްދީގެން: ސީޕީ ޝުޖާޢު
-
ކޮންމެ 14 ދުވަހަކުން އައިއޯ މައްސަލައިގެ އަޕްޑޭޓްތައް މައްސަލަ ނިސްބަތްވާ ފަރާތަށް ދޭގޮތަށް އުސޫލުތައް ހަމަޖެއްސުމަކީ އަމާޒެއް
ރައްޔިތުންގެ ފުރިހަމަ އިތުބާރު ފުލުހުންގެ ތަހުޤީޤުތަކަށް ލިބޭނީ މައްސަލައިގެ ކުޑަ ބޮޑުމިނަށް ބެލުމެއް ނެތި، ހުށަހަޅާ ހުރިހާ މައްސަލައެއްގައިވެސް ނަތީޖާ ނެރެގެންކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.
ކޮމިޝަނަރ އޮފް ޕޮލިސް މިހެން ވިދާޅުވީ، ޕީއެސްއެމް ނިއުސްގެ "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުންނެވެ.
ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ، ވޭތުވެދިޔަ އަހަރުތަކުގައި ފުލުހުންގެ މުޢައްސަސާއަށް ބޮޑެތި ކުރިއެެރުންތަކެއް ލިބިފައިވީނަމަވެސް ހުށަހެޅޭ މައްސަލަތައް އެއޮންނަ އުސޫލުން ކުރިއަށްދާނެކަމަށް ޤަބޫލުނުކުރާ މީހުންވެސް މަދުނޫން ކަމަށެވެ. އަދި މަޤާމާއި ހަވާލުވުމަށްފަހުވެސް، އެކަމުގެ ޝަކުވާތައް ލިބިފައިވާކަމަށް ކޮމިޝަނަރ ވިދާޅުވިއެވެ.
ކޮމިޝަނަރ ވިދާޅުވީ ފުލުހަށް ހުށަހެޅޭ ސީރިއަސް ބޮޑެތި މައްސަލަތަކުގެ ތަހުގީގުތައް ރަނގަޅަށް ކުރިއަށްދާކަމަށާއި ނަމަވެސް ރައްޔިތުންގެ އިތުބާރު ޤާއިމްކުރުމަށް އަދިވެސް ގިނަ މަސައްކަތްތަކެއް ކުރަންޖެހޭކަމަށެވެ.
"މޯލްޑިވްސް ޕޮލިސް ސާވިސްއަށް މިހުށަހެޅޭ ސީރިއަސް މައްސަލަތައް ވަރަށް ރަނގަޅަށް އެބަ ތަހުގީގުކުރެވޭ. އެހެންނަމަވެސް އެއީ ނިސްބަތުން މޯލްޑިވްސް ޕޮލިސް ސާވިސްއަށް ހުށަހެޅޭ މައްސަލަތަކާއި އަޅާބަލާއިރު މަދު އަދަދެއް. އެހެންވީމަ ޚާއްސަ މައްސަލަތަކުގައި ފުލުހުން އެންގޭޖުވާ ގޮތަށް އެބަޖޭ އެންމެ ކުދިކުދި މައްސަލަތަކުގައިވެސް ނަތީޖާއެއް އެބެޖެހޭ ނެރެވެން. އަޅުގަނޑުމެން އަމިއްލައަށް އެއީ ކުޑަ މައްސަލައެއް ކަމަށް ދެކިގެން އެއަށް އަންނަ ޝަކުވާތައް މިއީ" ސީޕީ ވިދާޅުވިއެވެ.
ކޮމިޝަނަރ ވިދާޅުވީ ރައްޔިތުންގެ އިތުބާރު ހޯދުމަށް ކުރާ މަސައްކަތުގެ ދަށުން، މައްސަލަ ހުށަހަޅާ ފަރާތާއި ތަހުގީގު ކުރާ އޮފިސަރާއި ދެމެދު އޮންނަ ގުޅުން ރަނގަޅު ކުރުމަށް މަސައްކަތްތަކެއް ކުރައްވަމުންދާކަމަށެވެ.
"އަޅުގަނޑުގެ ތަޞައްވުރެއް އެއީ، ކޮންމެ 14 ދުވަހަކު އެއް ފަހަރު ކޮންމެ އައިއޯއެއްވެސް އެ އައިއޯއެއްގެ އަތުގައި ހުރި މައްސަލަތައް ނިސްބަތްވާ ފަރާތަކާއި ގުޅާލައި، އެ މައްސަލައިގެ އަޕްޑޭޓެއް ނޫނީ ފުލުހުންނަށް ކުރެވިފައި ހުރި މަސައްކަތެއް ކިޔައިދިނުން. މީގަ އެބައޮތް ދެ ފައިދާއެއް" ސީޕީ ވިދާޅުވިއެވެ.
ސީޕީ ވިދާޅުވީ ފުލުހުންނާއި އާއްމުންނާއި ދެމެދު އޮންނަ ގުޅުން ރަނގަޅުވުމުން މައްސަލަތައް އަވަސްވެ، މައްސަލަތައް ނިސްބަތްވާ ފަރާތްތަކަށްވެސް މައްސަލަ ހިންގަމުންދާގޮތް އެނގިގެންދާނެކަމަށެވެ. މިގޮތަށް ބައެއް އަތޮޅުތަކުގައި ޢަމަލުކުރަން ފަށާފައިވީނަމަވެސް، ސީޕީ ވަނީ ތަހުގީގު ކުރާ އޮފިސަރުންގެ ދަތިކަން ހުރިކަން ފާހަގަކުރައްވާފައެވެ. އެގޮތުން ޤާނޫނަށް އައި ބަދަލާއެކު މިހާރު، އޮންނަ ގޮތުން ތަހުގީގުކުރާ އޮފިސަރުން ހުންނަންޖެހޭ ޝަރުތު މަތިވެފައިވާކަމަށް ސީޕީ ވިދާޅުވިއެވެ. އެކަމުގެ ސަބަބުން އޮފިސަރުން ގިނަ އަދަދެއްގެ މައްސަލަ އެއްފަހަރާ ބަލަންޖެހޭކަންވެސް ސީޕީ ފާހަގަކުރެއްވިއެވެ. އަދި އެކަން ހައްލުކުރެއްވުމަށް އިންވެސްޓިގޭޓިވް އޮފިސަރުން ތަމްރީންކުރައްވަމުން ގެންދަވާކަން ސީޕީ ފާހަގަކުރެއްވިއެވެ.