"ކަޅުއޮށްފުންމި - ދިވެހި ޤައުމިއްޔަތުގެ ދަރުބާރު" ނައިބު ރައީސް ހުޅުވައިދެއްވައިފި

ދިވެހި ޤައުމިއްޔަތުގެ އިސްވަރުގެ ފުރަތަމަ މަހާސިންތާ، "ކަޅުއޮށްފުންމި - ދިވެހި ޤައުމިއްޔަތުގެ ދަރުބާރު" ފަށައިފިއެވެ. ދިވެހިރާއްޖޭގެ އިސްލާމީ ޔުނިވަރސިޓީގައި ކުރިއަށްދާ މި މަހާސިންތާ ފަށްޓަވައިދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސެއިން މުހައްމަދު ލަތީފް އެވެ.

މި މަހާސިންތާ ނުވަތަ ދަރުބާރަކީ ދިވެހި ޤައުމިއްޔަތުގެ އިސްވަރު ނުވަތަ ޤައުމީއްޔަތު ކޮލެޖުގެ ފަރާތުން ކޮންމެ އަހަރަކު ދެ ފަހަރު ބޭއްވުމަށް ހަމަޖެހިފައިވާ މަހާސިންތާއެވެ. މިއީ ދިވެހި ޤައުމިއްޔަތުގެ އިސްވަރުގެ މަސްއޫލިއްޔަތުތަކާއި ޒިންމާތަކުގެ ތެރޭގައި ހިމެނޭ ދިވެހި ޤައުމިއްޔަތުގެ ޢިލްމު ފެތުރުމުގެ ޒިންމާގެ ދަށުން ބާއްވާ ޢިލްމީ މަހާސިންތާއެކެވެ.

މި މަހާސިންތާ ފެށުމުގެ ރަސްމިއްޔާތުގައި ވާހަކަ ދައްކަވަމުން، ދިވެހިބަހާ ސަޤާފަތާއި ތަރިކައާއިބެހޭ ވަޒީރު އާދަމް ނަޞީރު އިބްރާހީމް ވިދާޅުވީ، މިއީ ދިވެހި ވަންތަކަމާއި ދިވެހިންގެ ތާރީޚުގެ މައްޗަށް ޢިލްމީ ނަޒަރަކުން ވިސްނާ ފިކުރު ހިންގުމުގެ ފެށުމެއް ކަމަށެވެ.

"މި ފެށޭ ޤައުމިއްޔަތުގެ ދަރުބާރަކީ، އިރާދަކުރެއްވިއްޔާ ދިވެހިންގެ އަމިއްލަވަންތަކަމާއި ދިވެހިންގެ ތާރީހާއި، ދިވެހިންގެ ތަރިކައާއި ދިވެހިންގެ އަސްލުތަކުގެ މައްޗަށް ޢިލްމީ ނަޒަރަކުން ވިސްނާ ފިކުރު ހިންގުމުގެ ފެށުމެއް. އަދި އެކަން ދާއިމީ ގޮތެއްގައި ދެމެހެއްޓުމުގެ ފެށުމެއް. މިއީ ކުރިންވެސް ހިންގާ ކަމެއް. އެކަމަކު މިއީ އަހަރެއްގެ ތެރެއިން ރާވަލެވިގެން ވަކި ތަރުތީބަކުން ޢިލްމީ ވިސްނުމެއްގެ ތެރެއިން ފެށޭ ފެށުމެއް" ވަޒީރު އާދަމް ނަޞީރު ވިދާޅުވިއެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަތީފަށް ދިވެހި ޤައުމިޔަތުގެ ދަރުބާރުގެ ރަމްޒު ވަނީ އަރުވާފައެވެ. މި ރަމްޒު ނައިބު ރައީސަށް އެރުވީ ދިވެހިބަހާ ސަޤާފަތާއި ތަރިކައާއިބެހޭ ވަޒީރުއެވެ.

އާންމުކޮށް ހުޅުވާލައިގެން ކުރިއަށް ގެންދާ، މި މަހާސިންތާއަކީ މިއަހަރުގެ ހުޅަނގު މޫސުމުގެ ދޮށަ ނަކަތުގެ، ޢިލްމީ ދަރުބާރެވެ. ތިން ދަންފަޅިއަކަށް ބަހާލައިގެން ކުރިއަށް ގެންދާ މި ދަރުބާރުގައި އެކި ދާއިރާތަކުގެ ޢިލްމީ ތަޖުރިބާކާރުން ބައިވެރިވެވަޑައިގެންނެވުމަށް ވަނީ ހަމަޖެހިފައެވެ.

މި ޢިލްމީ ދަރުބާރުގެ މަޤްޞަދުތަކުގެ ތެރޭގައި، ދިވެހިވަންތަކަމުގެ ދާއިރާގައި ޙަރަކާތްތެރިވާ ބައިވެރީންގެ މެދުގައި ވިސްނުމާއި ޢިލްމު ހިއްސާކުރުމުގެ މަންސައެއްގެ ގޮތުގައި ދާއިމުވެ އޮތުމާއި، ދިވެހީންގެ ރަށްވެހިކަމާއި ވަޒަންވެރިކަމާއި، ކަނޑުވެރިކަމަށް މަގުފަހިވާނޭ ވިސްނުމާއި ޢިލްމުތައް ދިވެހިރާއްޖެއަށް ވެހިކުރުމަށް ހިތްވަރުދީ ކުރިއެރުވުން ހިމެނެއެވެ.

ދިވެހިރާއްޖޭގެ އިސްލާމީ ޔުނިވަރސިޓީއާއި ދިވެހިބަހާއި ސަގާފަތާއި ތަރިކައާ ބެހޭ ވުޒާރާ ގުޅިގެން ކުރިއަށް ގެންދާ މި ދަރުބާރުގައި، އެކި ދާއިރާތަކުގެ ތަޖުރިބާކާރު ބޭފުޅުންގެ ތަފާތު 9 ޢިލްމީ ކަރުދާހެއް ހުށަހަޅާނެއެވެ. އޭގެ ތެރޭގައި ދިވެހިރާއްޖެއަށް އިސްލާމްދީން ތަޢާރަފުވުމާއި ތަރައްޤީ ވެގެން އައި ގޮތާ ބެހޭ ދިރާސާތަކާއި، ދިވެހިބަސް، ސަގާފަތް އަދި އިހުގެ އިސްލާމީ ފަރުމާތަކާ ބެހޭ ދިރާސީ ހުށަހެޅުންތައް ވެސް ހިމެނެއެވެ. މީގެތެރޭގައި ދިވެހިރާއްޖެ އުފެދިފައިވާ ގޮތުގެ ޢިލްމީ ކަރުދާސްތައް ވެސް މި މަހާސިންތާގެ ބައިވެރިންނާ ޙިއްސާކުރާނެއެވެ.