ޤައުމީ ސަލާމަތާ ގުޅޭގޮތުން ސަރުކާރުގެ ސިޔާސަތަކީ ބޭރުގެ ފަރާތަކުން ރާއްޖެއަށް އަތުވެދާނެ ޓެރަރިސްޓް ޙަމަލާއަކަށް އަސްކަރީގޮތުން ރާއްޖެ އަބަދުވެސް ތައްޔާރީ ޙާލަތެއްގައި އޮތުން ކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ. މިނިސްޓަރ ވިދާޅުވީ އަސްކަރީގޮތުން ވަރުގަދަ ދައުލަތްތަކަށް ޓެރެރިޒަމްގެ ނުރައްކަލާ ކުރިމަތިލާން ޖެހިފައިވާއިރު، އެފަދަ ނުރައްކަލަކުން ރާއްޖެ އިސްތިސްނާވާނެކަމަށް ޤަބޫލުނުކުރައްވާ ކަމަށެވެ.
ފަހަކަށްއައިސް ދީނީގޮތުން ހައްދުފަހަނައަޅާފައިވާ ފަރާތްތަކުގެ ޙަމަލާތަކުގެ ޝިކާރައަކަށް ދުނިޔޭގެ އަސްކަރީގޮތުން އެންމެ މަތީފަންތީގައި ގުނާލެވޭ ޤައުމުތައްވެސް ކުރިމަތިލަމުންދާ މިފަދަ ދަނޑިވަޅެއްގައި، ރާއްޖޭގެ ސިޔާސަތަކީ އެފަދަ ޙަމަލާއަކަށް އަބަދުވެސް ތައްޔާރީ ޙާލަތެއްގައި އޮތުންކަމަށް ޑިފެންސް މިނިސްޓަރ ވިދާޅުވެއްޖެއެވެ. ކައުންޓަރ ޓެރަރިޒަމް ސެންޓަރުގެ ފަރާތުން ވާހަކަފުޅު ދައްކަވަމުން ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވީ ޓެރެރިޒަމްގެ ޙަމަލާތަކުން ރާއްޖެ އިސްތިސްނާ ވެދާނެކަމަށް ބެލެވޭނެ އެއްވެސް ތަނެއް މިހާރު ނެތްކަމަށެވެ. މިހާތަނަށް ލިބިފައިވާ އިންޓެލިޖެންސް މަޢުލޫމާތަށް ރިޢާޔަތްކުރައްވައި ވާހަކަފުޅުދައްކަވަމުން ޑިފެންސް މިނިސްޓަރ ވިދާޅުވީ، ބޭރުގެ އެއްވެސް ފަރާތަކުން ރާއްޖޭގެ ޤައުމީ ސަލާމަތަށް ނުރައްކާވެދާނެ އެއްވެސް ކަމެއް މިހާތަނަށް ފާހަގަކުރެވިފައި ނުވާކަމަށެވެ.
img:http://s4.psmnews.mv/images/660x400/14660710888010.jpg|ޑިފެންސް މިނިސްޓަރ އާދަމް ޝަރީފް- ފޮޓޯ: ޕީއެސްއެމް
ބޭރުގެ އަސްކަރީ ބޮޑެތި ބާރުތަކާ ގުޅިގެން ޓެރެރިޒަމާއި ހައްދުފަހަނައަޅައި ދިއުން ނައްތާލުމަށް މުހިންމު މަސައްކަތްތަކެއް ކުރައްވަމުންދާކަމަށް މިނިސްޓަރ ވިދާޅުވިއެވެ. އެގޮތުން އިންޓެލިޖެންސް މަޢުލޫމާތު ދުވަހުން ދުވަހަށް އެއްކުރައްވަމުން ގެންދަވާކަމަށް ވިދާޅުވިއެވެ.
ދީނީގޮތުން ހައްދުފަހަނައަޅާފައިވާ ޖަމާޢަތްތަކާ ގުޅިގެން ރާއްޖެއިން ހަނގުރާމައަށްދާ މީހުންގެ އަދަދު ނިސްބަތުން މަދުކަން މިނިސްޓަރ ފާހަގަކުރެއްވިއެވެ. އެހެންނަމަވެސް ދީނީ ހައްދުފަހަނައަޅާފައިވާ ފިކުރުތައް ގެންގުޅޭ ފަރާތްތައް ރާއްޖޭގައި އުޅޭކަން މިނިސްޓަރ ފާހަފަކުރެއްވިއެވެ. އެފަދަ ފަރާތްތައް ފާހަގަކޮށް، ފިޔަވަޅުތައް އަޅުއްވައި ރިހެބިލިޓޭޓް ކުރެއްވުމަށްޓަކައި ޚާއްޞަ ޕްރޮގްރާމްތައް ހިންގަވާނެކަމަށް މިނިސްޓަރ ވިދާޅުވިއެވެ.
ދީނީ ގޮތުން ހައްދުފަހަނަ އަޅައިދިއުމުގެ އިތުރުން ރާއްޖޭގައި ސިޔާސީ ގޮތުން ހައްދުފަހަނައަޅައި ދިއުން ހުއްޓުވުމަށްވެސް ކައުންޓަރ ޓެރަރިޒަމް ސެންޓަރުން މަސައްކަތް ކުރައްވަމުން ގެންދަވާނެކަމަށާއި، ޓެރަރިޒަމަށް މަގުފަހިވާ އެއްވެސް ޢަމަލަކަށް ފުރުޞަތު ނުދެއްވާނެކަމަށް މިނިސްޓަރ ވިދާޅުވިއެވެ. ދިވެހިރާއްޖެއަކީ އަބަދުވެސް ހައްދުފަހަނައަޅާފައިވާ ފިކުރުތަކާއި، ޓެރެރިޒަމްގެ ޢަމަލުތަކާ ދެކޮޅަށް ބައިނަލްއަޤުވާމީ މުޖުތަމަޢުގައި ވަކާލާތުކުރަމުން އަންނަ ޤައުމެކެވެ. އަދި ދީނީ މެދުމިނުގެ އުޞޫލުތަކަށް ތާއީދުކޮށް، މެދުމިނުގެ އުޞޫލުތަކަށް ދެމެހެއްޓެވުމަށް ސަރުކާރުން ބޮޑު އިސްކަމެއް ދެއްވައެވެ.