ފަލަސްޠީނުގެ ޣައްޒާގެ މީހުން ދިރިއުޅޭ އިމާރާތަކަށް މިއަދުގެ ހެނދުނުގެ ވަގުތެއްގައި ޔަހޫދީ ދައުލަތުން ދިން ނިރުބަވެރި ހަމަލާއެއްގައި ފަލަސްޠީނުގެ 5 މީހުން ޝަހީދުވެއްޖެއެވެ.
ޣައްޒާގެ ސިއްޙީ އަދި މަދަނީ ދިފާޢީ އިދާރާއިން ބުނީ، އެ ހަމަލާގައި ޝަހީދުވި މީހުންގެ ޢަދަދު އިތުރުވުމުގެ ފުރުޞަތު ވަރަށް ބޮޑު ކަމަށެވެ. އާންމު އުޞޫލުގެ ދަށުން މި ހަމަލާއާ ގުޅިގެން ޔަހޫދީންގެ ނިރުބަވެރި އަސްކަރިއްޔާއިން ރަސްމީ ގޮތުން އެއްވެސް އެއްޗެއް ބުނެފައެއް ނުވެއެވެ.
މިދިޔަ އަހަރު އެމެރިކާ މެދުވެރިވެގެން، ޣައްޒާގައި ހަމަލާ ބަދަލުކުރުން ހުއްޓައިލުމުގެ އެއްބަސްވުމެއް ޤާއިމުކުރެވުނު ނަމަވެސް، ޣައްޒާގައި ވެރިކަންކުރާ ޙަމާސް ޖަމާޢަތުން ހަތިޔާރު ބެހެއްޓުމާއި ޔަހޫދީ ސިފައިން ޣައްޒާއިން ފޭބުމާ ގުޅޭގޮތުން ކުރެވެމުންދާ މަޝްވަރާތަކުގައި ޚިލާފުތައް އުފެދި، އަދިވެސް އެއްބަސްވުމަކާ ހަމައަށް އާދެވިފައެއް ނުވެއެވެ.
މިދިޔަ އަހަރުގެ އޮކްޓޯބަރު ޤާއިމުކުރެވުނު އެއްބަސްވުމާ ޚިލާފަށް ޙަމާސުން އަލުން ހަތިޔާރު އެއްކޮށް، ހަމަލާތައް ދެމުންދާ ކަމަށް ބުނެ، ޔަހޫދީން ވަނީ ޣައްޒާއަށް ދޭ ހަމަލާތައް އިތުރަށް ވަރުގަދަކޮށްފައެވެ.
ނަމަވެސް ޙަމާސުން ވަނީ ހަމަލާތައް ދިނުމާއި ހަތިޔާރު އަލުން އެއްކުރުމަށް މަސައްކަތްކުރާ ކަމަށް ޔަހޫދީން ކުރާ ތުހުމަތުތައް ދޮގުކޮށްފައެވެ. އަދި ޣައްޒާގެ ސުލްޙައިގެ އެއްބަސްވުމަށް ހުރަސްއަޅަމުންދަނީ ޔަހޫދީން ކަމަށް ޙަމާސުން ދަނީ ތަކުރާރުކޮށް ބުނަމުންނެވެ.
ޣައްޒާގެ ސިއްޙީ އިދާރާތަކުން ބުނެފައިވާ ގޮތުގައި، މިދިޔަ އޮކްޓޯބަރު މަހު ހަމަލާތައް ހުއްޓައިލަން އެއްބަސްވި ފަހުންވެސް، ޔަހޫދީން ދެމުންދާ ހަމަލާތަކުގައި މަދުވެގެން 1,400 ފަލަސްޠީނުގެ މީހުން ވަނީ ޝަހީދުވެފައެވެ.
2023 އޮކްޓޫބަރުގައި ޣައްޒާގެ ރައްޔިތުންގެ ނަސްލުހޭދުކުރުމަށް ޔަހޫދީން ފެށި ޤަތުލުޢާންމުގައި މިހާތަނަށް ފަލަސްޠީނުގެ 74،000 އަށްވުރެ ގިނަ މީހުން ޝަހީދުކޮށްލައި، 175،000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ.