ރައްޔިތުންގެ މަޖިލީހަށް ހުށަހެޅިފައިވާ، ދިވެހިރާއްޖޭގެ ކުޅިވަރު ޤާނޫނަށް އިސްލާހު ގެނައުމުގެ ބިލު ފާސްވެގެން އަންނައިރު މޯލްޑިވްސް ޕެރަލިމްޕިކްސް ކޮމިޓީ ޤާނޫނީ ޝަހުސަކަށް ބަދަލުވެގެންދާ ގޮތަށް ގާނޫނަށް އިސްލާހު ގެންނަށް ހުށަހަޅައިފި އެވެ.
މި ބިލަށް އިއްޔެ އޮތް ރައްޔިތުންގެ މަޖިލީހުގެ ޖަލްސާގައި ގިނަ މެންބަރުންތަކެއް ވާހަކަފުޅު ދައްކަވާފައިވާއިރު، ހެންވޭރު އުތުރު ދެކުނު ދާއިރާގެ މެންބަރު ހުސެއިން އިމްރާން ލަތީޕް ވިދާޅުވީ މިކަމަކީ ވަރަށް ފާހަގަކޮށްލަން ޖެހޭ ކަމެއް ކަމަށެވެ.
ވޭތުވެދިޔަ އަހަރުތަކުގައި ރާއްޖޭން ބޭރުގައި ރާއްޖެ ތަމްސީލުކޮށްފައިވާ ޕެރަލިމްޕިކްސް ނުވަތަ ހާއްސަ އެހީއަށް ބޭނުންވާ ކުދިންނަކީ ވަރަށް ބޮޑެތި ކާމިޔާބީތަކެއް ރާއްޖެއަށް ގެނެސްދީފައިވާ ބައެއް ކަަމަށެވެ. އެގޮތުން 2023 ވަނަ އަހަރު ސްޕެޝަލް އޮލިމްޕިކްސް ބާލިންގައި ބެޑްމިންޓަން އިން ރާއްޖޭގެ އައިޝަތު އާދަމް އެއްވަނަ ހޯދާފައިވާކަމާއި، އެތްލެޓިކްސް ބައިން ލައިކާ އަދި ޒާނާ ވަނީ ބްރޯންސް މެޑަލް ހޯދާފައިކަން ފާހަގަ ކުރިއެވެ.
މި ކުދިންނަށް ވަނީ އެހެން ކުޅިވަރުތަކުން ވަނަ ހޯދާ މީހުންނެކޭ އެއްގޮތަށް، ގައުމީ އިނާމު ހޯދުމަށް ދަތިތައް ކުރިމަތިމަތިވެފައި ކަމަށާއި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިވަނީ މަޖިލީހަށް ހުށަހަޅުއްވާފައިވާ ކުޅިވަރު ގާނޫނަށް އިސްލާހުގެނައުމުގެ ބިލުގެ ތެރެއިން އެކުދިންނަށް ގާނޫނީ ޝަހުސެއް އުފެދިގެންދާ ގޮތަށް ހަމަޖައްސަވާ ދެއްވާފައިކަން މެންބަރު އިމްރާން ފާހަގަ ކުރެއްވިއެވެ.
ރާއްޖޭގެ ކުޅިވަރުގެ ކަންކަން މިހާރަށްވުރެ ހަރުދަނާ ކުރުމަށް ގާނޫނަށް ގިނަ އިސްލާހުތަކެއް ހިމަނާފައިވާ، ކުޅިވަރު ގާނޫނަށް އިސްލާހުގެނައުމުގެ ބިލު ރައްޔިތުންގެ މަޖިލީހަށް ހުށަހަޅުއްވާދެއްވީ ދިއްދޫ ދާއިރާގެ މެންބަރު އަބްދުއްލަތީފް މުހައްމަދެވެ.