ދައުލަތުގެ ދަރަންޏާ ބެހޭ ބިލާއި ފިސްކަލް ޒިންމާގެ ބިލު މަޖިލީހުން ފާސްކޮށްފި

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅުއްވާފައިވާ ދައުލަތުގެ ދަރަންޏާބެހޭ ބިލާއި ދައުލަތުގެ ފިސްކަލް ޒިންމާގެ ބިލު މަޖިލީހުން ފާސްކޮށްފިއެވެ.

މި ދެ ބިލު މަޖިލީހުން ފާސްކޮށްފައިވަނީ މިއަދު ބޭއްވި ޖަލްސާގައި ބައިވެރިވި މެންބަރުންގެ އަޣްލަބިއްޔަތުންނެވެ.

ސަރުކާރުގެ ފަރާތުން ދައުލަތުގެ ދަރަންޏާބެހޭ ބިލް މަޖިލީހަށް ހުށަހެޅުއްވީ ފުނަދޫ ދާއިރާގެ މެންބަރު މުޙައްމަދު މަމްދޫޙުއެވެ. މި ބިލު، ޤާނޫނަކަށްވެގެންދިއުމުން ރާއްޖޭގައި ޑެޓް މެނޭޖްމަންޓް ޑިޕާޓްމަންޓެއް ނުވަތަ ދަރަނި މެނޭޖުކުރުމަށް ޚާއްސަ ޑިޕާޓްމަންޓެއް ގާއިމްކުރަންޖެހެއެވެ. އަދި އެ ޑިޕާޓްމަންޓުން ދަރަނި ބަލަހައްޓައި މެނޭޖުކުރުމުގެ މަސައްކަތް ކުރަންޖެހޭއިއިރު ބިލު ޤާނޫނަކަށްވާތާ 6 މަސްދުވަހުގެ ތެރޭގައި ޑިޕާޓްމަންޓް ޤާއިމުކުރަންޖެހޭނެއެވެ.

ސަރުކާރުން ހުށަހެޅުއްވީ ޑެޓް މެނޭޖްމަންޓް އޮފީހެއް ޤާއިމުކުރުމަށެވެ. ނަމަވެސް އެއީ މާލީ ވުޒާރާގެ ދަށުން ހިންގާ އިދާރާއަކަށްވާތީ އެ އިދާރާގެ ނަން "ޑެޓް މެނޭޖްމަންޓް ޑިޕާޓްމަންޓް"އަށް ބަދަލުކޮށްފައިވަނީ މާލިއްޔަތު ކޮމިޓީން ބިލު ދިރާސާކުރުމުގެ މަރުހަލާގައެވެ.

މި ބިލު ޤާނޫނަކަށްވުމުން މާލީ ވުޒާރާގެ މިހާރުގެ ޑެޓް މެނޭޖްމަންޓް ޑިޕާޓްމަންޓުގެ ހުރިހާ ޒިންމާއެއް އަލަށް އުފެދޭ އިދާރާގެ ދަށަށް ބަދަލުވާނެއެވެ. މި ބިލުގައި ދައުލަތުގެ ދަރަނި ނެގުމާބެހޭ އުސޫލުތަކާއި މެނޭޖުކުރުމުގެ އުސޫލުތަކާއި ދަރަންޏާއި ބެހޭ މައުލޫމާތު ހާމަކުރުމާއި ރިޕޯޓްކުރުމާއި ކައުންސިލްތަކާއި ސަރުކާރު ހިއްސާވާ ކުންފުނިތަކުން ނަގާ ދަރަންޏަށް ސޮވްރިން ގެރެންޓީ ދިނުމާބެހޭ އުސޫލުތައްވެސް ވަނީ ބަޔާންކޮށްފައެވެ.

ސަރުކާރުގެ ފަރާތުން، ދައުލަތުގެ ފިސްކަލް ޒިންމާގެ ބިލު މަޖިލީހަށް ހުށަހެޅުއްވީ ތުލުސްދޫ ދާއިރާގެ މެންބަރު އިބްރާހީމް ނަސީމެވެ. މި ބިލަކީ ދައުލަތުގެ ޚަރަދަށް ޒިންމާވުމުގެ ޤާނޫނުގެ ބަދަލުގައި އެކަށީގެންވާ ގޮތެއްގައި ތަންފީޒުކުރެވޭނެ ފިސްކަލް ހަމަތަކާގުޅޭ އައު ނިޒާމެއް ތަޢާރަފުކޮށް ދައުލަތުގެ ފިސްކަލް އެންމެހާ ކަންކަން ހިންގަނީ ދެމެހެއްޓެނިވި، ދެފުށް ފެންނަ އަދި ޒިންމާދާރު ގޮތެއްގައިކަން ކަށަވަރުކުރުމަށް އެކުލަވާލާފައިވާ ބިލެކެވެ.

ދައުލަތުގެ ފިސްކަލް ޒިންމާގެ ބިލުގައި ދައުލަތުގެ ފިސްކަލް ޕޮލިސީ، ދެމެހެއްޓެނިވި އަދި ދެފުށް ފެންނަ ގޮތެއްގައި ކުރިއަށްގެންދިއުމަށް ގިނަ ކަންކަން ވަނީ ހިމަނާފައެވެ. އެގޮތުން، މާލީ ވުޒާރާއިން ފިސްކަލް ޕޮލިސީ އެކުލަވާލަންޖެހޭއިރު ކޮންމެ ރިޔާސީ ދައުރެއް ފެށޭތާ 6 މަސްދުވަހުގެ ތެރޭގައި އެ ސަރުކާރެއްގެ 5 އަހަރުގެ ފިސްކަލް ޒިންމާގެ ޗާޓަރު އެކުލަވާލައި ގެޒެޓުގައި ޝާއިއުކުރަންވާނެ ކަމަށްވެސް ވަނީ ބަޔާންކޮށްފައެވެ. މި ޗާޓަރު އެކުލަވާލަން ޖެހޭނީ ފިސްކަލް ޕޮލިސީގެ ހަމަތަކަށް ބިނާކޮށް ކަމަށް ވަނީ ބުނެފައެވެ.