އިސްރާއީލުގެ ވެރިން މަނާކޮށް، ޕާސްޕޯޓުގައި އަންނަ މީހުންނަށް ހިފެހެއްޓުންތަކެއް ގެންގުޅެންޖެހޭ: މަޓާޓޯ

ހައްދުފަހަނައަޅާފައިވާ ޔަހޫދީ އިސްރާއީލުގެ ވެރިންގެ ޕާސްޕޯޓް މަނާކުރުމާއެކު، އެ ދައުލަތުގެ ޕާސްޕޯޓުގައި ރާއްޖެ އަންނަ އެހެނިހެން މީހުންނަށް ހިފެހެއްޓުންތަކެއް ގެންގުޅެންޖެހޭކަމަށް މަޓާޓޯއިން ބުނެފިއެވެ.

ޔަހޫދީ ޒަޔަނިސްޓު އިސްރާއީލުގެ ޕާސްޕޯޓުގައި ރާއްޖެއަށް އެތެރެނުވެވޭ ގޮތް ހެދުމަށް އިމިގްރޭޝަން ޤާނޫނަށް ހުށަހަޅާފައިވާ އިސްލާހާ ގުޅިގެން ސަލާމަތީ ޚިދުމަތްތަކާބެހޭ ކޮމިޓީން ދަނީ ކަމާގުޅުންހުރި އެކި އިދާރާތަކާ ބައްދަލުކުރަމުންނެވެ. މީގެ ތެރޭގައި ފަތުރުވެރިކަމުގެ ދާއިރާގައި ހިމެނޭ އެކި ޖަމުޢިއްޔާތައްވެސް ހިމެނެއެވެ.

މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް، މަޓާޓޯގެ ރައީސް ޢަބްދުﷲ ޤިޔާސް ރިޔާޒް ސަލާމަތީ ޚިދުމަތްތަކުގެ ކޮމިޓީގައި ވިދާޅުވީ ޔަހޫދީ ދައުލަތުގެ ޕާސްޕޯޓް މަނާކުރުމުން ކުރާނެ އަސަރާ ގުޅޭ ދިރާސާއެއް މިހާތަނަށް ހެދިފައިވާ ނުވާ ކަމަށެވެ. ނަމަވެސް ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކާ މަޝްވަރާކޮށްފައިވާ ކަމަށާއި އެންމެ ރަނގަޅުގޮތަކީ އެ ދައުލަތުގެ އިސްވެރިންނަށް އަމާޒުކޮށްގެން ފިޔަވަޅު އެޅުން ކަމަށް އޭނާ ވިދާޅުވިއެވެ.

މަޓާޓޯގެ ރައީސް ވިދާޅުވީ ރާއްޖޭގެ ފަތުރުވެރިކަމުގައި ޔަހޫދީ ދައުލަތަކީ ވަރަށް ކުޑަ މާކެޓެއް ކަމަށާއި، އެ ދައުލަތުންވެސް ރާއްޖެ ބޯއިކޮޓް ކުރާއިރު ކުރިއަށް އޮތް 10 އަހަރުގައިވެސް އެ ދައުލަތުގެ ފަތުރުވެރިން ރާއްޖެއަށް އަންނާނެކަމަށް ނުބެލެވޭ ކަމަށެވެ. ނަމަވެސް ރާއްޖެއަށް ދިމާވާނެ ގޮންޖެހުމަކީ ޑުއަލް ސިޓިޒަންޝިޕް އޮންނަ ފަތުރުވެރިކަން ކަމަށާއި ރާއްޖެއަށް އެންމެ ގިނަ ފަތުރުވެރިން އަންނަ އެއް ޤައުމު ކަމަށްވާ ރަޝިއާގައިވެސް ޔަހޫދީ ދައުލަތުގެ ޑުއަލް ޕާސްޕޯޓް ގެންގުޅޭ މީހުން ގިނަކަމަށްވެސް އޭނާ ވިދާޅުވިއެވެ.

މީގެ އިތުރުން ފަލަސްތީނުގެ ރައްޔިތުންގެ ތެރޭގައިވެސް ޔަހޫދީ ދައުލަތުގެ ޑުއަލް ޕާސްޕޯޓް ގެންގުޅެން ޖެހިފައިވާ ރައްޔިތުން ތިބިއިރު އެ ދައުލަތުގެ ޕާސްޕޯޓް އެއްކޮށް މަނާކުރުމުގައި އެކަމަށް ރިއާޔަތްކުރަންޖެހޭ ކަމަށްވެސް މަޓާޓޯގެ ރައީސް ވިދާޅުވިއެވެ.

ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީއިން، ޤާނޫނު ނަންބަރު 1/2007 (ދިވެހިރާއްޖޭގެ އިމިގްރޭޝަންގެ ޤާނޫނު) އަށް އިޞްލާޙު ގެނައުމުގެ ބިލާ ގުޅޭގޮތުން މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސްގެ ބޭފުޅުންނާ ބައްދަލުކުރުން pic.twitter.com/Nse5dCAqUN

— People's Majlis (@mvpeoplesmajlis) November 27, 2024

ޔަހޫދީ ދައުލަތުގެ އިތުރުން އެ ދައުލަތަށް ވާގިވެރިވާ ޤައުމުތަކަށްވެސް ބަލަންޖެހޭކަން ފާހަގަކުރައްވައި މަޓާޓޯގެ ރައީސް ވިދާޅުވީ އެ ޤައުމުތަކުން ފިޔަވަޅު އަޅައިފިނަމަ އޭގެ އަސަރު ރާއްޖޭގެ އިގްތިސާދަށް ކުރާނެ ކަމަށެވެ. އެހެންވެ، ޔަހޫދީ ދައުލަތުގެ ވެރިންގެ ޕާސްޕޯޓް މަނާކުރުމަށްފަހު އެ ދައުލަތުގެ ޕާސްޕޯޓުގައި ރާއްޖެ ވަންނަ ފަރާތްތަކަށް ހިފެހެއްޓުންތަކެއް ހުންނަންޖެހޭކަމަށް ގަބޫލުކުރައްވާ ކަމަށްވެސް ޤިޔާސް ވިދާޅުވިއެވެ.

"މީގަ އިސްރާއީލް އެކަންޏެއް ނޫން. އިސްރާއީލް ފަހަތުގައި ތިބީ ކޮންބައެއްތޯ ބަލަންޖެހޭ. އެންމެ ބޮޑަށް ބަލާއިރު އެމެރިކާއާއި އެމެރިކާގެ ހުރިހާ އެލައިންތައް، މިޑްލް އީސްޓް ޤައުމުތަކާއި އިންޑިއާވެސް. އެހެންވީމަ އަޅުގަނޑުމެން އެއަށްވެސް ވިސްނަންޖެހޭ. އަޅުގަނޑުމެންގެ ޑޮލަރ ރެމިޓެންސަށް މި ޑިޕެންޑް ވަނީ ޔޫއެސްޑީ އިންފްލޯސްއަށް. އެހެންވީމަ މާދަމާވެސް އެމެރިކާއިން ރާއްޖެއަށް ސްވިސްޓް ކަނޑާލިޔަސް އަޅުގަނޑުމެންނަށް ވަރަށް ބޮޑު ޗެލެންޖަކަށްވާނީ." މަޓާޓޯގެ ރައީސް އަބްދުﷲ ޤިޔާސް ރިޔާޒް ވިދާޅުވިއެވެ.

ޔަހޫދީ ދައުލަތުގެ ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަންގެ ޤާނޫނަށް އިސްލާހު ގެނައުމުގެ ބިލާ ގުޅިގެން ކަމާގުޅުންހުރި ހުރިހާ ބޭފުޅުންނާ ބައްދަލުކުރައްވަނީ މިއީ ޤައުމުގެ އިގްތިސާދާ ގުޅުންހުރި ކަމަކަށްވާތީކަމަށް ސަލާމަތީ ޚިދުމަތްތަކާބެހޭ ކޮމިޓީގެ މުގައްރިރު އަދި އޭދަފުށި ދާއިރާގެ މެންބަރު އަޙްމަދު ސަލީމް ވަނީ ވިދާޅުވެފައެވެ.