ސްކޫލުތަކުގެ މެދުގައި ބާއްވަމުން އަންނަ ހޭންޑްބޯޅަ މުބާރާތުގެ ހަތްވަނަ މުބާރާތް މިއަހަރު 73 ޓީމާއެކު ފަށައިފިއެވެ.
ހޭންޑްބޯލް މޯލްޑިވްސްއިން އިންތިޒާމުކޮށްގެން ކުރިޔަށްގެންދާ މި މުބާރާތް ކުރިއަށްދާނީ އަންނަ މަހުގެ 11 ގެ ނިޔަލަށެވެ. ޖުމްލަ 28 ސްކޫލަކުން ބައިވެރިވެފައިވާ މި މުބާރާތް ކުރިޔަށްދާނީ ދެ އުމުރުފުރާއަކަށް ބަހާލައިގެންނެވެ.
މި މުބާރާތް ކުރިޔަށްދާނީ 15 އަހަރުން ދަށާއި 17 އަހަރުން ދަށުގެ އަންހެން އަދި ފިރިހެން ކެޓަގަރީއަށް ހާއްސަކޮށްގެންނެވެ. މުބާރާތުގެ ޝެޑިއުލްގައިވާ ގޮތުން ޖުމްލަ 142 މެޗެއް ވަނީ ތާވަލުކޮށްފައެވެ.
އެކި އުމުރުފުރާތަކުން މި މުބާރާތުގައި ވާދަކުރަމުން އަންނަ ޓީމުތައް ވަކިވަކިން ބަލާއިރު 15 އަހަރުން ދަށުގެ އަންހެން ބައިގައި ޖުމްލަ 20 ޓީމު ބައިވެރިވެފައިވެއެވެ. މި ކެޓަގަރީ ކުރިޔަށްދާނީ ފަސް ގްރޫޕަކަށް ބަހާލައިގެންނެވެ. ކުއާޓާއިން ޖާގަ ލިބޭނީ ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން، ފަސް ގުރޫޕުން ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށެވެ.
މީގެ އިތުރުން 15 އަހަރުން ދަށުގެ ފިރިހެން ޑިވިޝަނުގައި 14 ޓީމަކުން ވަނީ ބައިވެރިވެފައެވެ. މި ކެޓަގަރީގެ މެޗުތައް ކުރިޔަށްދާނީ ހަތަރު ގްރޫޕަކަށް ބަހާލައިގެންނެވެ. އަދި 17 އަހަރުން ދަށުގެ އަންހެން ޑިވިޝަންގެ ކުޅުން ކުރިޔަށްދާނީ 23 ޓީމު ފަސް ގްރޫޕަކަށް ބަހާލައިގެންނެވެ. މި ޑިވިޝަންގެ މެޗުތައް ކުރިއަށްދަނީ ބައިވެރިވި 23 ޓީމު ފަސް ގުރޫޕަކަށް ބަހާލައިގެންނެވެ.
17 އަހަރުން ދަށުގެ ފިރިހެން ޑިވިޝަނުގައި 16 ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ.