ރާއްޖެ ސަރަޙައްދުގައި އުފެދިފައިވާ 2 ކޮޅިގަނޑުގެ ބާރުގަދަވެ ދެކުނުގެ މޫސުން ގޯސްވެދާނެ

ރާއްޖެ ހިމެނޭ ސަރަޙައްދުގައި އުފެދިފައިވާ 2 ކޮޅިގަނޑުގެ ސަބަބުން ރާއްޖޭގެ ދެކުނުގެ ސަރަޙައްދަށް ބޯކޮށް ވާރޭވެހި ކަނޑުތައް ގަދަވާނެކަމަށް ލަފާކުރެވޭތީ، މޫސުމަށް ޚާއްސަ ސަމާލުކަމެއް ދެއްވުމަށް މޫސުމާ ބެހޭ ޤައުމީ އިދާރާއިން އިލްތިމާސްކުރައްވައިފިއެވެ.

މޫސުމާ ބެހޭ ޤައުމީ އިދާރާއިން ވިދާޅުވީ، މެދުރާއްޖެތެރެއާއި ދެކުނުގެ އެކި ހިސާބަށް ގުގުރުމާއެކު ބޯކޮށް ވާރޭ ވެހުން އެކަށީގެންވާކަމަށެވެ. އަދި އުތުރުގެ އަތޮޅުތަކަށް ކެރީގެ އަސަރުކުރާނެކަމަށް ބެލެވޭކަމަށްވެސް އެއިދާރާއިން ވިދާޅުވެއެވެ.

މޫސުމާ ބެހޭ ޤައުމީ އިދާރާއިން ވިދާޅުވީ ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 10 މޭލާއި 20 މޭލާއި ދެމެދުގެ ބާރުމިނުގައި ވައިޖެހޭނެކަމަށް ލަފާކުރެވޭކަމަށެވެ. އަދި ވިލާގަނޑުގައި ގާތްގަނޑަކަށް 35 މޭލު ބާރުމިނުގައި ވައިގަދަވުން އެކަށީގެންވާކަމަށެވެ.

މޫސުމާ ބެހޭ އިދާރާއިން ވިދާޅުވީ ދެކުނުގެ ކަނޑުތައްވެސް ކުރިއަށް އޮތް ގަޑިތަކުގައި އާދައިގެ ވަރަކަށް ގަދަވާނެކަމަށެވެ. އަދި އެހެން ހިސާބުތަކުގެ ކަނޑުތައް އާދައިގެ ވަރަކަށް މަޑުވާނެކަމަށާއި ވިލާގަނޑުގައި ރާއްޖޭގެ ކަނޑުތައް ގަދަވާނެކަމަށެވެ. އެހެންކަމުން މިދުވަސްވަރު ކަނޑުދަތުރުކުރާ ފަރާތްތަކުން މޫސުމަށް ޚާއްސަ ސަމާލުކަމެއްދިނުމަށް އެއިދާރާއިން އިލްތިމާސްކުރައްވައެވެ.

މޫސުމާ ބެހޭ އިދާރާއިން ވިދާޅުވީ ރާއްޖޭގެ އިރުން، ބޭ އޮފް ބޭންގަލް އާއި ރާއްޖޭގެ އިރުދެކުނުގައި އުފެދިފައިވާ ދެ ކޮޅިގަނޑުގެ ބާރުގަދަވަމުން އަންނަކަމަށާއި ކުރިއަށް އޮތް ގަޑިތަކުގައި މޫސުން ގޯސްވާނެކަމަށް ބެލެވޭކަމަށެވެ.