ޕީއެންސީގެ އެތެރޭގެ އިންތިޚާބުގެ ވަގުތީ ނަތީޖާ އިޢުލާނުކޮށް، ޝަކުވާއަށް ހުޅުވާލައިފި

ޕީޕަލްސް ނޭޝަނަލް ކޮންގްރެސް، ޕީއެންސީ އެތެރޭގެ އިންތިޚާބުގެ ވަގުތީ ނަތީޖާ އިއުލާންކޮށް، ޝަކުވާ ހުށަހެޅުމުގެ ފުރުޞަތު ހުޅުވާލައިފިއެވެ.

މިދިޔަ ހޮނިހިރު ދުވަހު ބޭއްވި ޕީއެންސީގެ އެތެރޭގެ އިންތިޚާބަކީ މިހާތަނަށް ސިޔާސީ ޕާޓީއަކުން ބޭއްވި އެންމެ ބޮޑު އިންތިޚާބެވެ. އެ އިންތިޚާބުގައި 34،904 މީހަކަށް ވޯޓުދިނުމުގެ ޙައްގު ލިބުނުކަމަށް ޕީއެންސީން ބުންޏެވެ. މި އިންތިޚާބުގެ ވޯޓުލުން ކުރިއަށްގެންދިޔައީ 4 ގަޑިއިރަށެވެ. އަދި ވޯޓުލުމަށް ރާއްޖޭގެ ހުރިހާ އަތޮޅެއްގައި ޖުމްލަ 143 ފޮށި ބެހެއްޓިއިރު، މި އިންތިޚާބުގައި 667 ކެންޑިޑޭޓުން ވާދަކުރިއެވެ.

ޕީއެންސީން ބުނީ ވަގުތީ ނަތީޖާ އިއުލާނުކުރީ ވޯޓުލާ މަރުކަޒުތަކުގައި ވޯޓު ގުނައި އެ މަރުކަޒުތަކުގައި އިއުލާންކުރި ނަތީޖާތައް ކަށަވަރު ކުރުމަށްފަހު ކަމަށެވެ. ނަމަވެސް އެ ނަތީޖާއާމެދު ޝަކުވާއެއް އޮތްނަމަ ހެކިތަކާއެކު އެކަމަށް ހާއްސަ ފޯމާއެކު ޝަކުވާ ހުށަހެޅޭނެ ކަމަށްވެސް އެޕާޓީން ބުންޏެވެ.

އިޢުލާން - ކޮންގްރެސް ޕާޓީގެ ދާއިރާތަކުގެ އިންތިޚާބުގެ ވަގުތީ ނަތީޖާ އިޢުލާން ކުރުން.

ނަތީޖާ ޝީޓު: https://t.co/VZdf75UaaM

ޝަކުވާ ފޯމް: https://t.co/PiN9nVHyv3#DhaairaInthikhaabu2024 #DhiveheengeRaajje#CongressPartyMV pic.twitter.com/2FgQNFFruG

— PNC Secretariat (@pnc_secretariat) November 25, 2024

މި އިންތިޚާބުގެ ދާއިމީ ނަތީޖާ އިއުލާނުކުރާނީ އިންތިޚާބުގައި ބެހެއްޓި ވޯޓުފޮށިތަކުގެ ވޯޓު ކަރުދާސްތަކާއި ނަތީޖާ ޝީޓުތަކުުގެ އަސްލު ޕީއެންސީގެ ރަސްމީ އޮފީހަށް ލިބުމުން، ހުށަހަޅާ ޝަކުވާތަކަށް ރިއާޔަތްކުރުމަށްފަހު ކަމަށް އެ ޕާޓީން ބުނެއެވެ.

މީގެ އިތުރުން ވޯޓުން ހޮވުނު މަގާމުތަކާއި ވޯޓަކާއި ނުލައި އިންތިޚާބުވި މަގާމުތައް އަދި މަގާމުގެ ހައިސިއްޔަތުން ކޮމިޓީގައި ހިމެނޭ މެންބަރުގެ މައްޗަށް އެކުލެވޭ ޕާޓީގެ ސްޓިއަރިން ކޮމިޓީތަކުން 72 ގަޑިއިރު ތެރޭގައި ވޯޓަކުން ކަނޑައަޅަންޖެހޭއިތުރު، މަގާމުތައް ކަނޑައެޅުމުގެ މަސައްކަތް ކުރިއަށްދާނީ ދާއިމީ ނަތީޖާ އިއުލާނުކުރުމަށްފަހު ކަމަށްވެސް ޕީއެންސީން ބުންޏެވެ.

ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެފައިވަނީ، މަޤާމުތަކަށް އަލަށް އިންތިޚާބުވި ފަރާތްތަކާއެކު އެޕާޓީގެ ހިންގުން އިތުރަށް ހަރުދަނާކުރެވޭނެކަމަށެވެ.