ތެޔޮ ރައްކާކުރުން ތިލަފުއްޓަށް ބަދަލުކުރުމުން ކެޕޭސިޓީ އިތުރުވެ، ތެލުގެ އަގު ހެޔޮވާނެ: ޝިމާދު

ފުނަދޫގައި ހުރި ތެޔޮ ރައްކާކުރާ ނިޒާމު ތިލަފުއްޓަށް ބަދަލުވެގެންދިޔުމާއި އެކު، ތެޔޮ ރައްކާކުރުމުގެ ޤާބިލްކަން އިތުރުވެ، ތެލުގެ އަގަށް ހެޔޮ ބަދަލުތަކެއް އަންނާނެ ކަމަށް ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވެއްޖެއެވެ.

އެސްޓީއޯގެ މެނޭޖިންގ ޑިރެކްޓަރ ޝިމާދު މިހެން ވިދާޅުވީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުންނެވެ.

ފުނަދޫގައި ތެޔޮ ރައްކާކުރުމުގައި ގިނަ ގޮންޖެހުންތަކެއް އެބަހުއްޓެވެ. ޖާގަ އިތުރުކުރެވެން ނެތް އިރު ބޮޑެތި ބޯޓު ފަހަރުވެސް އެރަށަށް ކައިރި ނުކުރެވެއެވެ. އަދި މިހާރު ފުނަދޫގައި ކުރަމުންގެންދާ މަސައްކަތް ތިލަފުއްޓަށް ބަދަލުކުރުމަށް ރާވާފައިވާއިރު، މި މަޝްރޫޢުވެގެންދާނީ އެސްޓީއޯގެ އެންމެ ބޮޑު އެއް މަޝްރޫޢަށްކަމަށް އެސްޓީއޯއިން ވިދާޅުވިއެވެ.

މި މަޝްރޫޢާއި ގުޅޭ ފަހުގެ ތަފްސީލްތައް ހިއްސާކުރައްވަމުން އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާޙީމް ވިދާޅުވީ ފުނަދޫގައި ތެޔޮ ރައްކާކޮށްގެން ވިޔަފާރި އިތުރަށް ފުޅާކުރުމަށް ގިނަ ގޮންޖެހުންތަކެއް އެބަހުރި ކަމަށެވެ.

އަދި ތެޔޮ ރައްކާކުރުމުގެ ފެސިލިޓީ ތިލަފުއްޓަށް ބަދަލުކުރަން ނިންމާފައިވާއިރު، މި މަޝްރޫޢާއި އެކު އެއްފަހަރާ ގިނަ އަދަދެއްގެ ތެޔޮ ރާއްޖެއަށް އެތެރެކޮށް ރައްކާކުރުމުގެ ގާބިލްކަން ލިބިގެންދާނެ ކަމަށާއި އެއާއެކު ތެލުގެ އަގަށްވެސް ހެޔޮ ބަދަލުތަކެއް އަންނާނެ ކަމަށް ޝިމާދު ވިދާޅުވިއެވެ.

"ބޮޑެތި ވެސަލްތައް ކައިރިކުރަން ވަރަށް އުނދަގޫ، ފުނަދޫގައި މިއޮތް ޓަރމިނަލްއާއި ހެދި ނެތް ވިޔަފާރި އިތުރަށް ފުޅާކުރުމުގެ ފުރުސަތުތަކެއް،އެހެންކަމުން ފިއުލް ފަރމު ރިލޮކޭޓުކޮށް، އިކޮނޮމީ ސައިޒުގެ ވެސަލްތައް ގެނެސް، ތެލުގެ އަގު މިއަށްވުރެ ދަށްކޮށް ތެލުގެ ވިޔަފާރިފުޅާވެގެންދާނެ،" ޝިމާދު ވިދާޅުވިއެވެ.

ޝިމާދު ވިދާޅުވީ އެކުންފުނީގެ ތެޔޮ ރައްކާކުރާ ނިމާޒު ތިލަފުއްޓަށް ބަދަލުކުރުމުގެ މަސައްކަތަށް ކޮންސަލްޓަންޓެއް ހަމަޖައްސާފައިވާކަމަށެވެ. އަދި މިހާރު ކުރިއަށް ދަނީ އެތަނުގެ ޑިޒައިންކުރުމާއި ކޮންސެޕްޓުގެ މަސައްކަތްތައް ނިމުމާއި އެކު އަމަލީ މަސައްކަތްތައް ފެށިގެންދާނެ ކަމަށެވެ.

"ޑީޓެއިލް ޑިޒައިން އާއި ކޮންސެޕްޓުގެ މަސައްކަތްކުރެވެމުންދަނީ، ކޮންސަލްޓަންޓުގެ މި މަސައްކަތް ނިމުމުން، ޕްރޮކިއުމަންޓުގެ މަސައްކަތް ފެށިގެންދާނެ، ލަފާކުރެވެނީ މި މަޝްރޫޢަށް 18-24 މަސް ނަގާނެ ކަމަށް ކަމަށް" ޝިމާދު ވިދާޅުވިއެވެ.

ފުނަދޫގައި ހުރި ތެޔޮ ރައްކާކުރާ ނިޒާމު އެހެންތަނަކަށް ބަދަލުކޮށް، އެރަށް ތަރައްޤީކުރުމަށް ސަރުކާރުން ނިންމާފައިވަނީ އިޤްތިޞާދީ ޚާއްޞަ ސަރަޙައްދެއްގެގޮތުގައެވެ.

ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ ބިޔަ މަޝްރޫޢުއާއި، ސްޕެޝަލް އިކޮނޮމިކް ޒޯން ތަރައްޤީކުރުން ފެށުމަށް މިއަހަރުގެ ޖަނަވަރީމަހު ބޭއްވި ރަސްމިއްޔާތުގައި އެރަށުގައި ބައިނަލްއަގުވާމީ މާލީ މަރުކަޒެއް ޤާއިމްކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.