ރަޝިއާ ފަތުރުވެރިންގެ އަދަދު 2 ލައްކައިން މައްޗަށް، މިދިޔަ އަހަރަށްވުރެ %6 އިތުރު

އަހަރުގެ މިހާތަނަށް ރަޝިއާއިން ރާއްޖެއަށް 2 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އެންމެ ފަހުން ނެރެފައިވާ ތަފާސްހިސާބުތައް ހިމެނޭ ރިޕޯޓުގައިވާގޮތުން، ރަޝިއާއަކީ ރާއްޖެއަށް މިހާރު ދެ ވަނައަށް އެންމެ ގިނައިން ފަތުރުވެރިން އަންނަ ޤައުމެވެ. އަދި ރާއްޖެއަށް އައިސްފައިވާ ޖުމްލަ ފަތުރުވެރިންގެ 11.2 އިންސައްތަ ހިއްސާކުރަނީ ރަޝިއާ ފަތުރުވެރިންނެވެ.

ތަފާސްހިސާބުތައް ދައްކާގޮތުން އަހަރުގެ މިހާތަނަށް ރަޝިއާއިން ރާއްޖެއަށްވަނީ 201،491 ފަތުރުވެރިން އައިސްފައެވެ. މިދިޔަ އަހަރުގެ މި މުއްދަތުގައި އެޤައުމުން ރާއްޖެއަށް އައިސްފައިވަނީ 189،541 ފަތުރުވެރިންނެވެ. އެހެންކަމުން އަދަދުތައް މިވަނީ %6 އިތުރުވެފައެވެ. މިދިޔަ އަހަރުގެ ޑިސެމްބަރުމަހުގެ ނިޔަލަށް ރާއްޖެއަށް ރަޝިއާއިން އައިސްފައިވަނީ 209،146 ފަތުރުވެރިވެރިންނެވެ.

ރާއްޖެއަށް މިހާރު އެންމެ ގިނަ އަދަދަކަށް ފަތުރުވެރިން އަންނަނީ ޗައިނާއިންނެވެ. އެގޮތުން އަހަރުގެ މިހާތަނަށް އެޤައުމުން ރާއްޖެއަށްވަނީ 248،141 ފަތުރުވެރިން ޒިޔާރަތްކޮށްފައެވެ.

ރާއްޖެއަށް ފަތުރުވެރިކަމުގެ ހައި ސީޒަން ފެށިފައިވާއިރު، މިދުވަސްވަރު ރާއްޖެއަށް އެއަރލައިންތަކުން ކުރާ ދަތުރުތައްވެސް ވަނީ އިތުރުވެފައެވެ.

ރަޝިއާއާއި ޗައިނާގެ އިތުރުން ރާއްޖެއަށް ފަތުރުވެރިން އެންމެ ގިނައިން އަންނަ ޤައުމުތަކުގެ އަދަދުތަކަށްވެސް ކުރިއެރުތައް ލިބިފައިވާކަން ތަފާސްހިސާބުތަކުން ދައްކައެވެ. އެގޮތުން އިޓަލީވިލާތް، ޖަރުމަންވިލާތް އަދި އިނގިރޭސިވިލާތުން ރާއްޖެއަށް އައިސްފައިވާ ފަތުރުވެރިންގެ އަދަދުތައް މިދިޔަ އަހަރާއި އަޅާ ބަލާއިރުވަނީ އިތުރުވެފައެވެ.

އަދި މިއަހަރުތެރޭ ފަތުރުވެރިން އައުން އެންމެ ބޮޑަށް މަޑުޖެހުނު ޤައުމުކަމަށްވާ އިންޑިއާއިންވެސް މިހާރުވަނީ އަދަދުތައް އިތުރުވާން ފަށާފައެވެ. ތަފާސްހިސާބުތައް ދައްކާގޮތުން އިންޑިއާއިން ރާއްޖެއަށްވަނީ އަހަރުގެ މިހާތަނަށް 109،651 ފަތުރުވެރިން އައިސްފައެވެ.

ފަތުރުވެރިކަމާއި ބެހޭ ވުޒާރާގެ ހިސާބުތައް ދައްކާގޮތުން އަހަރުގެ މިހާތަނަށް ޖުމްލަ 1،797،028 ފަތުރުވެރިން ވަނީ އައިސްފައެވެ. މި އަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް އައިސްފައިވާ 1،646،327 ފަތުރުވެރިންނާ އަޅާ ބަލާއިރު %9.2 އިތުރު އަދަދެކެވެ.

ސަރުކާރުން މިއަހަރަށް އަމާޒު ހިފާފައިވަނީ ރާއްޖެއަށް ދެ މިލިޔަން ފަތުރުވެރިން ގެނައުމަށެވެ. މި އަމާޒު ހާސިލްކުރުމަށް ދެން ބޭނުންވަނީ 353،673 ފަތުރުވެރިންނެވެ. އަދި ރާއްޖެއަށް މިހާރު ކޮންމެ ދުވަހަކު 5756 ފަތުރުވެރިން އަންނަ އިރު، މިއަހަރަށް ހިފާފައިވާ އަމާޒު ޑިސެމްބަރުމަހުގެތެރޭގައި ހާސިލްކުރެވޭނެކަމަށް ލަފާކުރެއެވެ.