ޕީއެންސީގެ އެތެރޭގެ އިންތިޚާބުގެ ވޯޓުލުން ނިމިއްޖެ، ނަތީޖާ އިޢުލާންކުރުން މިރޭ

ޕީޕަލްސް ނޭޝަނަލް ކޮންގްރެސް، ޕީއެންސީގެ އެތެރޭގެ އިންތިޚާބުގެ ވޯޓުލުން ނިންމައި ވޯޓު ގުނަން ފަށައިފިއެވެ. ޕީއެންސީގެ އެތެރޭގެ އިންތިޚާބުގެ ވޯޓުލުން ފެށީ ހެނދުނު 10:00ގައެވެ. އަދި ވޯޓުލުން ނިންމީ މެންދުރުފަހު 14:00ގައެވެ.

ޕީއެންސީގެ 2095 މަޤާމަކަށް މެންބަރުން އިންތިޚާބުކުރުމަށް ކަނޑައެޅިއިރު އޭގެ ތެރެއިން ބައެއް ދާއިރާތަކަށް ވަނީ އިންތިޚާބާ ނުލައި ބައެއް މީހުން އިންތިޚާބުވެފައެވެ.

އިންތިޚާބުކުރާ މަޤާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުން އަދި ރަށްރަށުގެ ޒުވާނުންގެ ހަރަކާތުގެ ރައީސުންނާއި ރަށްރަށުގެ އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުން ހިމެނެއެވެ. ޕީއެންސީން ދާއިރާތައް ހަމަޖައްސާފައިވަނީ މަޖިލީހުގެ ދާއިރާތައް ކަނޑައަޅާފައިވާގޮތަށެވެ. އަދި ޕީއެންސީގެ މަޖިލިސް މެންބަރުން ތިއްބެވި ދާއިރާތަކުގައި ދާއިރާގެ ރައީސުންގެ ގޮތުގައި ކަނޑައަޅާފައިވަނީ މެންބަރުންނެވެ. އަދި ޕީއެންސީގެ މަޖިލިސް މެންބަރުން ނެތް ދާއިރާތަކަށް ރައިސުން އައްޔަންކުރާނީ މި އިންތިޚާބުންނެވެ.

ޕީއެންސީން ބުނީ ކޮންމެ ރަށެއްގައިވެސް ސްޓިއަރިން ކޮމިޓީތަކަށް މެންބަރުން ހޮވާނެ ކަމަށެވެ. އެގޮތުން ރަށެއްގައި 3000 މީހުން އާބާދީގައި ހަމަނުވާނަމަ، އެ ރަށެއްގައި ސްޓިއަރިން ކޮމިޓީއަށް އިންތިޚާބުކުރާނީ 7 މެންބަރުން ކަމަށާއި 3000 މީހުންނަށްވުރެ އާބާދީ ބޮޑުނަމަ 9 މެންބަރުން އިންތިޚާބުކުރާނެކަމަށް އެޕާޓީން ބުންޏެވެ.

ޕީއެންސީން ބުނީ އެޕާޓީގެ މެންބަރުންގެ ދަފްތަރުގައި ހަތްދިހަ ފަސްހާހަށްވުރެ ގިނަމެންބަރުން ތިބިކަމަށެވެ. ވޯޓުލުމުގެ ހައްގު ލިބިފައިވާ މީހުންގެ ޢަދަދު ތިރީސް ހަތަރު ހާހަށްވުރެ މައްޗަށް އަރާކަމަށްވެސް އެޕާޓީން ބުންޏެވެ.

ޕީއެންސީން އަންދާޒާ ކުރަނީ މިރޭގެ ވަގުތެއްގައި މި އިންތިޚާބުގެ ނަތީޖާ އިޢުލާންކުރެވޭނެކަމަށެވެ.