ޕީއެންސީގެ އެތެރޭގެ އިންތިޚާބު ފެށިގެން ކުރިއަށް، ސިޔާސީ ޕާޓީއެއްގެ އެންމެ ބޮޑު އިންތިޚާބު

ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް، ޕީއެންސީގެ އެތެރޭގެ އިންތިޚާބު ފަށައިފިއެވެ. އިންތިޚާބުގެ ވޯޓުލުން ފަށާފައިވަނީ 10:00ގައެވެ. ވޯޓުލުން މެންދުރު ފަހު 14:00އާއި ހަމައަށް ކުރިއަށްދާނެކަމަށް ޕީއެންސީން ބުންޏެވެ.

މި އިންތިޚާބު ރާއްޖޭގެ ހުރިހާ އަތޮޅެއްގައިވެސް ކުރިއަށްގެންދެއެވެ

ޕީއެންސީގެ އެތެރޭގެ އިންތިޚާބުތަކުގައި ޕާޓީގެ އިސް މަގާމުތަކަށް ބޭފުޅުން އިންތިޚާބުކުރުމަށް ހަމަޖެހިފައިވާއިރު ގިނަ ރަށްތަކުގައި އިންތިޚާބަކާނުލައި މަގާމުތަކަށް ބޭފުޅުން ވަނީ ހޮވިފައެވެ. މީގެ ތެރޭގައި ދާއިރާތަކުގެ ރައީސުންނާއި ނައިބުން ހިމެނެއެވެ.

މި އިންތިޚާބުގައި ރަށްރަށުގައި ވޯޓު ފޮށި ބަހައްޓާފައިވަނީ އެ ރަށެއްގެ ސްކޫލުގައެވެ. އަދި މާލޭގެ ދާއިރާތަކާއި އަތޮޅުތަކުގެ ފޮށިތައް ދަރުބާރުގޭގައި ބަހައްޓާފައިވާއިރު، ހުޅުމާލޭގެ ދާއިރާތަކުގެ ފޮށި ރެހެންދި ސްކޫލުގައި، ވިލިމާލެ ދާއިރާގެ ފޮށި މުޙިއްޔުއްދީން ސްކޫލުގައި ވަނީ ބަހައްޓާފައެވެ.

ޕީއެންސީގެ އެތެރޭގެ އިންތިޚާބު އިޢުލާންކޮށް، އިންތިޚާބުކުރާ މަޤާމުތަކަށް ކުރިމަތިލާން ހުޅުވާލީ މިދިޔަ ސެޕްޓެންބަރުމަހުގެ 11 ވަނަ ދުވަހުއެވެ. އިންތިޚާބަށް ކުރިމަތިލާން ހުޅުވާލި މުއްދަތު މިދިޔަ މަހުގެ 24 ވަނަ ދުވަހު ވަނީ ހަމަވެފައެވެ.

މި އިންތިޚާބަކީ މިހާތަނަށް ރާއްޖޭގައި ސިޔާސީ ޕާޓީއަކުން ބާއްވާ އެންމެ ބޮޑު އިންތިޚާބަށްކަމަށް ޕީއެންސީން ބުންޏެވެ. އެގޮތުން މި އިންތިޚާބުގައި ޖުމްލަ 2095 މަޤާމަކަށް މެންބަރުން އިންތިޚާބުކުރާނެކަމަށް އެ ޕާޓީން ބުންޏެވެ.

އިންތިޚާބުކުރާ މަޤާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުން އަދި ރަށްރަށުގެ ޒުވާނުންގެ ހަރަކާތުގެ ރައީސުންނާއި ރަށްރަށުގެ އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުން ހިމެނެއެވެ.

ޕީއެންސީން ބުނީ ކޮންމެ ރަށެއްގައިވެސް ސްޓިއަރިން ކޮމިޓީތަކަށް މެންބަރުން ހޮވާނެ ކަމަށެވެ. އެގޮތުން ރަށެއްގައި 3000 މީހުން އާބާދީގައި ހަމަނުވާނަމަ، އެ ރަށެއްގައި ސްޓިއަރިން ކޮމިޓީއަށް އިންތިޚާބުކުރާނީ 7 މެންބަރުން ކަމަށާއި 3000 މީހުންނަށްވުރެ އާބާދީ ބޮޑުނަމަ 9 މެންބަރުން އިންތިޚާބުކުރާނެކަމަށް އެޕާޓީން ބުންޏެވެ.