ވިހި ވަނަ ރައްޔިތުންގެ މަޖިލީހުގައި މަސައްކަތްތައް ފުނިޖެހިފައި ނުހުންނާނެ: މަޖިލީހުގެ ރައީސް

20 ވަނަ ރައްޔިތުންގެ މަޖިލީހުގެ މަސައްކަތްތައް ފުނިޖެހިފައި ނުހުންނާނެކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. ރައްޔިތުންގެ މަޖިލީހުގެ ރައީސް މިފަދައިން ވިދާޅުވީ މަޖިލީހުގެ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުންނެވެ.

"ހަފްތާ 52" ޕްރޮގްރާމުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވީ މީގެ ކުރީގެ ރައްޔިތުންގެ މަޖިލީހުން ނަތީޖާ ނުރެވެވެނީ ނިޔަތް ރަނގަޅުނުވުމުން ކަމަށެވެ. އަދި ރައްޔިތުން މަޖިލީހަށް ވަޑައިގަންނަވާ ބޭފުޅުންގެ ނިޔަތަކީ ރައްޔިތުންނަށް ޚިދުމަތްކޮށްދިނުން ކަމަށްވާނަމަ ނަތީޖާ ނެރެވޭނެކަން ކަށަވަރުވާ ކަމަށާއި އެކަން 20ވަނަ ރައްޔިތުންގެ މަޖިލީހުން ސާބިތުކޮށްދެމުން ގެންދަވާކަމަށް މަޖިލީހުގެ ރައީސް ވިދާޅުވިއެވެ.

މަޖިލީހުގެ ރައީސް ވިދާޅުވީ ރައީސުލްޖުމްހޫރިއްޔާ ރައްޔިތުންނަށް ވެވަޑައިގެންނެވި ވައުދުތަކާއި ގުޅިގެން، އެ ވައުދުތައް ފުއްދުމަށް ޤާނޫނުތަކަށް މަޖިލީހުން ގެންނަންޖެހޭ އިސްލާހުތައް ގެނައުމުގެ މަސައްކަތައްވެސް މަޖިލީހުން ކުރަމުންދާ ކަމަށެވެ.

"ރައްޔިތުން ބޭނުންވާ ބިލެއް މަޖިލީހަށް ވަނުމުން އެ ބިލް ހިފެހެއްޓިފައި ނޯންނާނެ. މިހާތަނަށް މަޖިލީހުގެ އެއްވެސް ބިލެއްގެ މަސައްކަތް ނުހިނގައެއް ނޯންނާނެ. ވަރަށް ބާރު ސްޕީޑުގައި ކުރިއަށް ގެންދަނީ މަސައްކަތްތައް. މަޖިލީހުގެ މަސައްކަތްތަކަށް ބަލާއިރު ވަރަށް ބޮޑު ކާމިޔާބީއެއް މިހާތަނަށް ހާސިލްކޮށްފައިވޭ" މަޖިލީހުގެ ރައީސް ވިދާޅުވިއެވެ.

ޕީއެންސީގެ މަޖިލީސް މެމްބަރުން މަސައްކަތް ކުރައްވަނީ އެއް އަމާޒެއްގައި، އެއް އަޒުމެއްގައިކަން ފާހަގަކުރައްވާ މަޖިލީހުގެ ރައީސް ވިދާޅުވީ ކަންކަމުގައި މެމްބަރުންގެ ޚިޔާލުތަފާތު ނުވާ ކަމަށެވެ. އަދި ހުރިހާ މެމްބަރުންވެސް މަސައްކަތްކުރައްވަނީ އެކުގައި ރައްޔިތުންނަށް ޙިދުމަތްކޮށްދެއްވުމަށް ކަމަށް މަޖިލީހުގެ ރައީސް ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް 1 އަހަރު ފުރިފައިވާއިރު ގިނަ ކާމިޔާބީތައް ހާސިލްކުރެވިއްޖެ ކަމަށާއި ކުރިއަށް އޮތް 4 އަހަރުވެސް ފެންނަނީ ވަރަށް ކާމިޔާބުކޮށް ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވިއެވެ.