ސީ-ޓު-އެއަރ: ޚިދުމަތް ފުޅާވެ، އިޤްތިސާދަށް 3 މިލިޔަނަށްވުރެ ގިނަ ޑޮލަރު
-
މިހާތަނަށް ކަނޑުމަގުން ރާއްޖެ އައި 210 ކޮންޓެއިނަރުގެ މުދާ ވަނީ ވައިގެ މަގުން ފޮނުވާލާފައި
ސީ-ޓު-އެއަރ ކާގޯ ޚިދުމަތް ފުޅާވަމުން އަންނައިރު މިހާތަނަށް މި މަސައްކަތުން ރާއްޖޭގެ އިޤްތިސާދަށް 3 މިލިޔަނަށްވުރެ ގިނަ ޑޮލަރު ވަދެފައިވާކަމަށް މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސީއީއޯ މުހައްމަދު ވަޖީޙް އިބްރާހީމް ވިދާޅުވެއްޖެއެވެ.
ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިމަސައްކަތަކީ، ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި މިމަސައްކަތުން އެގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.
ސީ-ޓު-އެއަރ ކާގޯ ޚިދުމަތް އެމްޕީއެލްއިން ތަޢާރަފްކުރީ މިއަހަރުގެ މާރޗުމަހުގެ ތެރޭގައެވެ. ސީ-ޓު-އެއަރ ކާގޯގެ ޚިދުމަތުގެ ފުރަތަމަ ޝިޕްމަންޓް ރާއްޖޭން ފޮނުވީ މިއަހަރުގެ މެއިމަހުގެ ތެރޭގައެވެ.
ސީ-ޓު-އެއަރ ކާގޯ ޚިދުމަތާއި ގުޅޭގޮތުން އެމްޕީއެލްގެ ސީއީއޯ މުހައްމަދު ވަޖީޙް އިބްރާހީމް ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިގުތިސާދު ހަރުދަނާ ކުރެއްވުމަށް ވެރިކަމުގެ ފުރަތަމަ އަހަރު، ފެށްޓެވި މަސައްކަތްޕުޅުތަކުގެ ތެރޭ ހިމެނޭ "ސީޓު އެއަރ ކާގޯ"ގެ ޚިދުމަތް ވަރަށް ބާރަށް ފުޅާވަމުން އަންނަކަމަށެވެ.
ވަޖީޙު ވިދާޅުވީ މެއިމަހު ފެށި މިމަސައްކަތުގެ ތެރެއިން މިހާތަނަށް 3 މިލިޔަނަށްވުރެ ގިނަ އެމެރިކާ ޑޮލަރު ރާއްޖޭގެ އިގުތިސާދުގެ ތެރެއަށް ވަދެފައިވާކަމަށެވެ. އެހެން ކަމުން މިއީ ރާއްޖޭގެ އިގުތިސާދަށް ބޮޑު މަންފާއެއް ކުރާނެ ސިނާޢަތެއްގެ ގޮތުގައި ތަރައްގީ ވަމުން އަންނަކަން އޭނާ ފާހަގަކުރެއްވިއެވެ.
ހިސާބުތައް ދައްކާގޮތުން މިހާތަނަށް ކަނޑުމަގުން ރާއްޖެ އައި 210 ކޮންޓެއިނަރުން 1،008،000
( އެއް މިލިޔަން އަށްހާސް) ކިލޯގެ މުދާ ވަނީ ދުނިޔޭގެ އެކި ގައުމުތަކަށް ވައިގެ މަގުން ފޮނުވާފައެވެ. މިމުދާ ރާއްޖޭން ބޭރަށް ގެންދިއުމުގައި 11 އެއަރލައިނަކުން މިހާތަނަށް ވަނީ ބައިވެރިވެފައެވެ.
މުދާ ފޮނުވޭ ގައުމުތަކުގެތެރޭގައި އެމެރިކާ، ކެނެޑާ، އިނގިރޭސިވިލާތް އަދި ޔޫރަޕުގެ ގައުމުތައް ހިމެނެއެވެ. ސީ-ޓު-އެއަރ ކާގޯގެ ޚިދުމަތް މެދުވެރިކޮށް އާއްމުކޮށް ރާއްޖޭން ބޭރުކުރަނީ، ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ.
ރާއްޖޭގައި މިޚިދުމަތްދެމުންދަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން މޯލްޑިވްސް ޕޯޓްސް ލިމިޓެޑް، އެމްޕީއެލް އާއި މޯލްޑިވްސް ކަސްޓަމްސް ސަރވިސް ގުޅިގެންނެވެ.