ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބާއްވާ "މޯލްޑިވްސް ޓީ10 ސްމޭޝް" ގެ ކުޅުން ފަށައިފިއެވެ.
ކުޅިވަރު އެކުވެނީގެ އެއް ނަންބަރު ކްރިކެޓް ދަނޑުގައި ކުރިއަށްދާ މި މުބާރާތުގެ ކުޅުން ފަށާފައިވަނީ މިދިޔަ ހުކުރު ދުވަހެވެ. 12 ޓީމު ވާދަކުރާ މި މުބާރާތުގައި އެ ދުވަހު ހަތަރު މެޗު ކުޅުނުއިރު، ފުރަތަމަ މެޗުގައި މިލާން ކްރިކެޓް އެކެޑަމީއާ ވާދަކޮށް ސީބީއެލް ސްޕޯޓްސް ވަނީ 17 ލަނޑުން މޮޅުވެފައެވެ. މި މެޗުގައި ސީބީއެލްއިން 10 އޯވަރު ހަމަވިއިރު ނުވަ ކުޅުންތެރިން ނުބައިވެގެން ވަނީ 111 ލަނޑު ހަދާފައެވެ. ޖަވާބުގައި މިލާން ކުޅެން އަރައި 10 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 94 ލަނޑެވެ.
މުބާރާތުގައި ހުކުރު ދުވަހު ކުޅުނު ދެވަނަ މެޗުގައި ވިޔަންޒާ ވަނީ ނިއު ސްޓަރ އަތުން 73 ލަނޑުން މޮޅުވެފައެވެ. މި މެޗުގައި ވިޔާންޒާއިން 10 އޯވަރު ހަމަވިއިރު ތިން ކުޅުންތެރިން ނުބައިވެގެން 123 ލަނޑު ހެދިއިރު، ނިއު ސްޓަރ އަށް 10 އޯވަރުގައި އަށް ކުޅުންތެން ނުބައިގެން ހެދުނީ 50 ލަނޑެވެ.
ހުކުރު ދުވަހުގެ ތިންވަނަ މެޗުގައި އޮފް އެފްސީން ވަނީ ހަތަރު ވިކެޓުން އައިޒީ ބަލިކޮށްފައެވެ. މި މެޗުގައި އައިޒީ އެންމެ ފުރަތަމަ ކުޅެން އަރައި 10 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 43 ލަނޑެވެ. ޖަވާބުގައި އޮފް އެފްސީ ކުޅެން އަރައި ވަނީ އަށް އޯވަރުގެ ތެރޭގައި ހަ ކުޅުންތެރިން ނުބައިވެގެން 44 ލަނޑު ހަދާފައެވެ. އަދި އެ ދުވަހު ކުޅުނު ހަތަރުވަނަ މެޗުން ހިންނަވަރު ހިރިޔާ ވަނީ ވެސްޓް ސްޕޯޓްސް ކުލަބު އަތުން 52 ލަނޑުން މޮޅުވެފައެވެ. މި މެޗުގައި ހިންނަވަރު ހިރިޔާއިން 10 އޯވަރުގައި ހަތަރު ކުޅުންތެރިން ނުބައިވެގެން 107 ލަނޑު ހެދިއިރު، ވެސްޓް ސްޕޯޓްސްއަށް 10 އޯވަރުގައި އަށް ކުޅުންތެރިން ނުބައިވެގެން ހެދުނީ 53 ލަނޑެވެ.
މި މުބާރާތުގައި ހޮނިހިރު ދުވަހުވެސް ހަތަރު މެޗު ކުޅުނުއިރު، ފުރަތަމަ މެޗުގައި ފުވައްމުލައް ކްރިކެޓް އެކެޑަމީއާ ބައްދަލުކޮށް 8 ވިކެޓުން މެޗު ކާމޔާބުކުރީ މާލޭ ސްޕޯޓްސް ކުލަބުންނެވެ. މި މެޗުގައި ފުވައްމުލައް ކްރިކެޓް އެކެޑަމީ ކުޅެން އަރައި 10 އޯވަރު ހަމަވިއިރު ފަސް ކުޅުންތެރިން ނުބައިވެގެން ހެދުނީ 58 ލަނޑެވެ. ޖަވާބުގައި މާލޭ ސްޕޯޓްސް ކުޅެން އަރައި ހަތަރުވަނަ އޯވަރުގައި ވަނީ ދެ ކުޅުންތެރިން ނުބައިވެގެން 62 ލަނޑު ހަދާފައެވެ.
އެ ދުވަހުގެ ދެވަނަ މެޗުގައި ބީޖީ ސްޕޯޓްސް އަތުން އެމްއެސް ހެލްޕިން ހޭންޑް މޮޅުވީ ހަތް ވިކެޓުންނެވެ. މި މެޗުގައި ބީޖީ ސްޕޯޓްސްއިން 10 އޯވަރުގައި ފަސް ކުޅުންތެރިން ނުބައިވެގެން 77 ލަނޑު، ހެދިއިރު، ޖަވާބުގައި އެމްއެސް ހެލްޕިން ހޭންޑް އިން ވަނީ 10 ވަނަ އޯވަރުގައި ތިން ކުޅުންތެރިން ނުބައިވެގެން 80 ލަނޑު ހަދާފައެވެ. އަދި ތިންވަނަ މެޗުގައި ވިޔާންޒާއާ ބައްދަލުކޮށް މިލާން ކްރިކެޓް އެކެޑަމީ މޮޅުވީ 17 ލަނޑުންނެވެ. މި މެޗުގައި މިލާން އިން 10 އޯވަރުގައި ހަތަރު ކުޅުންތެރިން ނުބައިވެގެން 96 ލަނޑު ހެދިއިރު، ވިޔާންޒާއަށް 10 އޯވަރު ހަމަވިއިރު ހަ ކުޅުންތެރިން ނުބައިވެގެން ހެދުނީ 78 ލަނޑެވެ.
މީގެ އިތުރުން ހޮނިހިރު ދުވަހުގެ ފަހު މެޗުގައި އޮފް އެފްސީ އަތުން ސީބީއެލް މޮޅުވީ 79 ލަނޑުންނެވެ. މި މެޗުގައި ސީބީއެލް ސްޕޯޓްސް އިން 10 އޯވަރުގައި ދެ ކުޅުންތެރިން ނުބައިވެގެން 123 ލަނޑު ހެދިއިރު، އޮފް އެފްސީއަށް 10 އޯވަރު ހަމަވިއިރު ހަ ކުޅުންތެރިން ނުބައިވެގެން ހެދުނީ 44 ލަނޑެވެ.